HLAZY 132 - Mara Bible RV (BSI)

Abeipa atlyhpa Zaio Hla

 sâh lâ kiana hla

¹ Hy Abeipa, Dâvi khokhei awpa a thei la, A riethei taona zydua a thei mah y;

² Abeipa lâ bie a taih ta, Zakaw Thatlôpa lâta bie a taihpa ta,

³ “Ei o lâ a ngia leipa aw na ta, Ei rakhô lâ kiah hra leipa aw na ta,

⁴ Ei mozy paso pasaih leipa aw na ta, Ei mo vozy pabieh pasaih hra aw va na,

⁵ Abeipa châta su ei hmô hlâlei, Zakaw Thatlôpa pahrâ nawpa su ei hmô hlâlei cha,” A tahpa kha a thei thlâh ha mah y.

⁶ Cha bie cha Ephrâthâ liata thei pi ta, Ziari lyuzy liata eima hmô.

⁷ “A pahrâna su lâ vawh sih la, A pheitlyna thaby liata a bôh ei suh u!” eima tah.

⁸ Hy Abeipa, thyu la, Nâ pahâna su lâ vawh la, Na thatlôna Byh chhaota vawh mah y.

⁹ Na theihthaipazy siana ta a tobi ei sala, Na mopathaihpazy thaphapa ta rahao mawh ei sy.

¹⁰ Châ chakaotuhpa Dâvi zawhzi ta, Na sathawthupa hmia pakuasa khah y.

¹¹ Abeipa ta Dâvi hnohta hetana heta bie a taih ha ta, A bietai pathleih aw vei: “Na sathei pakha na beidyuchhai liata patyu aw na ta,

¹² Na sawzy ta ei biehrai zyhpa ta, Âmo ei pachu awpa ei bieraopazy ama zyh khiahta cha, Ama sawzy chhâzaw ta na beidyuchhai liata amâ tyuh lymâ aw.”

¹³ Abeipa ta Zaio a tlyh ta, A pahrâ nawpa su châta a khoh.

¹⁴ Abeipa ta hetana heta a tah: “He he chhâzaw ta ei pahâ nawpa su châ ta, He su he ei khopa a châpa vâta, He liata ei pahrâ aw.

¹⁵ A nie awpa byhnâ hluhpi pie aw na ta, Dyhchhiepazy cha viahchhâ ta ama lôhrâ ei patlô aw.

¹⁶ A theihthaipazy pachhana ta tobi aw ei na ta, A mopathaihpazy thaphapa ta ama rahao aw.

¹⁷ Cha liata Dâvi châta ki pathaosa aw na ta, Ei sathawthupa châta meiôh ei chhuanoh haw.

¹⁸ A chariahpazy nozana ta tobi aw ei na ta, Ano lakho deikua cha a khaih lymâ aw.”