HEBRAI 11 - Mara Bible RV (BSI)

Ngiapâna

¹ Ngiapâna cha hmo hnabeiseihpazy a y tlai tahpa pahnona châ ta, hmo hmô leipazy pahnopasiana a châ.

² Cha ngiapâna vâna chata hlâno chyhsazy kha reithai ama hlao tyh.

³ Ngiapâna ta khizaw he Khazohpa bie ta taopa a châ tahpa pahno pi ta, chavâta hmo eima hmôpazy he hmô theipa hmozy tawhta taopa châ veih ei tahpa eima pahno.

⁴ Ngiapâna ta Abela cha Kainâ hlâta atheihna pha viapa Khazohpa lâ hlâ ta, Khazohpa ta a hmopiepazy a pyh ta, ano cha reithai ta, mosiapa ta a rao. Â ngiapâna vâta, Abela cha a thi tawh chhao ta bie a reih lymâ.

⁵ Ngiapâna ta Enawka cha thina a tyh lei awpa ta lapa châ ta, Khazohpa ta a la hapa vâta, ano cha hmôpa châ khao vei. Lapa a châ hlâ tawh chhao ta, Khazohpa a palysapa a châpa vâta reithaina a hlaopa a châ.

⁶ Ngiapâna leipa ta cha Khazohpa palysa thei rimâ awpa châ vei. Khazohpa a pangaipa maihta, Khazohpa a y tahpa amâ ngiapâ awpa châ ta, ano a tluatuhpa cha Khazohpa ta lymâ a pie tyh tahpa amâ ngiapâ awpa a châ.

⁷ Ngiapâna ta Nôah cha hmo a lâ leipazy kyh liata Khazohpa zikyurâna cha pachâ peimawh ta, Khazohpa chizapa ta, a chhôhkhazy pachha nawpa ta balyh a tu. Â ngiapâna ta khizaw thailei pachâsa ta, ngiapâna vâta hmôpa siana ryutotuhpa a vaw châ haw.

⁸ Ngiapâna ta Abarahâ cha a ryuto râh lâ sie awpa ta awna zyh ta, khataih lâ ma a sie aw tahpa a pahno leipa chhao ta, a sie lymâ.

⁹ Ngiapâna ta bietai râh liata pahrâ awpa ta sie ta, chihropa râh liata ypa hawhta y ta, bietai miakha ryutolâhpa Aisika nata Zakaw zy chhaota poh ozy liata ama pahrâ.

¹⁰ Chatanachata abônazy a hneipa, Khazohpa pachhuahpanohpa nata paduapa khihpi cha a hâ hualua.

¹¹ Ngiapâna ta Sârâ cha saw phaoh thei ta, ano bie a taihtuhpa cha ngâchhihpa ta a raopa vâta, a nôpi tawhta saw a phaoh theipa a châ.

¹² Chatanachata chapaw pakha, athipa hawhta pachâpa tawhta, avâ liata awhsi zie ta a hluhpa nata tilaipi ngiahkâ liata sadi rei tiah lei zie ta a hluhpa chipathlazy ama vaw pua haw.

¹³ Cha zydua cha ngiapâna hneipa ta thi ha ei ta. Ama hnohta bietaipa hmozy ama to mâh leipa chhao ta, lâhlapi tawhta saipa ta a naoh ei ta, alei liata cha khichhaipa nata khitlyhpa dei ama châ tahpa ama pahno.

¹⁴ Cha hawhpa kyh a reihpa chyhsazy cha, ama râh sôhpahlôhpa a tluapazy ama châ tahpa ama palâsa.

¹⁵ Ama puana râh cha saiheipa châ ei sala, kua heihna daihti rypaohpa ama hmô thlâh ha aw.

¹⁶ Châhrasala tahmâ cha, râh pha viapa a saduthliepa châ ei ta, cha cha vârâh liata a ypa a châ. Chavâta Khazohpa ta ama Khazohpa châ awpa a noza vei, ama châta khihpi taih a chhuahdy ha tlôh ta.

¹⁷ Ngiapâna ta Abarahâ cha pasiapa ta a y nota, Aisika hlâ ta, bietaizy a totuhpa ta a sawchapaw matlupa cha a hlâ haw.

¹⁸ “Aisika liata na pathlazy a laichadaipa a châ aw,” tahpa ta chhopa chyhsa ta, a sawchapaw matlupa a hlâ.

¹⁹ Khazohpa cha athihpa chhao a pathyu thei tahpa a ngiapâ ta, Aisika cha a hmô pakhua haw. A hlâ hapa vâta Aisika cha a thi hapa hawhta pachâpa a châ.

²⁰ Ngiapâna ta Aisika ta hmo a vaw tlô awpazy kyh liata Zakaw nata Esaw byhnâ a awpa ei.

²¹ Ngiapâna ta Zakaw ta a thi chy ta, Zawsi sawchapawzy byhnâ awpa chyu ta, a chôchahrei pawhmao a hniehpa ta Khazohpa â chhy.

²² Ngiapâna ta Zawsi ta a thi chy ta, Izarei sawzy Izi râh tawhta pua awpa kyh reih ta, a ruzy taotia nawpa kyh a chho ei.

²³ Ngiapâna ta Mawsi a pi nona kha, hawsaih hmipha kawpa ta ama hmôpa vâta, a nôpawzy ta thla thôh chhôh nyu ei ta, bei biepiepa chhao chi veih ei.

²⁴ Ngiapâna ta Mawsi cha a vaw pitloh tawhta, Phiraoh sawchanô sawchapawpa ta bi awpa a dytha haw.

²⁵ Bohpi leipa chhôh molei phasana liata lôhrâ a patlôpa hlâta cha, Khazohpa chyhsazy hnohta taolana tao awpa tlao a tlyh ta.

²⁶ Lymâ to awpa a saipa vâta, Krista vâta reipachhiena a tyhpa cha Izi râh ryuzy hlâta ryu sôh viapa ta a rao.

²⁷ Ngiapâna ta bei hiehâhna chhao chi leipa ta, Izi râh puasai ta, hmô thei leipa a hmôpa vâta pasa a tao hualua.

²⁸ Sawchapaw uhtheipa pahleipadiatuhpa ta Izarei sawchapaw uhtheipazy a hria lei nawpa ta, ngiapâna ta Zawpakhô chay ta, thisaih a thia.

²⁹ Ngiapâna ta alei hipa liata siepa hawhta Tilaipi Saihpa ama chaka. Izi mo deikua cha, cha hawhta tao a chhuah hra ei ta, ti ta a vaosao khai ha ei.

³⁰ Ngiapâna ta Zerikô thokhy cha, noh sari ama chahlô tawhta a cho haw.

³¹ Ngiapâna ta âzuahnô Rahâbi cha, mohparutuhpazy a phapa ta â lypa vâta, ngiapâleipazy hry liata leidia vei.

³² Khâpa eima reih khao aw? Kidia, Bâraka, Sâsawna, Zephathâ, Dâvi, Samuela nata hrohsopazy kyh reih aw sah la, daihti ta nâ daih aw vei.

³³ Âmo cha ngiapâna ta khinarâhzy la ei ta, adona a duakhei ei ta, bietaizy to ei ta, chakeibarôhneipa pakahzy ama pamosa.

³⁴ Mei hmotaotheina pachhai ei ta, zaozi tiahpa khôkhâh ei ta, chiehleina tawhta thatlôpa ta taopa ama châ. Adyuhna liata pasaipha châ ei ta, chihropa pheisaihzy a chadai ei ta amâ râpai.

³⁵ Chanôzy ta ama chyhsa athipa thyuheihpazy hmô ei ta. Thokhazy cha taolapa ta y hra ei sala, hro pha viapa lâta ama thyuheih thei nawpa ta, pua awpa khoh hlei veih ei.

³⁶ Mohropazy chhao pasipasawhna nata tuna zy vâta pasa tao ei ta, bâlia nata patâhna zy amâ tyh.

³⁷ Alô ta vawhpa châ ei ta, thoâna ta taipachhôpa châ ei ta, reipasaona a tyh ei ta, zaozi ta chhawhsaopa ama châ. Mietaku vo nata mie vo zy a bupa ta viavi ei ta, dyhchhiena, pasataona nata â doleipa ta ama chô liata hmotaopazy amâ tyh.

³⁸ Chazy châta la, khizaw he yna tlâh châ vei. Râhchawhpa liatazy, tlâh liatazy, lôpu nata khaohtlô liatazy viavipa ta ama y.

³⁹ Cha chyhsa zydua cha, amâ ngiapâna vâta reithaina hlao tlai ei ta, bietaipa deikua hmô mâh veih ei.

⁴⁰ Khazohpa ta keimo châta hmo pha viapa â chhuahdy hapa vâta, âmo nata keimo â raohpa ta pakipa ta y awpa ta â chhuanoh hapa a châ.