HLAZY 111 - Mara Bible RV (BSI)

A hmotao rônahpazy vâta Abeipa reithaina

¹ Abeipa cha reithai teh u! Adopa sahlaozy apakhyna liata, Ei palôh tlokhuh ta Abeipa lâ alyna bie ei hlâ aw.

² Abeipa hmotaopazy cha rônah ta, A hmotaopazy chô liata a lypazy ta, A hmotaopazy kyh amâ chu tyh.

³ A hmotaopa cha ângiana nata rônahna ta bie ta, A siana cha tlyzaw taihta a daihpa a châ.

⁴ Hmonoâhpa a taopazy cha khâ a thei thlâh awpa ta tao ta, Abeipa cha ngiachhiena nata zawngiahna a hneipa a châ.

⁵ Ano a chituhpazy hnohta nie awpa pie ta, A biehrai chhâzaw ta â thei thlâh haw.

⁶ A hmotaopazy hmotaotheizie a phopi hnohta palâsa ta, Phopizy ryuto râh cha âmo a pie ei.

⁷ A ku raihriazy ngâchhihpa nata adopa châ ta, A pachuna zydua ngâ tlâhpa a châ.

⁸ Chazy cha chhâzaw nata tlyzaw châta pa-ipa châ ta, Ngâchhihna nata adona ta hria awpa a châ.

⁹ A phopi hnohta chatlaina vaw tuah ta, Tlyzaw châta a biehrai a pie. A moh cha Pathaihpa nata Zachhihpa a châ.

¹⁰ Abeipa china cha sona athaona châ ta, Abeipa a chituhpa zydua ta novâhna ama hnei. Abeipa cha tlyzaw ta reithaipa ta y mawh sy!