HEBRAI 12 - Mara Bible RV (BSI)

Zisu, ngiapâna pakituhpa

¹ Cha ngiapâna bie pahnokheituhpazy ta meihdo ru ngaitapa hawhta miah ama pahlypa vâna heta, miah pahny pakhawpa maih nata moleina keimo liata khâchâ a baipa cha soh sih la, eima hmiakô liata arâpasuana a ypa liata tiama ngaitapa ta a râ lymâ suh u.

² Eimâ ngiapâna apahniehna nata pakituhpa Zisu lâ moh lymâ ei suh u. Ano cha a hmiakô liata alyna sopa cha a to thei nawpa ta, maophyuhna chhao papeisa leipa ta, kraws liata pasa tao ta, Khazohpa beidyuchhai chachâh lâta a kaw tyuh ha ta.

³ Nama palôh thazei leipa ta, nama tha a chhâ lei nawpa ta, moleipazy ta amâ dyuhna vâta pasa a taopa Zisu thâtih pachâ tyh muh vy.

⁴ Moleina namâ dyuhna liata, thisaih lona taihta a dyuh mâh veih ei chi.

⁵ Sawzy chhoreipa hawhta pasyuna biezy kha nama my ha ma? “Ei saw y, Abeipa chhoreina cha, Papeisa leipa ta y leipa la; A cha ra tita, Na palôh pasa khah sy.

⁶ Abeipa ta a kyhpachâpa cha chhorei ta, Saw ta â pyhpa maih a chhei tyh.”

⁷ Nama pha nawpa ta chhoreipa nama châ. Sawzy chô liata taopa hawhta Khazohpa ta nama chô liata a tao. Paw chhorei leipa saw ahy ma a y beih?

⁸ Saw zydua cha chhorei tyhpa ama châ. Chavâta chhoreipa nama châ vei khiahta cha, saw hmeiseihpa châ leipa ei chi ta, riasawzy nama châ.

⁹ Cha dei châ vei, lei liata miah chhoreituhpa pawzy hnei pi ta, âmo cha eima za ngaita. Eima hroh thei nawpa ta, eima thlahpazy Paw cha, cha hlâta tha via ta eima za awpa châ vei ma?

¹⁰ Lei liata eima pawzy ta daihti chyuta chhôh, pha ama tahzie hawhta miah chhorei ei ta, Abeipa deikua cha, eima pha nawpa ta tlao miah a chhorei tyh. Chatanachata a pathaihna eimâ hly thei aw.

¹¹ Chhoreina zydua he, a tyh nota cha alychhihpa châ leipa ta, a pasa kaw tyh. Pasa tao khai tawhta deikua cha, chhoreipa ta a ypazy châta thei thlalôh chhihpa, siana thei a pathei tyh.

Khazohpa ngiachhiena a pyh leina zikyurâna

¹² Chavâta nama bâh pathliahpazy chalo u la, nama pakhu thazeipazy thapatlô teh u.

¹³ Pheisypa cha a ru a suhlie leipa ta, patlâhpa a châ thei nawpa ta, nama pheizy châta lâpi patlâpazy tao teh u.

¹⁴ Chyhsa zydua nata adyhna chadai u la, pathaihna chadai hra teh u. Pathaihna leipa ta ahy hmahta Abeipa hmô aw veih ei.

¹⁵ Khazohpa ngiachhiena a to leipa ama y lei nawpa ta, pakhâta ta moh u la, palôh chhiepa vaw pua sala, tymâna patlôsapa ta, chyhsa hluhpi papuapaleipa ama châ lei nawpa ta, pakhâta ta moh teh u.

¹⁶ Apatlana moleina a taopa y leipa ta, Esaw hawhta pathaih leipa ama y lei nawpa ta, pakhâta ta moh teh u. Esaw cha pati ei kha nie ta sawchapaw uhtheipa châna a zuahpa kha a châ.

¹⁷ Cha khai tawhta byhnâ to awpa khoh ta, mothlih chhaota a hiapa chhao ta, ro nawpa daihti rypaohpa a hmô khao leipa vâta, dythapa a châpa kha nama pahno.

Chalyu thei leipa khinarâh

¹⁸ Ku ta hria theipa tlâh, meipaleih a puapa, zohna nata zoh kaluhna ta a khupa nata thlihpi pathlina tlâh lâ namâ vypa châ leipa ta,

¹⁹ chiahmie tôpa pyu nata a bie reipa ao vâta, a theituhpazy ta ama hnohta bie hropa rai rei khao lei awpa ta amâ hawna tlâh lâ a vypa châ veih ei chi.

²⁰ “Tlâh cha sa ta hmah a hria khiahta cha, alô ta vawhsao awpa a châ,” tahpa biepiepa ama pahnie leipa vâta a châ.

²¹ Ama hmo hmôpa kha chichhih ngaitapa châ tlai ta, chavâta Mawsi chhao ta, “Chipa ta thata ei chalyu,” a tahpa kha.

²² Nâmo deikua la, Zaio Tlâh, Khazohpa hrohpa khihpi, vâ Zerusale, vâlyuhchâpa rei tiah leizy alyna pakhypi su lâ namâ vy hih.

²³ Vârâh liata moh ropa sawchapaw uhtheipazy yna Awnanopa lâ a vy ei chi ta, mo to pachiatuhpa Khazohpa nata phapakipa ta taopa mosiapa sahlao thlahpazy lâ namâ vy.

²⁴ Biehrai thiehpa lyuhchâpa Zisu lâ a vy ei chi ta, Abela thisaih hlâta bie pha viapa a reihpa Zisu thisaih thiapa lâ namâ vy hih.

²⁵ Biereituhpa khoh leipa ta nama y pathlei lei nawpa ta a chado teh u. Alei liata zikyurâtuhpazy khoh leipa hmahta hriena ama khôkhâh vei khiahta cha, vârâh tawhta zikyu miah râtuhpa eima dytha khiahta cha, hriena eima khôkhâh lei pachai aw dia!

²⁶ Kha daihti liata a ao ta alei he chalyu ta, tahmâ deikua, “Ei kha cha alei dei châ leipa ta, avâ chhao ei chalyu heih aw,” tahpa ta bie â taih.

²⁷ “Ei kha cha ei chalyu heih aw,” tahpa heta, hmo a chalyu leipazy a y ualua ta a y lymâ thei nawpa ta, hmo a chalyupazy cha, hmotaopazy hawhta pasiepa ta a y aw tahpa a palâsa.

²⁸ Chatanachata khinarâh a chalyu thei leipa eima topa vâna heta, alyna châh pahno sih la, a pyh tlâhpa achhyna cha, china nata zana chôta Khazohpa lâ hlâ ei suh u,

²⁹ eima Khazohpa he a kâ patlô theipa mei châ tlôh ta.