Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

HLAZY 135 - Mara Bible RV (BSI)


Tlyzaw BEIPA moh reithaina hla

1 Abeipa cha reithai teh u! Abeipa moh cha reithai u la, Hy Abeipa chakaotuhpazy saih u, Reithaina hlâ teh u.

2 Abeipa o liata a duahpazy saih u, Abeipa cha reithai u la; Eima Khazohpa o dôhpachhôh tlyhmia liata a duahpazy saih u, Abeipa cha reithai teh u!

3 Abeipa cha a phapa vâta, Abeipa cha reithai u la; A moh ngia ngaitapa vâta, A moh reithaipa ta sa teh u!

4 Abeipa ta ano châta Zakaw a tlyh ta, A ryuto châta Izarei cha â tlyh.

5 Abeipa cha a rônah tahpa pahno na ta, Eima Beipa cha khazoh zydua chô lâta a ypa a châ tahpa ei pahno.

6 Abeipa cha avâ nata alei liata a khopa maih tao tyh ta, Tilaipizy nata ti athupazy liata a khopa maih a tao tyh.

7 Khizaw kaokih chhâna taihta meihdozy a pachhohsapa chhao ano châ ta, Ano ta vâsua châta dôhlazy tao ta, A hmo sopakhyna ozy tawhta thlih a pathlisa tyh.

8 Izi râh liata sawchapaw uhtheipazy a thietuhpa kha ano châ ta, Chyhsa sawtuapa nata sahroh patawtuapazy a thie khai ha ei.

9 Hy Izi, ngiana nata hmonoâhpazy na chhôh liata vaw tuah ta, Phiraoh nata a chakaotuhpa zydua chô liata a vaw tuahtuhpa kha Abeipa a châ.

10 Râh hluhpi pahleipadiapa ta, Bei thatlôpazy thie ta,

11 Amawri bei Sihaw, Bâsanâ bei Ôkâ nata Kâna bei zydua a thietuhpa kha Abeipa a châ.

12 Ama râh cha ryuto châta Izarei pie ta, A phopi Izarei hnohta ama ryuto châta a pietuhpa kha Abeipa a châ.

13 Hy Abeipa, na moh cha tlyzaw ta y aw ta, Hy Abeipa, nâma atheithlâhna chhao a y kôzaw aw.

14 Abeipa ta a phopi cha thai pachâsa aw ta, A chakaotuhpazy chô liata zawngiahna a hnei aw.

15 Phopizy khazoh nothlahpazy cha tâkâ nata ngôh zy châ ei ta, Chyhsapa ku ta taopazy ama châ.

16 Pakahzy hnei ei ta, Reih pathlie thai veih ei; Mozy hnei ei ta, Hmô veih ei;

17 Nakhaohzy hnei ei ta, Thei veih ei; Ama pakah liata husona y hra vei.

18 Nothlahpa a taotuhpazy cha, Nothlahpa hawhta châ ei ta; Nothlahpa a ngâtuhpa zydua chhao, Nothlahpa hawhta ama châ.

19 Hy Izarei pathlazy saih u, Abeipa cha reithai teh u! Hy Arawna pathlazy saih u, Abeipa cha reithai teh u!

20 Hy Livai pathlazy saih u, Abeipa cha reithai teh u! Nâmo, Abeipa a chituhpazy saih u, Abeipa cha reithai teh u!

21 Abeipa cha Zaio tawhta reithaipa ta y sala, Zerusale liata a pahrâpa cha reithaipa ta y mawh sy! Abeipa cha reithai teh u!

The Bible Society of India

© 2023, Used by permission. All rights reserved.

Bible Society of India
ကြှနျုပျတို့နောကျလိုကျပါ:



ကြော်ငြာတွေ