HEBRAI 9 - Mara Bible RV (BSI)

Lei su pathaihpa

¹ Biehrai hmiatuapa chhao khata Khazohpa achhyna siekheizie nata lei liata supathaihpazy a hnei.

² Achhyna byureih sa ei ta, a chhôh tytuapa liata meiôh sona nata tlâhkhai nata Ypâna Viahchhâ sonazy y ta, cha cha Su Pathaihpa tahpa a châ.

³ Pohraipa mianona khô liata chhôhpadâhpa cha Su Pathaih Chaipa tahpa a châ.

⁴ Cha liata ropahâhpa raona ngôh maisâh nata ngôh ta pahupa biehrai byh y ta, biehrai byh chhôh liata mânâ yna ngôh beih, Arawna chôchahrei chhyh thaopa nata biehrai lôphiazy a y.

⁵ A chô lâta cherubi rônahpazy y ei ta, chazy chata zawngiahna dyuchhai ama khu. Cha kyhzy cha tahmâ â kipa ta reih thei mâh ma pi.

⁶ Cha hawhta ato pachhuahpanohpa a châ khai tawhta, theihthaipazy cha ama chakaona rai hria awpa ta, byureih tytuapa lâ cha noh chareih amâ ngia tyh.

⁷ Byureih chhôh chaipa lâ deikua cha, theihthai beichaipa deita ta kô kha ta ei kha a ngia tyh ta, thisaih a chei leipa ta â ngia awpa châ vei. Cha thisaih cha ano châta nata zawpizy ta pahno leipa ta ama moleinazy atheihna châta a hlâ tyh.

⁸ Cha hmo paryhzie tawhna chata Thlahpa Pathaihpa ta he he a pahnosa: Achhyna byureih tytuapa â dua chhôh cha, Su Pathaih Chaipa liata angiana lâpi pahypa châ mâh vei.

⁹ Cha cha tahmâhlâ daihti châta pamosana a châ. Cha hmo paryhzie liata cha, hmopiepa nata atheihna hlâ tyhpazy heta achhytuhpa chhie nata pha pahnona pahro thei vei.

¹⁰ Hmopiepa nata atheihnazy cha niedozy nata apasipathaina nanopazy kyh deita châ ei ta, sapa lâ ryhpa, taopathina daihti tlô hlâta hmâ awpa ryhpazy deita ama châ.

Krista thisaih vâta chatlaina

¹¹ Krista deikua cha, hmo phapa a vaw tlôpazy châta theihthai beichaipa ta â vy nota, achhyna byureih rônah viapa nata paki viapa siepahliepa ta a vy ta, cha cha ku ta sa leipa, he hmotaopazy hry liata a hlao leipa a châ.

¹² Su Pathaih Chaipa lâ cha chhâzaw châta ei kha a ngia ta, miezy nata viahchaotawzy thisaih ta châ leipa ta, ano thisaih ta chhâzaw chatlaina a tao haw.

¹³ Chyhsa pathaih leipazy chô liata mie nata viahchao tôhpazy thisaih nata viahchao zeinô raona paohpazy thiapa hmahta sapa pathaihna taihta a pathaisa thei khiahta cha,

¹⁴ chhâzaw Thlahpa zawhzi ta, seina hnei leipa ta Khazohpa lâ anosasy ta a hlâtuhpa thisaih chhochhi ta cha, eima chhie nata pha pahnona cha hmotaopa thipa tawhta Khazohpa hrohpa chakaona lâta a pathaisa via pachai aw dia!

¹⁵ Chavâta Krista cha biehrai thiehpa lyuhchâpa a châ. Biehrai hmiatuapa ry liata paraonazy chatlai nawpa ta Krista cha thi ta, chatanachata awpazy ta chhâzaw ryu to awpa bietai cha ama to thei aw.

¹⁶ Bieryuhipa hawhta tao awpa ta, ryuhituhpa cha a thi ha tlai tahpa pasia ha tua awpa a byuh.

¹⁷ Bieryuhipa cha ryuhituhpa a thi tawh deita ta hmâ theipa a châ. Ryuhituhpa a hro chhôh ta cha hmâ theipa châ mâh vei.

¹⁸ Chavâta biehrai hmiatuapa chhao kha, thisaih leipa ta cha pa-i theipa châ vei.

¹⁹ Mawsi ta ryhpa biepiepa to zawpi zydua hnohta a phuah nona kha, viahchaotaw thisaih, mie thisaih, ti, sahmi pala saihdôhpa nata hisaw zy la ta, ryhpa châbu nata zawpi zydua thia ta,

²⁰ “He he nama zyh awpa ta Khazohpa biepiepa biehrai thisaih a châ,” tah ta.

²¹ Cha hawhna chata achhyna byureih nata chakaona hmobaoh zydua chhao thisaih ta a thia khai.

²² Hmeiseihta ta, ryhpa ry liata cha, ato zydua thisaih ta pathaisapa châ ta, thisaih palo leipa ta molei ngiahthaina rai y vei.

Krista atheihna ta moleina a pahlei

²³ Chavâta vârâh hmo a lyupazy hmahta atheihnazy ta pathaisa awpa a byuh khiahta cha, vârâh hmo hmeiseihpazy chhochhi cha, chazy hlâta atheihna pha via syulyupa ta pathaisapa ta a y awpa rai a châ.

²⁴ Krista cha a hmeiseihpa a lyupa ta taopa, ku ta sapa Su Pathaih Chaipa liata a ngia leipa ta, eima vyuhpa ta Khazohpa hmiakô liata a luah awpa ta, tahmâ vârâh liata â ngia hapa a châ.

²⁵ Theihthai beichaipa cha kô chareih ano thisaih a châ leipa thisaih a cheipa ta Su Pathaih Chaipa liata a ngia tyh ta, Krista deikua cha â hlâ chanei ngâ thlâh ha awpa a ngiah vei.

²⁶ Cha hawhta châ leipa sala, leilô y tua no tawhta pasa a tao chanei ngâ thlâh ha aw. Châhrasala daihti chhâna lâ liata, chhâzaw châta ei kha a vaw luah ta, anosasyh ta atheihna ta a hlâpa ta moleina a pahlei haw.

²⁷ Chyhsapa châta ei kha thi raopa châ ta, cha hnôhlâ ta pachiana a y aw.

²⁸ Cha hawhna chata Krista chhao chyhsa hluhpi moleinazy siekhei awpa ta ei kha hlâpa ta y ta, a einona ta â vaw luah tita deikua cha, moleina siekhei awpa châ khao leipa aw ta, ngiatiah lei ta ano hâtuhpazy pachha awpa ta â vaw luah aw.