Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

HLAZY 104 - Mara Bible RV (BSI)


Taotuh Khazohpa reithaina

1 Hy ei thlahpa, Abeipa cha reithai mah y! Hy Abeipa ei Khazohpa, na rônah ngaita kaw dia! Rônahna nata abeina zy ta a tobipa ta,

2 Khaihna cha poh hawhta a bu chi ta, Avâzy khi poh o hawhta na parai.

3 Tizy chô liata na chhôhpadâhpa khâpiazy pakhâh chi ta, Meihdozy khi na talailih ta taopa ta, Thlih mathlawzy chô liata na kiah tyh.

4 Thlihzy cha na lyuhchâpazy ta hmâh chi ta, Meipaleih cha châ chakaotuhpazy ta na hmâh tyh.

5 Alei he â bôna chô liata padua chi ta, Pasiepa châ beih aw vei.

6 Alei cha chysia hawhta ti athupa ta khu chi ta, Tlâhpizy cha tizy ta a vao haw.

7 Na rapa vâta tizy a râ ei ta, Na tôkalôhpa pyu vâta rawrôhpa ta amâ râ haw.

8 Tlâhpizy lâ kiah ei ta, Saikaozy lâ chôpa ta, Âmo châta na raopa su lâ ama pangai.

9 Alei ama vao heih khao lei nawpa ta, Ama khô lei awpa râhri na pakhâh.

10 Saikaozy liata tihnawh papua chi ta, Tlâhzy likawh liata loh ei ta;

11 Râhsazy châta do awpa ti châ ta, Râh alâzy ama dâhphi a pai tyh.

12 A kiahzy liata vâ pavawzy pahrâ ei ta, Thobuhzy hry liata hla ama sa tyh.

13 Na pahrâna su sâhpa tawhta tlâhpizy ti bao chi ta, Alei cha na hriana thei ta lôhrâtlôpa ta a y.

14 Sahrohzy châta sibiepa papyusa chi ta, Chyhsapa chhei awpa ta chicheipa papyusapa ta, Alei tawhta nie awpa na papua.

15 Chyhsa palôh palysa nawpa ta kresawhti papua chi ta, A hmia patliena châta sathaw papuapa ta, Chyhsa palôh thapatlô nawpa ta viahchhâ na papua.

16 Abeipa thozy cha ti hmô pha kaw ei ta, Lebanaw sidy tho a lopazy chhao ti ama hmô pha kaw.

17 Cha thozy liata pavawzy ama bu râ ei ta, Vawpôzy ta meisah thozy liata o ama hnei.

18 Tlâh sâhpazy cha sathawhzy tlaihna châ ta, Lôkhaohzy cha pazutâbalâpazy achhaina a châ.

19 Sao nata chhiah ngiana châta thlâpâ tao chi ta, Noh ta a tla nawpa daihti a pahno.

20 Zohna tao chi ta, Zâ vaw châ ta; Râhsa to ama vaw pua tyh.

21 Chakeibarôhneipa lochopazy sa tai awpa ta a rôh ei ta, Khazohpa ta nie awpa a piepazy ama tlua tyh.

22 Noh a vaw chhi nahta a di ei ta, Ama lôpuzy liata amâ byu tyh.

23 Chyhsapa cha a rai lâ pua ta, Zâlâ taih hriapasa awpa ta a pua tyh.

24 Hy Abeipa, na hmotaopazy a hluh kaw dia! So kawpa ta na taopa sai châ ei ta, Leilô he na hmotaopazy ta a bie.

25 Tilaipa laipa nata kawhpa tao chi ta, Cha liata sa nata nga rei tiah lei y ei ta, Hmohrohneipa laipa nata chyhpa to ama y.

26 Tilaipi chô liana cha balyhzy sie ei ta, A chhôh liata palao awpa ta na taopa Leviathâ chhao a y.

27 A sao a chhiah ta nie awpa pie awpa ta, Cha zydua chata ama cha mokhâh tyh.

28 Âmo cha nie awpa pie chi ta, A huah ei ta; Na ku pakai chi ta, Hmo phapazy ta ama lôhrâ na patlô tyh.

29 Na hmia nyu chi ta, Thlazohpa ta y ei ta; Ama husona la chi ta, Thi ei ta dohlei lâta ama kua heih tyh.

30 Na Thlahpa tuah chi ta, Âmo cha paysapa châ ei ta, Chhaohlei hmia na pathieh heih tyh.

31 Abeipa rônahna cha tlyzaw ta y sala, Abeipa cha a hmotaopazy liata a ly mawh sy.

32 Ano cha alei he moh ta, Chalyusa ta; Tlâhpizy hria ta, A khuh a pakhusapa a châ.

33 Ei hro chhôh zydua ta, Abeipa lâ hla sa aw na ta; Hrona ei hnei chhôh heta, Khazohpa reithaina hla ei sa aw.

34 Ei pachâna ta Abeipa palysa mawh sy, Abeipa liata ei ly aw.

35 Moleipazy cha alei tawhta pahleipadiapa châ ei sala, Hmoparaopazy cha y khao khah ei sy! Hy ei thlahpa, Abeipa cha reithai mah y! Abeipa cha reithai teh u!

The Bible Society of India

© 2023, Used by permission. All rights reserved.

Bible Society of India
ကြှနျုပျတို့နောကျလိုကျပါ:



ကြော်ငြာတွေ