HLAZY 108 - Mara Bible RV (BSI)

Khazohpa eima riahphana

Dâvi Hla

¹ Hy Khazohpa, ei palôh a i ta, Hla sapa ta ei hro â ly aw.

² Hy totâ nata tlaipih y, a hra teh u! Kei ta khihdeipa ei pahra aw!

³ Hy Abeipa, phopizy hry liata alyna bie cha hlâ aw na ta, Râhzy hry liata na reithaina hla ei sa aw.

⁴ Na kyhpachâna tleih beih leipa ta avâzy kaw daih ta, Na ngâchhihna ta meihdozy a kaw tlô.

⁵ Hy Khazohpa, avâzy chô lâta cheihchalopa ta y la, Na rônahna leilô zydua bie mawh sy!

⁶ Chatanachata na kyhpachâpazy pabohsapa ta eima y aw, Na ku chachâh lâta na pachha la, Nâ chhy mah y!

⁷ Khazohpa ta a su pathaihpa tawhta hetana heta a tah: “Thaphapa ta Sekhe Khihpi pachhaih aw na ta, Sukô Saikao ei rairuah aw.

⁸ Kilia cha kei eih châ ta, Manase chhao kei eih a châ; Epharai cha ei lakhu châ ta, Zudâh cha ei ryureina chôchahrei a châ.

⁹ Môabâ cha ei ku asina rahô châ ta, Edômâ cha ei pheiky sona a châ; Philistia chô liata pahniena hladyuh ei pathluah.”

¹⁰ Ahy ma thokhy khihpi lâ nâ chhi aw? Ahy ma Edômâ lâ nâ chhihtha aw?

¹¹ Hy Khazohpa, miah dytha ha va chi ma? Hy Khazohpa, eima pheisaihzy hnohta na sie khao vei he zaw!

¹² Khakhaipazy a dyuh awpa ta miah bao mah y, Chyhsapa pachhana cha hraoleipa a châ.

¹³ Khazohpa chhaota riahphapa ta a dyuh aw pi ta, Ano tlai ta eima chariahpazy a tlypâ aw.