HLAZY 106 - Mara Bible RV (BSI)

Abeipa phana vâta alyna bie reina

¹ Abeipa cha reithai u la, Alyna bie hlâ teh u! Ano cha pha ta, A kyhpachâna a tleih beih leipa a châ.

² Ahy ma Abeipa hmotao rônahpazy reih thei ta, A reithaina zydua a phuah thei aw?

³ Adona a duakheipazy cha nohlao ei ta, Khatino rai ta a siapa ta hmo a taopazy ama nohlao tyh.

⁴ Hy Abeipa, na phopi na khokhei tita nâ thei la, Na pachha ti ei ta na bao mah y.

⁵ Chatanachata nâ tlyhpazy byhnâ topa to hra aw na ta, Na phopi thaphana liata a lypa ta, Na ryuto rônahna liata ei hlao hra aw.

⁶ Keimo nata miah pathlatuhpazy ta molei ha pi ta, Hmo pha leipa taopa ta hmo eima vaw parao haw.

⁷ Miah pathlatuhpazy Izi râh liata ama y no kha, Na hmotao noâhpazy pachâ veih ei; Na kyhpachâna rônahpa a thei leipa ei ta, Tilaipi liata cha chakhia ei ta, Tilaipi Saihpa liata ama cha chakhia.

⁸ Chatanachôta a moh vâta âmo cha pachha pyly ta, A hmotaotheina rônahpa a pahnosa ei.

⁹ Tilaipi Saihpa rapa ta pakua ta, Râhchawhpa liata siepa hawhta, Ti athupa kuapa liata a siekhei ei.

¹⁰ Ama khakhaipa ku tawhta âmo cha pachha ta, Ama chariahpazy hmotaotheina tawhta a chatlai ei.

¹¹ Tizy ta ama khakhaipazy vao ta, Pakha hmah pahlôhpa châ veih ei.

¹² Chatawhcha a biezy zo ei ta, Ano reithaina hla ama sa.

¹³ Châhrasala a hmotaopazy cha thlai my ei ta, A ryhraona hâ khao veih ei.

¹⁴ Râhchawhpa liata ama aoh thata zoh ta, Râh raohpa liata Khazohpa ama pasia.

¹⁵ Ama hiapa cha pie ta, Châhrasala ama hry liata chaohna hri a chareisa.

¹⁶ Riehmo liata ama y nota, Mawsi chô liata ama hiatlia ta; Abeipa chyhsa pathaihpa Arawna chô liata chhao, Ama hia a tlia.

¹⁷ Alei a vaw pahypa ta Dâthâ cha palâ ta, Abirâ pyzy a vao ha ei.

¹⁸ Ama hry liata mei vaw pua ta, Meipaleih ta hmoparaopazy a kâsao ha ei.

¹⁹ Hôribâ tlâh liata viahchaotaw nothlahpa tao ei ta, Nothlah leihpa cha amâ chhy.

²⁰ Chatanachata ama rônahna cha, Sibie a bâpa viahchao tôhpa nothlahpa nata ama ri haw.

²¹ Âmo pachhatuhpa Khazohpa my ei ta, Izi râh liata hmo rônahpazy a taotuhpa kha ama my haw.

²² Hamâ râh liata hmonoâhpazy a taotuhpa my ei ta, Tilaipi Saihpa kiah liata hmo rarôh ypazy taotuhpa kha ama my haw.

²³ Chavâta âmo cha pahleipadia a chhuah ta, A hiehâhna pakuasa awpa ta, A chyhsa atlyhpa Mawsi ta, Âmo nata Khazohpa likawh liata a duah vei mawh sala, A pahleipadia khai ha aw ei.

²⁴ Râh khochhihpa dytha ei ta, A bietai zo khao veih ei.

²⁵ Ama poh ozy liata paphôh ei ta, Abeipa ao nathlie khoh veih ei.

²⁶ Chavâta a ku chalopa ta âmo cha bie a taih ta, Râhchawhpa liata a papaosa awpa kyh a chho ei.

²⁷ Ama chipathlazy cha phopizy hry liata papaosa aw ta, Râh to liata a hiepatla awpa kyh chhao a chho ei.

²⁸ Bâlâ-peô a chhy ei ta, Athipa lâta hlâpa atheihna sazy ama nie.

²⁹ Ama hmotaopazy ta Abeipa cha a hie pahâh ei ta, Ama hry liata potlana a vaw tlô.

³⁰ Phinehâ a duah ta a liah vaw tla ta, Potlana cha papaipa a châ.

³¹ Cha cha chhâzaw nata tlyzaw ta, A siana ta raopa a châ.

³² Meribâ tizy liata Abeipa hie pahâh ei ta, Âmo vâta Mawsi chô liata hmo phaleipa vaw tlô ta;

³³ A thlahpa pachâ ama parôhsapa vâta, A hmao ta palôh charâpa ta bie a rei hapa kha a châ.

³⁴ Abeipa ta âmo bie a piepa hawhta, Phopizy pahleipadia leipa ei ta,

³⁵ Râh hropazy nata a pahlao ei ta, Ama hmotaozie hâ amâ la.

³⁶ Ama khazoh nothlahpazy chakao ei ta, Cha cha âmo châta khoheih lâta â lie haw.

³⁷ Ama sawchapawzy nata ama sawchanôzy Ahripazy lâta atheihna ta ama hlâ tyh.

³⁸ Paraona a hnei leipa thisaih palo ei ta, Ama sawchapawzy nata sawchanôzy thisaih palopa ta, Kâna khazoh nothlahpazy lâ amâ theih tyh; Chavâta râh cha thisaih ta papuapaleipa ta a y.

³⁹ Ama hmotaopazy vâta pathaih leipa châ ei ta, Ama hmotaopazy liata sihryhpa ama vaw châ haw.

⁴⁰ Chavâta Abeipa pathi cha a phopi chô liata thata ia ta, A ryuto a pasi ngaita.

⁴¹ Âmo cha phopizy ku liata pie ta, Âmo a haotuhpazy ta ama chô liata ryureih awpa ta a pie ha ei.

⁴² Ama chariahpazy ta tlybai ei ta, Ama chariahpazy biehneina ry liata sopa ama châ.

⁴³ Ei hluhpi âmo cha pachha ta, Châhrasala Abeipa chakhia awpa tlao a chhuah ha ei ta, Ama paraona vâta panawhpa ta ama y haw.

⁴⁴ Chatahrasala ano ama padona ao a thei nahta, Ama nôpona cha a pachâ heih tyh.

⁴⁵ Ama hnohta a biehrai a thei heih tyh ta, A kyhpachâna tleih beih leipa rônah ngaitapa vâta, A palôh a panano heih tyh.

⁴⁶ Sei ta âmo a chhituhpazy cha, Âmo a pangiachhiesa ei.

⁴⁷ Hy Abeipa eima Khazohpa, Miah pachha la, Râh to tawhta miah pakhy heih mah y; Chatanachata na moh pathaihpa chô liata alyna bie reih aw pi ta, Na moh reithaipa ta eima cha parônahsa aw.

⁴⁸ Abeipa, Izarei Khazohpa cha, Chhâzaw nata tlyzaw ta reithaipa ta y mawh sy! Chyhsa zydua ta, “Amen!” tah mawh ei sy! Abeipa cha reithai teh u!