HEBRAI 10 - Mara Bible RV (BSI)

Eima châta Krista atheihna

¹ Ryhpa cha hmo phapa a vaw y awpazy nohpahlipa dei châ ta, a hmeiseihpa a châ leipa vâta, kô chareih ta atheihna hlâ tyhpa a châpa chhao ta, a hlâtuhpazy châta pakina tlôkhei thei beih vei.

² Chata châ leipa sala, achhytuhpazy cha ei kha pathaisapa ama châ ha tawhta cha, molei a pahnona hnei khao leipa aw ei ta, atheihna ama hlâ tyhpa cha pachhâsa ha aw veih ei ma?

³ Châhrasala cha atheihnazy liana chata kô chareih ta moleinazy pahnosa heihna a y tyh.

⁴ Viahchao tôhpazy nata miezy thisaih ta moleinazy pahlei thei rimâ awpa châ vei.

⁵ Chavâta khizaw lâ â zu nona khata, Krista ta, “Atheihna nata hmohlâpazy khoh leipa chi ta, Pôhpa tlao nâ chhuanohpa chi ta,

⁶ Raopa hlâna nata moleina hlânazy liata Alyna rai hnei va chi.

⁷ Hy Khazohpa, moh tua, Châbu chatypa liata ei thâtih ropa hawhta Na khopa tao awpa ta ei vy,” tah ta.

⁸ “Atheihnazy, hmohlâpazy, raopa hlânazy nata moleina hlânazy khoh leipa chi ta, chazy liata alyna hnei hra va chi,” tah tua ta, chazy cha ryhpa hawhta hlâpa kyhzy a reipa a châ.

⁹ Cha khai tawhta, “Moh tua, na khopa tao awpa ta ei vy haw,” tah ta, a vaw y awpa a pa-i thei nawpa ta a hmiatuapa cha a pahlei haw.

¹⁰ Cha hmochhuahpa hawhna chata, chhâzaw châta ei kha hlâpa Zisu Krista pôhpa ta pathaisapa ta eima y haw.

¹¹ Theihthaipa maihta chakao awpa ta noh chareih a duah ei ta, moleinazy a siekhei thei leipa atheihna ama hlâ tyhpazy cha, a ualua ta ama hlâ chanei ngâ thlâh ha tyh.

¹² Krista deikua cha, moleinazy châta atheihna miakha, chhâzaw châta ei kha a hlâ khai tawhta, Khazohpa chachâh lâta a tyuh ta,

¹³ a khakhaipazy a phei tlyna ta taopa ama châ khai hlâlei a hâ thlâh chy.

¹⁴ Ei kha â hlâna ta a pathaisa hapazy cha, chhâzaw châta a pakipa ha ei.

¹⁵ Thlahpa Pathaihpa chhao ta, hetana heta reih ta, miah a pahnokhei,

¹⁶ “Cha nohzy hnôhlâ ta, Ama hnohta biehrai ei tao awpa cha, He he a châ, Abeipa ta a tah: Ama palôh liata ei ryhpa biezy soh aw na ta, Ama pachâna liata ei roh hra aw,” a tah khai tawhta,

¹⁷ “Ama moleinazy nata ama paraonazy A thei khao aw va na,” tah heih ta.

¹⁸ Cha hawhta moleinazy a ngiahthaipa a châ ha khiahta cha, moleina châta atheihna hlâ awpa byuh khao vei.

Ngiapâna liata alôhna

¹⁹ Chavâta unawh saih u, Zisu thisaih vâta Su Pathaih Chaipa liata eimâ ngia aw tahpa a lôh pi ta,

²⁰ pohraipa siepahliepa ta lâpi thiehpa nata hrohpa eima châta a pahy haw. He liata pohraipa he Krista pôhpa reina a châ.

²¹ Chatanachata Khazohpa chhôhkhazy chô liata theihthai rônahpa eima hneipa vâta,

²² eima palôh liata chhie nata pha pahnona pha leipazy pathaipa ta, eima pôhpa ti pathaihpa ta pasi sih la, ngiapâna liata alôhna a ipa hneipa ta Khazohpa a hnia ei suh u.

²³ Eima hnabeiseihna palâhâhna cha, a zawvaw leipa ta khâchâ patu ei suh u, bie â taihtuhpa cha ngâchhihpa châ tlôh ta.

²⁴ Kyhpachâna nata hmo pha taona liata kheihta ma tha eimâ pathyu raihrie thei aw tahpa pachâ tyh ei suh u.

²⁵ Thokha taozie hawhta, apakhynazy bâhsai leipa ta, tlao a pasyu raihrie ei suh u. Noh â hnia via rilipa nama hmôpa hawhta, thata a pasyu ei suh u.

²⁶ Biehmeiseihpa pahnona eima hnei ha tawhta eima molei raruah lymâ khiahta cha, moleinazy châta atheihna y khao vei.

²⁷ Ryureina rarôh ypa nata ano dyuhtuhpazy a kâ patlô awpa hiehâhna mei tlao a y aw.

²⁸ Mawsi ryhpa a papeisa leipazy cha, pahnokheituhpa pano tlyma, pathôh tlyma bie ta, zawngiahna a hlao leipa ta ama thi tyh.

²⁹ Khazohpa Sawchapawpa tlypâ ta, ano pathaisana biehrai thisaih papuapaleipa ta, ngiachhiena Thlahpa ru a pachhôpa cha, kha tluta hriena tha viapa to sala nama pangiasa?

³⁰ “Phuh cha keima la awpa châ ta, kei ta viari ei thô aw,” a tahtuhpa eima pahno. “Abeipa ta a phopi a pachia aw,” a tahtuhpa chhao eima pahno.

³¹ Khazoh hrohpa ku liata paopa cha hmo rarôh y ngaitapa a châ.

³² Châhrasala nama daihti hmiatuapa liata, nopavâhsapa ta nama y khai tawhta thata pasa nama taona nohzy kha a thei tyh muh vy.

³³ A châh ta vâtlâh mohmô ta pasipasawhpa nata taolapa ta y ei chi ta, a châh ta pasipasawhna nata taolana a taopazy namâ duakhei tyh.

³⁴ Keihrai daipazy thapasa ei chi ta, hmo hneipa pha viapa, a y kôzaw awpa nama hneipa nama pahnopa vâta, nama hmo hneipazy ama cha hrao tita, a ly kawpa ta namâ pyh thei.

³⁵ Chavâta namâ ngiapâna alôhna, lymâ rônahpa a hneipa cha thy khuh vy.

³⁶ Khazohpa khopa nama tao khai tawhta, bietaipa nama hmô thei nawpa ta, daotheina namâ ngiahpa rai a châ.

³⁷ “Bohpi leipa liata, A vy awpa cha â vy aw, Hawh aw vei.

³⁸ Ei chyhsa siapa cha, Ngiapâna ta a hroh aw; Hnôh a sypa deikua cha, A chô liata alyna rai hnei aw va na.”

³⁹ Châhrasala keimo la, leidia awpa ta hnôh a sypa sahlao liatapa châ ma pi. Ngiapâna ta hro a pabohsa awpazy tlao eima châ.