HLAZY 140 - Mara Bible RV (BSI)

Moleipazy tawhta abohna thlahchhâna

Hla chhituhpa châta: Dâvi Hla

¹ Hy Abeipa, chyhsa moleipazy tawhta na pachha la, Thachahra a hmâhpa chyhsazy tawhta na pabohsa mah y.

² Âmo cha ama palôh ta hmo chhiepazy patuapalua ei ta, Adyuhna khâ a pathyupazy ama châ.

³ Ama palei parih paleih hawhta patiahsa ei ta, Ama hmao ry liata vâzi châmaih a y. Selah

⁴ Hy Abeipa, hmoparaopa ku tawhta na vaih la, Thachahra a hmâhpa chyhsazy tawhta na pabohsa mah y; Ei phei chapiasa a chhuahpazy ama châ hih.

⁵ Akhotlâhpazy ta arulâta khoheih na chôkhâh ei ta, Chaorizy ta sao na parai khâhpa ta, Lâpi liata khoheihzy eina chôkhâh ei. Selah

⁶ Abeipa hnohta, Ei Khazohpa châ chi ta, Hy Abeipa, zawngiah awpa ta ei awna ao lâ he, Na nah vaw pachôh mah y, tah na ta.

⁷ Hy Abeipa, ei Beipa, ei pachhana thatlôna y, Adyuhna noh liata ei luh eina khu ha chi.

⁸ Hy Abeipa, hmoparaopazy khopa pie leipa la, Amâ chhuahna moleipa pi patlohsa khah y; Chataleipatala cheihchalopa ta ama y pathlei aw na. Selah

⁹ Nâ teituhpazy hmao tawhta bie chhiepa a puapazy cha, Âmo luh chô liata tla thlu mawh sy!

¹⁰ Meihei iapazy ta âmo cha tla thlu sala, Mei liata thypa châ mawh ei sy! Thyu heih khao lei awpa ta, Khaohtlô athupa lâ thypa châ mawh ei sy!

¹¹ Kyhchhie a reih thaipazy cha, Râh liata paduapa châ leipa ei sala; Thachahra a hmâhpa chyhsazy cha, Hmo pha leipa ta a chatliepa ta chadai ei sala pahlei mawh ei sy.

¹² Abeipa ta pasa a taopazy â duakhei aw tahpa pahno na ta, Phahlapazy châta amâ dona â duakhei aw tahpa ei pahno.

¹³ Mosiapazy ta na moh reithai aw ei ta, Adopazy cha na mohmô liata ama pahrâ aw.