HEBRAI 3 - Mara Bible RV (BSI)

Mawsi hlâta Zisu rônah viana

¹ Chavâta unawh pathaihpa, vârâh awna a to hrapazy saih u, eimâ ngiapâna palâhâhna lyuhchâpa nata Theihthai Beichaipa Zisu thâtih pachâ tyh muh vy.

² Mawsi cha Khazohpa chhôhkha zydua hry liata ngâchhihpa a châpa hawhta, Zisu cha ano a raotuhpa liata ngâchhihpa â châ.

³ O hlâta o satuhpa ta palyupalihna a hlao viapa hawhta, Zisu cha Mawsi hlâta rônahna a to tlâh viapa ta raopa a châ.

⁴ O to a satuhpa a hnei khaipa hawhta, ato zydua a taotuhpa cha Khazohpa a châ.

⁵ Hmialâ daihti liata bie rei awpazy pa-i nawpa ta, Mawsi cha Khazohpa o liata chakaotuhpa ngâchhihpa châ ta,

⁶ Krista deikua cha, Khazohpa o chô liata Sawchapawpa ngâchhihpa a châ. Eimâ lôhna nata eima hnabeiseihna liata eimâ palaikheipazy â ipa ta eima patu khiahta cha, keimo he Krista o cha eima châ.

Khazohpa chyhsazy apahâna

⁷ Chavâta Thlahpa Pathaihpa ta, “Tanoh he a ao nama thei khiahta cha,

⁸ Râhchawhpa liata pasiapa nama châ nota, Nama chhorupa hawhna khata, Nama palôh kuh pachhasa khuh vy.

⁹ Châ pathlatuhpazy khata, Cha liata na pasia ei ta; Ei hmotaopazy kô sypalih chhôh ama hmô.

¹⁰ Kha chhâ khata ei hie na pahâh ei ta, ‘Ama palôh liata viavipa ta, Ei lâpizy pahno veih ei,’ tah na ta.

¹¹ Pathi iapa ta bie ei taihpa hawhta, ‘Ei pahâna liata a ngia aw veih ei,’” tah ta.

¹² Unawh saih u, a sohsi teh u. Chataleipatala nama hry liata ahy chhôh liata tlyma ngiapâleina palôh moleina vaw y aw ta, Khazoh hrohpa nama paosai pathlei aw na.

¹³ Nama hry liata ahy hmah moleina ta dôveina liata kuhchhapa ta nama y lei nawpa ta, “tanoh” tahpa a châ chhôh zydua cha, noh chareih ta a pasyu raihrie teh u.

¹⁴ Âthaona liata eimâ ngiapâna alôhna kha achhâna taihta eima patu khiahta cha, Krista a hneituhpazy eima châ. Chavâta,

¹⁵ “Tanoh he a ao nama thei khiahta cha, Chhorupa ta nama y no hawhna khata, Nama palôh kuh pachhâsa khuh vy,” tahpa a châ.

¹⁶ Cha khiahta la pahno thlâh tlôh ta ano a dyuhpazy kha ahyzy ma ama châ? Mawsi chhihthapa ta Izi râh tawhta a kaw puapa zydua kha châ veih ei ma?

¹⁷ Kô sypalih chhôh a hie a pahâhpazy kha ahyzy ma ama châ? Moleina hmo a taopa, râhchawhpa liata ama ri a zawhpazy kha châ veih ei ma?

¹⁸ Â pahâna liata a ngia lei awpa ta bie â taihpazy kha ahyzy ma ama châ? Reingiah leipazy kha châ veih ei ma?

¹⁹ Amâ ngiapâleipa vâta a ngia thei khao veih ei tahpa eima pahno.