HEBRAI 4 - Mara Bible RV (BSI)

Pahâna bietai

¹ Chavâta â pahâna liata a ngia awpa bietai y thlâh ha tlôhpa ta, nama hry liata a ngia tlâh leipa nama y pathlei lei nawpa ta, chi ei suh u.

² Ama hnohta thâtihpha chhopa a châpa hawhta, keimo hnohta chhao chhopa châ ta, châhrasala bie ama theipa cha ngiapâna ta a pa-i leipa vâta, âmo châta phahnaina hnei vei.

³ Keimo, ngiapâ hapazy pi he, cha apahâna liata a ngiapazy cha eima châ. Leilô bô tua no tawhta raizy paloh hapa a châ tarawpa ta, hetana heta a tah: “Hiehâpa ta bie ei taih hapa hawhta, ‘Ei pahâna liata a ngia aw veih.’”

⁴ Khataih su liata tlyma, noh sarina noh kyh liata, “Noh sarina noh liata Khazohpa ta a raihria zydua tawhta â pahâ,” tah ta.

⁵ Rei chiehpa liana khata, “Ei pahâna liata a ngia aw veih ei,” tah heih ta.

⁶ Thokha cha apahâna liata a ngia aw ei ta, thâtihpha a dao tuapa thokhazy deikua cha, ama reingiah leina vâta a ngia thei aw veih ei.

⁷ Bohpi tawhna khata Dâvi hmâpa ta, “Tanoh,” tahpa ta, noh kheihawhpa tlyma rao chanei heih ta, rei chiehpa hawhta, hetana heta a reih chanei heih: “Tanoh he a ao nama thei khiahta cha, Nama palôh kuh pachhasa khuh vy.”

⁸ Zawsua ta apahâna a vaw pie ha khiah ei ta cha, cha hnôhlâ ta noh hropa kyh Khazohpa ta reih khao aw vei.

⁹ Chavâta Khazohpa phopi châta cha, a pahâ nawpa Pahânoh a y thlâh ha aw.

¹⁰ Khazohpa ta a raihriazy tawhta â pahâpa hawhta, Khazohpa apahâna liata a ngia hapa cha, a raihriazy tawhta â pahâ hra aw.

¹¹ Chavâta reingiah leina vâta ama paopa hawhna khata ahy hmah ama pao lei nawpa ta, cha apahâna liata a ngia awpa ta tei ei suh u.

¹² Khazohpa bie cha hroh ta, hmo tao thei ta, zaozi hâh nopa hlâta tiah via ta, hrona nata thlahpa, ru nata lathli pachhaih theina taihta chhôpahlie thei ta, palôh pachâna nata achhuahnazy a pahno thei.

¹³ A mohmô tawhta a nyu theipa hmotaopa rai y vei. Eima thâtih eima tlôkhei nawpa mohmô liata cha, ato thluahruapa nata pahy chiehpa ta a y khai.

Zisu theihthai beichaipa rônahpa

¹⁴ Chatanachata avâzy a siepahliepa theihthai beichaipa rônahpa, Khazohpa Sawchapawpa Zisu eima hneipa vâta, eimâ ngiapâna palâhâhna cha khâchâ patu ei suh u.

¹⁵ Eima chiehleinazy miah a pahnokhei thai leipa theihthai beichaipa a hneipa châ leipa pi ta, keimo hawhta kyh to liata reipasaona a tyh ta, châhrasala a molei leipa theihthai beichaipa eima hnei.

¹⁶ Chavâta zawngiahna eima hmô thei nawpa nata bao eimâ ngiah daihti liata miah bao awpa ta ngiachhiena eima hmô thei nawpa ta, ngiachhiena beidyuchhai cha riahphapa ta a hnia suh u.