HLAZY 129 - Mara Bible RV (BSI)Zaio khakhaipazy pahnie nawpa ta thlahchhâna  sâh lâ kiana hla 1 Tahmâ cha Izarei ta, “Ei thyutlia no tawhta ei hluhpi na pasasa ei ta, 2 A châ na, ei thyutlia no tawhta ei hluhpi na pasasa ei ta, Châhrasala na pahnie veih ei. 3 Leipalietuhpazy ta ei ky liata lei palie ei ta, Lei pathuana tlâh seihpa ama tao,” tah mawh sy! 4 Abeipa cha asiapa châ ta, Hmoparaopazy chaori a â pachhôtuhpa a châ. 5 Zaio a haotuhpa zydua cha, Maophyuhpa ta y ei sala, Hnôh pasysapa châ mawh ei sy! 6 A seih hlâta a uah ha tyhpa, Vâphuh liata sibiepa hawhta châ mawh ei sy. 7 Cha sibiepa cha sâh taituhpa ta a ku biena taihta chahu beih leipa ta, Sapiah chahrytuhpa ta a bâh biena taihta chahry beih hra vei. 8 Cha su a chapiapazy ta, “Abeipa byhnâ nama chô liata y mawh sy! Abeipa moh ta byhnâ eima cha awpa!” Tah beih hra veih ei. |