HLAZY 107 - Mara Bible RV (BSI)

BU PANGAWHNA ( Hla 107—150 ) Abeipa pabohsana reithaina

¹ Abeipa cha pha ta, A kyhpachâna tlyzaw ta a tleih beih leipa a châpa vâta, Alyna bie hlâ teh u!

² Cha kyh cha Abeipa chatlaipazy ta reih ei sala, Khakhaipa tawhta a chatlaipazy ta reih mawh ei sy!

³ Nochhi, notla, maw nata chho, Râh to tawhta a awpakhypazy ta, Abeipa phana kyh cha reih mawh ei sy.

⁴ Thokha râhchawhpa nata râh raohpa liata viavi ei ta, Pahrâ nawpa khihpi lâpi hmô thei veih ei.

⁵ Nodi dâhphipa ta y ei ta, Ama hro a panao khai haw.

⁶ Chatawhcha nôpopa ta Abeipa pado ei ta, Abeipa ta pachârôhna tawhta a pachha ei.

⁷ Lâdy lâta âmo cha a chhi ta, Pahrâ nawpa khihpi ama tlô hlâlei â chhi ei.

⁸ A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

⁹ Ano cha hro dâhphina papaituhpa châ ta, Hmo phapazy ta hro nodipa rih a pabie tyh.

¹⁰ Thokha cha zohna nata thina nohpahli liata a tyuh ei ta, Pasataopa nata thua ta chahrypa ta patâhpazy ama châ.

¹¹ Khazohpa bie chakhia ei ta, Chônôchaipa ryhraona khâpasaw ta ama rei leipa vâta a châ.

¹² Ama palôhzy cha Abeipa ta hriapasana ta panawhsa ta, Pao ei ta, âmo a bao awpa y veih ei.

¹³ Chatawhcha nôpopa ta Abeipa pado ei ta, Abeipa ta ama pachârôhna tawhta a pachha ei.

¹⁴ Zohna nata thina nohpahli tawhta âmo cha a chhi papua ta, Ama chahrynazy a chhiepa ei.

¹⁵ A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

¹⁶ Abeipa ta dawh ochhizy parao ta, Thua ochhi lâhreizy a thlie pachhô.

¹⁷ Thokha cha hru kawpa ta moleina lâpizy a chhih ei ta, Ama paraonazy vâta pasataopa ta ama y.

¹⁸ Ama hro ta niedopa to pasi ta, Thina chhikao amâ hnia via lymâ.

¹⁹ Nôpopa ta Abeipa pado ei ta, Abeipa ta ama pachârôhna tawhta a pachha ei.

²⁰ A bie tuapa ta âmo patlâh ta, Ama leidia awpa tawhta a pachha ei.

²¹ A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy.

²² Alyna biereina atheihnazy hlâ ei sala, Alyna hlazy ta a hmotaopazy chho mawh ei sy!

²³ Thokha cha tilaipi lâ balyh ta zu ei ta, Ti lai ngaitapa chô liata rai ama hria tyh.

²⁴ Abeipa hmotaopazy hmô ei ta, Ti athupa liata a hmotao noâhpazy ama hmô.

²⁵ Abeipa ta biepie ta thlihpipa pathlisa ta, Tichatlaopazy a pasâhsa tyh.

²⁶ Avâ lâ kiah ei ta, Âthupa lâ chô heih ei ta; Nôpona vâta ama riahphana a lei khai ha tyh.

²⁷ Sahma paripa hawhta paochheichhâ ei ta, Yzia nawpa rai pahno veih ei.

²⁸ Nôpopa ta Abeipa pado ei ta, Abeipa ta ama pachârôhna tawhta a pachha ei.

²⁹ Thlihpipa cha chalihsa ta, Tichatlaopazy sidiapa ta ama y.

³⁰ Tizy sidiapa ta ama y hapa vâta a ly ei ta, Ama khopa balyh apahâna su a tlôkhei ei.

³¹ A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

³² Phopi pakhypi liata ano cha reithai ei sala, Machâzy pakhypi liata ano cha reithai mawh ei sy.

³³ Chavahzy râhchawhpa pachâsa ta, Tihnawhzy chhaohlei chawhkaraipa pachâsapa ta,

³⁴ Râh phapa chhao râh chhiepa a pachâsa haw, A chhôh liata a pahrâpazy paraona vâta.

³⁵ Râhchawhpa tipo lâta pachâsa ta, Chhaohlei hipa tihnawhzy lâta a pachâsa tyh.

³⁶ Cha liata nodipazy pahrâsa ta. Pahrâ nawpa khihpi ama padua.

³⁷ Lyuzy liata chizy cheipa ta kre zôhzy loh ei ta, Kôvei phapazy ama hmô tyh.

³⁸ Abeipa byhnâ vâta thata pôh ei ta, Ama sahrohzy a chokua awpa pasaih vei.

³⁹ Tlybaina, moleina nata pachârôhnazy vâta, Pasysa viapa nata panawhpa ta ama y tita,

⁴⁰ Ama chhituhpazy chô liata mohnaona lei thlu ta, Lâpi y leina râhchawhpa liata a paviavisa ei.

⁴¹ Dyhchhiepazy deikua cha ama pasataona tawhta pachha ta, Sahroh hri hawhta ama chhôhkhazy a papôhsa.

⁴² Chyhsa dopazy ta cha cha hmô ei ta, Amâ ly ngaita; Hmoparaozy deikua cha, Ama pakah amâ chahu.

⁴³ Chyhsa sopa maihta cha hmozy cha ngia ei sala, Abeipa kyhpachâna tleih beih leipa kyh pachâ tyh mawh ei sy.