HLAZY 112 - Mara Bible RV (BSI)

Mosiapa cha a chalyu beih aw vei

¹ Abeipa cha reithai teh u! Abeipa biepiepazy liata a ly ngaita ta, Ano a chipa cha a nohlao na!

² A chipathla cha râh pasaipha châ aw ta, Chyhsa dopa chhâ cha byhnâ ama to aw.

³ Sôh nata hneirôna zy a o liata y aw ta, A siana chhâzaw ta a y aw.

⁴ Chyhsa dopa châta cha, Zohna liata a y no chhao ta khaihna a vaw pua tyh; Abeipa cha ngiachhiena nata zawngiahna a hneipa châ ta, Khazohpa siapa a châ.

⁵ Chyhsa riaphapa nata a sôh dyu a pacheisapa cha, Phana ta vaoheipa châ ta, Adona ta rai a hriapa chhao, Phana ta vaoheipa a châ.

⁶ Mosiapa cha a chalyu beih leipa aw ta, Chhâzaw ta a thei thlâhpa a châ aw.

⁷ Thâtih chhiepa ta a thlah pazo leipa ta, Abeipa ngâ ta, a palôh â i lymâ.

⁸ A palôh a i ta, Pahniena ta a khakhaipazy a moh hlâlei cha, A thlazoh aw vei.

⁹ A sôh nata piahzy a saipa ta rai ta, Dyhchhiepazy a pie tyh; A siana chhâzaw ta y aw ta, A ki palyupalih ta cheihchalopa a châ aw.

¹⁰ Moleipa ta cha cha hmô aw ta, A hie a hâh ngaita aw; A hâh charieh aw ta, A zao khai ha haw; Moleipa khona cha a leidia aw.