HLAZY 136 - Mara Bible RV (BSI)

A kyhpachâna tleih beih leipa vâta Abeipa reithaina

¹ Abeipa hnohta alyna bie reih teh u, Ano cha pha ta, A kyhpachâna tlyzaw ta a daihpa a châ.

² Khazozy Khazohpa hnohta alyna bie reih teh u, A kyhpachâna tlyzaw ta a daihpa a châ.

³ Beizy Beipa hnohta alyna bie reih teh u, A kyhpachâna tlyzaw ta a daihpa a châ.

⁴ Hmonoâh rônahpazy taotuhpa a y chhôhpa hnohta alyna bie reih teh u, A kyhpachâna tlyzaw ta a daihpa a châ.

⁵ Novâhna ta avâzy a taotuhpa hnohta alyna bie reih teh u, A kyhpachâna tlyzaw ta a daihpa a châ.

⁶ Tizy chô lâta alei a sohtuhpa hnohta alyna bie reih teh u, A kyhpachâna tlyzaw ta a daihpa a châ.

⁷ Khaihpa laipazy a taotuhpa hnohta alyna bie reih teh u, A kyhpachâna tlyzaw ta a daihpa a châ.

⁸ Nohchhô ryureituhpa noh a taotuhpa hnohta alyna bie reih teh u, A kyhpachâna tlyzaw ta a daihpa a châ.

⁹ Zâ ryureituhpa thlâpâ nata awhsizy a taotuhpa hnohta alyna bie reih teh u, A kyhpachâna tlyzaw ta a daihpa a châ.

¹⁰ Izi sawchapaw uhtheipa a thietuhpa hnohta alyna bie reih teh u, A kyhpachâna tlyzaw ta a daihpa a châ.

¹¹ Izi mo hry tawhta Izarei a chhi papuatuhpa hnohta alyna bie reih teh u, A kyhpachâna tlyzaw ta a daihpa a châ.

¹² Ku thatlôpa nata bâh pazawhpa ta Izarei a chhi papuatuhpa hnohta alyna bie reih teh u, A kyhpachâna tlyzaw ta a daihpa a châ.

¹³ Tilaipi Saihpa piah no ta a pachhaihtuhpa hnohta alyna bie reih teh u, A kyhpachâna tlyzaw ta a daihpa a châ.

¹⁴ Tilaipi Saihpa â pachhaihpa liata Izarei a chakasatuhpa hnohta alyna bie reih teh u, A kyhpachâna tlyzaw ta a daihpa a châ.

¹⁵ Phiraoh nata a pheisaihzy Tilaipi Saihpa liata a patlasatuhpa hnohta alyna bie reih teh u, A kyhpachâna tlyzaw ta a daihpa a châ.

¹⁶ Râhchawhpa liata a phopi a chhihthatuhpa hnohta alyna bie reih teh u, A kyhpachâna tlyzaw ta a daihpa a châ.

¹⁷ Bei rônahpazy a thietuhpa hnohta alyna bie reih teh u, A kyhpachâna tlyzaw ta a daihpa a châ.

¹⁸ Bei thatlôpazy a thietuhpa hnohta alyna bie reih teh u, A kyhpachâna tlyzaw ta a daihpa a châ.

¹⁹ Amawri bei Sihaw a thietuhpa hnohta alyna bie reih teh u, A kyhpachâna tlyzaw ta a daihpa a châ.

²⁰ Bâsanâ bei Ôkâ a thietuhpa hnohta alyna bie reih teh u, A kyhpachâna tlyzaw ta a daihpa a châ.

²¹ Bei thatlôpazy râh Izarei ryuto châta a pietuhpa hnohta alyna bie reih teh u, A kyhpachâna tlyzaw ta a daihpa a châ.

²² A chakaotuhpa hnohta bei thatlôpazy râh ryuto châta a pietuhpa hnohta alyna bie reih teh u, A kyhpachâna tlyzaw ta a daihpa a châ.

²³ Abeipa cha eima duahmo chhie nota miah a theituhpa châ ta, A kyhpachâna tlyzaw ta a daihpa a châ.

²⁴ Eima khakhaipazy tawhta miah pachhatuhpa châ ta, A kyhpachâna tlyzaw ta a daihpa a châ.

²⁵ Ano cha hmohrohneipa to niedo a pietuhpa châ ta, A kyhpachâna tlyzaw ta a daihpa a châ.

²⁶ Avâ Khazohpa hnohta alyna bie reih teh u, A kyhpachâna tlyzaw ta a daihpa a châ.