HEBRAI 6 - Mara Bible RV (BSI)

Pitlohna lâ pangaina

¹ Chavâta Krista thâtih pachu pathaonazy tawhta laiseih lymâpa ta, pitlohna lâ pangai ei suh u. Hmotao thipazy liata rona lôbôzy bô chanei leipa ta, Khazohpa ngiapâna,

² bâtina, ku pahniehna, athihpa thyuheihna nata chhâzaw pachiana thâtih pachu pathaonazy liata y khao khah ei suh u.

³ Khazohpa ta â ryh a tah khiahta cha, cha cha eima tao aw.

⁴ Ei kha nopavâhpa ta y ha ta, vârâh hmopiepa padi ta, Thlahpa Pathaihpa raihria liata a hlao ha ta,

⁵ Khazohpa bie phana padi ta, daihti vaw y awpa liata hmotaotheina padi ha tawh chhao ta,

⁶ ama paosai heihpa khiahta cha, ama rao nawpa ta Khazohpa Sawchapawpa a khaipâ chanei heihpa nata maoh a paphyuhtuhpazy ama châpa vâta, cha hawhpa chyhsazy rona lâ a chhi heih awpa cha hmo thei leipa a châ.

⁷ Khihti a hmô phapa chhaohlei cha, raihriatuhpazy châta niedo papuapa ta, Khazohpa tawhta byhnâ a daopa a châ.

⁸ Chhaohlei ta ahloh nata bôbawzy a papua khiahta deikua cha, hnypa ta y ta, chhiesa thlupa châ ta, a chhâ nawpa cha mei ta rao awpa a châ.

Hnabeiseihpa pahno pasiana

⁹ Châhrasala kho ngaitapa saih u, cha hawhta reih hra sih la, nâmo kyh liata la, hmo pha viapa, pachhana kyh hmozy nama tao aw tahpa eimâ lôh.

¹⁰ Nama raihria tyhpa nata a moh vâta kyhpachâna palâsapa ta mopathaihpazy nama chakao tyhpa, tahmâ taihta nama taopa he, mopakhô awpa ta Khazohpa cha adoleipa châ vei.

¹¹ Hnabeiseihna ipa hnei awpa ta nama tiama tyhpa hawhna khata, achhâna taihta tiama papua lymâ awpa ta eima cha khokhei.

¹² Chatanachata diathlâ leipa aw ei chi ta, ngiapâna nata hâ hualuana vâta bietai ryu totuhpazy hâlatuhpa tlao nama châ aw.

Khazohpa bietai ipa

¹³ Khazohpa ta Abarahâ hnohta bietai a tao nona kha, ano hlâta rônah viapa moh reipa ta bie â taih nawpa a y leipa vâta, anosasyh ta bie a taih ta,

¹⁴ “Byhnâ cha awpa tlai aw na ta, ei cha papôh tlai aw,” tah ta.

¹⁵ Chatanachata Abarahâ cha palôh pasi ngaitapa ta a hâ tawhta bietaipa cha hmô ha ta.

¹⁶ Chyhsazy ta âmo hlâta rônah viapa moh reipa ta bie a taih tyh ei ta, aeichhiana ama hneipa to liata chhao, bietai cha bietluna pa-ina châta ama hmâh tyh.

¹⁷ Khazohpa ta â chhuahna anano beih leipa cha, bietai ryutotuhpazy hnohta tha via ta a pamosa khoh tita, bietai hmâpa ta a pa-i tyh.

¹⁸ Chatanachata hmo anano beih leipa miano vâta, haipa bie rei awpa cha Khazohpa châta hmo thei leipa châ ta, a boh awpa ta ano lâ a râpazy pi heta eima hmiakô liata hnabeiseihna sopa cha thlalôhpa ta eima hnei thei aw.

¹⁹ Cha hnabeiseihna cha eima hro a-ina nata abohna châta eima balyh thuacha-ia ta hnei pi ta, pohraipa chhôhchaipa lâ a ngiatuhpa hnabeiseihna a châ.

²⁰ Chatanachata Zisu cha eima vyuhpa ta hmia a sah ta, cha liata a ngia ta, Melkizade theihthaipa châna lâpi a chhihpa ta, chhâzaw theihthai beichaipa ta a y haw.