HEBRAI 7 - Mara Bible RV (BSI)

Melkizade theihthaina raihria

¹ Cha Melkizade, Salem bei nata Khazohpa Chônôchaipa theihthaipa chata, abeizy a thie khai tawhta â vaw liepa Abarahâ cha kei dy ta, byhnâ awpa ta,

² Abarahâ ta a hraona sôh zydua tawhta su hrawh su kha a hnohta a pie. Melkizade cha a moh yzie tawhta siana bei châ tua ta, hnôhlâ ta Salem bei tahpa a châ. Salem bei tahpa cha adyhna bei tahna a châ.

³ Ano cha paw hnei leipa ta, nô hnei hra leipa ta, pathlatuhpa alaichadai awpa hnei vei. Âthaona noh nata a hro chhâna nohzy rei awpa hnei hra leipa ta, Khazohpa Sawchapawpa lyupa ta taopa châ ta, chhâzaw ta theihthaipa ta a ypa a châ.

⁴ Cha chyhsa rônahzie cha pachâ tua u! Pathlatuhpa Abarahâ chhao khata hraona sôh tawhta su hrawh su kha a piepa kha a châ.

⁵ Livai pathlazy hry liata theihthaipa raihria a topa maih cha, ryhpa hawhta chyhsazy tawhta su hrawh su kha la awpa ta biepiepa ama châ. Cha chyhsazy cha Abarahâ pathla ama unawhzy châ ei ta, âmo tawhta su hrawh su kha ama la tyh.

⁶ He chyhsa deikua he cha, ama phoheih a châ hra leipa chhao ta, Abarahâ tawhta su hrawh su kha dao ta, bietaizy a hneituhpa cha byhnâ a awpa.

⁷ Rônah viapa ta a nawh viapa châta byhnâ a awpa tyhpa kyh cha, reipasipasua thei rimâ awpa châ vei.

⁸ Kyh kha liata cha, chyhsa thi theipazy hnohta su hrawh su kha piepa châ ta, kyh hropa liata deikua cha, hroh thlâhpa a châ tahpa pahnokheipa hnohta su hrawh su kha piepa a châ.

⁹ Su hrawh su kha a la tyhpa Livai tlai chhao kha, Abarahâ siepahliepa ta su hrawh su kha a pie hrapa hawhta pachâ theipa a châ.

¹⁰ Melkizade ta Abarahâ a vaw dy nona kha, Livai cha ano pathlatuhpa Abarahâ thisaih liata a y hapa a châ.

Zisu nata Melkizade

¹¹ Livai pathlazy theihthaina raihria ry liata chyhsazy ta ryhpa dao ei ta, cha Livai pathlazy theihthaipa châna tawhta pakina hmô theipa a châ khiahta cha, Melkizade theihthaipa châna lâpi a chhihpa ta theihthaipa hropa a vaw y awpa cha khazia â ngiah khao aw? Arawna theihthaipa châna lâpi a chhihpa ta rao awpa châ vei ma?

¹² Theihthaipa raihria siezie pananopa a châ khiahta cha, ryhpa chhao panano awpa a byuh tyh.

¹³ A thâtih eima reipa he chihropa châ ta, cha chi tawhta ahy hmah maisâh liata chakao beih veih ei.

¹⁴ Eima Beipa cha Zudâh chi tawhta a vaw puapa a châzie pahnopasiapa châ ta, cha chi nata a zaopa ta Mawsi ta theihthaipazy kyh khâpa hmah reih vei.

¹⁵ Melkizade hawhpa theihthai hropa a vaw y nahta, cha kyh cha a sia via rili.

¹⁶ Ano cha sapa chipathla liata a pahniehpa ryhpa hawhta theihthaipa ta raopa châ leipa ta, hro chhâna hnei leipa hmotaotheina hmâpa ta theihthaipa ta raopa a châ.

¹⁷ Chavâta ano kyh liata, “Melkizade theihthaipa châna lâpi a chhihpa ta, Chhâzaw ta theihthaipa na châ,” tahpa ta pahnokheipa a châ.

¹⁸ Biepiepa hmiatuapa cha, chiehleina nata phahnai leina a hneipa vâta hnypa a châ.

¹⁹ Ryhpa bie ta khâpa hmah pakisa thei vei. Hnabeiseihna pha viapa vaw tlô ta, cha hnabeiseihna vâna chata Khazohpa eimâ hnia thei haw.

²⁰ Melkizade theihthaipa châna lâpi a chhihpa ta theihthaipa a châpa Abeipa cha, bietai a hlao leipa ta theihthaipa ta raopa châ vei.

²¹ Kha hlâta theihthaipa a vaw châ tyhpazy kha, bietai tao leipa ta theihthaipa a vaw châ tyhpazy châ ei ta, he theihthaipa deikua he cha, “Abeipa ta bie a taih ha ta, A palôh panano aw vei, ‘Chhâzaw theihthaipa na châ,’” tahpa ta a hnohta bie a reituhpa bietai ta theihthaipa ta raopa a châ.

²² Cha bietai vâna chata Zisu cha biehrai pha viapa pa-ituhpa a vaw châ haw.

²³ Theihthaipazy cha thina vâta ama raihria ama pazao lymâ thei leipa vâta, theihthai hmiatuapazy maluh ama hluh ngaita.

²⁴ Zisu deikua cha, chhâzaw ta a hrohpa a châpa vâta, a thla beih leipa, chhâzaw theihthaipa a châ.

²⁵ Zisu cha chyhsazy châta thlahchhâ awpa ta chhâzaw ta a hroh thlâhpa a châpa vâta, ano siepahliepa ta Khazohpa a pangaipazy cha, khatino rai ta a pachha thei ei.

²⁶ Cha hawhpa theihthai beichaipa, pathaihpa, palôh phapa, apuapa a bai leipa, moleipazy tawhta pananopa nata avâzy chô lâta cheihchalopa eima hnei awpa cha â ngiahpa rai a châ.

²⁷ Ano cha theihthai beichaipa hropazy hawhta, noh chareih ta ano moleinazy châta atheihna hlâ tuapa ta, cha khai tawhta chyhsazy moleina châta atheihna a hlâ chanei ngâ thlâh awpa byuh vei. Anosasyh ta chhâzaw châta ei kha â hlâna liata a pangoh khai haw.

²⁸ Ryhpa ta chiehleina a hneipa chyhsazy cha theihthai beichaipa ta rao tyh ta, ryhpa a y khai tawhta a vaw ypa bietai bie deikua ta cha, chhâzaw châta pakipa ta taopa Sawchapawpa cha theihthai beichaipa ta a rao haw.