HEBRAI 2 - Mara Bible RV (BSI)

Pachhana rônahpa

¹ Chavâta bie eima theipazy kha eima pachâ peimawh pachai awpa a châ. Chataleipatala biezy cha eimâ sysai pathlei aw na.

² Vâlyuhchâpazy hmâpa ta bie reipa hmahta a i sala, paraona nata reingiah leina tozy ta viarithôna dopa a hmô lymâ khiahta cha,

³ he tlu ta pachhana rônahpa he diathlâ ei sih la, kheihta e eimâ boh thei aw? Cha pachhana bie cha Abeipa ta phuah tua ta, a theituhpazy ta keimo châta ama pa-i.

⁴ Khazohpa chhao ta ngianazy, hmonoâhpazy nata hmotaotheina to ta nata a khozie hawhta Thlahpa Pathaihpa hmopiepazy piepa ta a pahnokhei.

Pachhana a pietuhpa

⁵ Khizaw vaw y awpa thâtih eima reipa he vâlyuhchâpazy biehneina liata soh vei.

⁶ Khataih liata tlyma, “Chyhsapa he khâpa châ ta ma, Pachâ kaw chi ta; Chyhsa sawchapawpa he khâpa châ ta ma, Na mohôh tly?

⁷ Bohpi leipa chhôh châta, Vâlyuhchâpazy hlâta a hnai viapa ta tao chi ta, Rônahna nata palyupalihna lakho na pakho; Na ku hmotaopazy chô liata hyutuhpa ta tao chi ta,

⁸ A phei ry liata ato na soh khai,” tahpa ta pa-ipa a châ. Chatanachata ato ano ry liata soh ta, ano biehneina khô lâta a sopa khâpa hmah y vei. Tahmâ deikua cha, ato ano ry liata a ypa hmô mâh ma pi.

⁹ Châhrasala bohpi leipa chhôh vâlyuhchâpazy hlâta a hnai viapa ta tao chypa Zisu cha, thina pasa a taopa vâta, tahmâ cha rônahna nata palyupalihna lakho pakhopa ta a ypa hmô pi ta, Khazohpa ngiachhiena zawhzi ta chyhsa to châta thina a padi haw.

¹⁰ Ano châta nata ano zawhzi ta ato a ypa Khazohpa ta, saw hluhpi rônahna lâ a chhipa ta ama pachhana a taotuhpa Krista cha, pasa taona siepahliepa ta pakina patosa â chhuahpa cha, a châna awpa rai a châ.

¹¹ Pathaisatuhpa nata pathaisapazy cha ama zydua ta mopakha tawhta a puapa ama châ. Chavâta Zisu ta âmo cha unawhzy tah awpa a noza vei.

¹² “Ei unawhzy hnohta na moh phuah aw na ta, Apakhypazy hry liata na reithaina hla ei sa aw,” tah ta,

¹³ “Ano liata ngâna ei pahnieh aw,” tah heih ta, “Moh tua u, Kei nata Khazohpa ta eina piepa sawzy hih,” a tah.

¹⁴ Sawzy cha sapa nata thisaih azaona a hneipa ama châpa hawhta, ano chhao sapa nata thisaih hnei hra ta, a thina ta thina hmotaotheina a hneipa ahripa cha a pahleipadia haw.

¹⁵ Chatanachata thi riah china sei ta hro chhôh a tâhpa zydua a pachha ha ei.

¹⁶ Hmeiseihta la, vâlyuhchâpazy bao leipa ta, Abarahâ pathlazy tlao a bao ei.

¹⁷ Chavâta chyhsazy châta molei reihpha cheina tao awpa ta, Khazohpa chakaona liata zawngiah theipa nata ngâchhihpa theihthai beichaipa a châ thei nawpa ta, kyh to liata a unawhzy hawhta a y awpa cha a byuhpa rai a châ.

¹⁸ Ano tlai ta reipasaona a tyh ta, pasa a vaw tao hapa vâta, reipasaona a tyhpazy a bao thei ei.