HLAZY 114 - Mara Bible RV (BSI)Zawpakhô Hla 1 Izi tawhta Izarei pua ta, Reih hropa phopi tawhta Zakaw pathla a pua nota, 2 Zudâh cha a supathaihpa châ ta, Izarei cha â beina râh a châ. 3 Tilaipi ta moh ta a râ ta, Zawdâh a hnawh lâ â lie. 4 Tlâhpizy ta mietaku tôhpazy hawhta châki zoh ei ta, Tlâhthlôhzy ta mietakutawzy hawhta châki ama zoh. 5 Hy tilaipi, khazia nâ râ haw? Hy Zawdâh, khazia na hnawh lâ nâ lie haw? 6 Hy tlâhpizy saih u, Khazia mietaku tôhpazy hawhta châki nama zoh? Hy tlâhthlôhzy saih u, Khazia mietakutawzy hawhta châki nama zoh? 7 Hy leilô, Abeipa hmiakô liata a chalyu la, Zakaw Khazohpa mohmô ta a chalyu teh. 8 Ano cha lôpanô tipo lâta a paliesatuhpa châ ta, Pachielô tihnawh lâta a paliesatuhpa a châ. |