HEBRAI 5 - Mara Bible RV (BSI)

Theihthai beichaipa tlohna

¹ Theihthai beichaipa cha, chyhsazy vyuhpa ta Khazohpa nata azaona rai hria awpa ta chyhsazy hry tawhta atlyhpa châ ta, moleinazy châta hmopiepa nata atheihnazy hlâ awpa ta raopa a châ.

² Ano chhao chiehleina a hneipa a châpa vâta, pahno leipazy nata lâpi paviapazy cha chado kawpa ta a chhihtha thei ei.

³ Cha hawhta a châpa vâta, chyhsazy moleina châta atheihna a hlâpa hawhta, ano moleinazy châta chhao atheihna a hlâ tyh.

⁴ Cha palyupalihna cha ahy hmahta anosasyh ta a patosa thei vei. Arawna hawhta Khazohpa ta a awpa a châ khiah dei ta a to thei.

⁵ Cha hawhna chata Krista chhao ta theihthai beichaipa châ awpa ta anosasyh ta a cheihchalo vei. “Ei Sawchapawpa châ chi ta, Tanoh he na Paw ei châ,” tahpa ta a hnohta a reihtuhpa ta a raopa a châ.

⁶ Su hropa liata chhao, ano a raotuhpa ta, “Melkizade theihthaipa châna lâpi a chhihpa ta, Chhâzaw theihthaipa na châ” tahpa ta a reih heih.

⁷ Sapa pôhpa ta a hro chhôh ta, Zisu cha thina tawhta a pachha theituhpa lâ ao paro ngaitapa ta mothlih chhaota awh ta, thlahchhânazy nata hianazy hlâ ta, Khazohpa a chizana vâta a thlahchhâna cha nathliepa a châ.

⁸ Sawchapawpa a châ tarawpa ta, a pasa taonazy liata reingiahna a chu ta,

⁹ chavâta pakipa ta taopa vaw châ ta, a rei a ngiahpa zydua châta chhâzaw pachhana hnawh a vaw châ haw.

¹⁰ Melkizade theihthaipa châna lâpi a chhih ta, Khazohpa ta ano cha theihthai beichaipa ta a tao haw.

Paosaina zikyurâna

¹¹ Cha kyh liata bie hluhpi rei awpa eima hnei. Nama nah a pâ hapa vâta chhopasia deikua a ru kaw.

¹² A daihti pachâpa ta, pachutuhpa a châ bâ awpa châ ei chi ta, châhrasala Khazohpa bie thabypa pachu namâ ngiah thlâh ha chy. Sâhpiti a ngiah chy ei chi ta, pati hmeiseihpa nie thei mâh veih ei chi.

¹³ Sâhpiti ta chyh a ngiahpa maih cha, hawsaih a châpa vâta, siana bie kyh liata pahnona hnei leipa a châ.

¹⁴ Pati hmeiseihpa deikua cha, pitlohpazy châta châ ta, pati hmeiseihpa nie amâ chu lymâpa vâta, chhie nata pha pahrua thaina a hneipa pitlohpazy ama châ.