HÂKAI 2 - Mara Bible RV (BSI)

Achhyna o thiehpa rônahna

¹ Cha kô thla sarina, noh kih nata noh kha noh ta, hrohsopa Hâkai hmâpa ta Abeipa bie hetana heta vaw tlô ta:

² “Siati sawchapawpa Zudâh râh ryureituhpa Zerubâbe hnohta nata Zehôzadâ sawchapawpa theihthai beichaipa Zawsua hnohta nata phopi laibâhpazy hnohta hetana heta reih la, âmo cha hiahri teh,

³ ‘He o he paraopa a châ hlâta a rônahna zydua a hmôpa nama hry liata ahy ma a y ei chi? Tahmâ he khâpa nama palyusa? Khâpa hmâh a châ khao leizie he hmô thlâh ha veih ei chi ma?

⁴ Chatahrasala, hy Zerubâbe, thatlôpa ta y mah y,’ Abeipa ta a tah. ‘Hy Zehôzadâ sawchapaw theihthai beichaipa Zawsua, thatlôpa ta y mah y. Hy râhsaw zydua saih u, thatlô ngaitapa ta y muh vy,’ Abeipa ta a tah. ‘Thyu u la hria teh u, nama hnohta ei y,’ Pheisaihzy Abeipa ta a tah.

⁵ ‘Chi khah u, Izi râh tawhta nama kaw pua nota bie ei châ taih hapa hawhna ei khata, ei Thlahpa ta khâ a cha ypâ lymâ ei.’

⁶ “Pheisaihzy Abeipa ta hetana heta a tah: ‘Bohpi leipa ta avâ nata alei, tilaipi nata lyurâhpa zy he, ei kha cha ei chalyu heih aw.

⁷ Phopi zydua ei chalyu aw ei. Râh to liata ryusôhpazy vaw tlô aw ta, he o he rônahna ta ei pabie aw,’ Pheisaihzy Abeipa ta a tah.

⁸ ‘Tâkâ cha kei eih châ ta, ngôh chhao kei eih a châ,’ Pheisaihzy Abeipa ta a tah.

⁹ ‘Tahmâ ta o rônahna he a hmiatuapa o rônahna hlâ khata a rônah via syulyu aw,’ Pheisaihzy Abeipa ta a tah. ‘He su liata thlalôhna ei paysa aw,’ Pheisaihzy Abeipa ta a tah,” tah ta.

Phopi papuapalei hapa châta byhnâzy

¹⁰ Dâria abeina kô nona, thla chakina, noh kih nata noh palihna noh ta hrohsopa Hâkai hmâpa ta hetana heta Abeipa bie vaw tlô ta:

¹¹ “Pheisaihzy Abeipa ta hetana heta a tah: Ryhpa kyh liata theihthaipazy hiahri teh:

¹² ‘Chyhsa ta a poh pai liata atheihna sa pathaihpa pabyuh sala, a poh pai chata viahchhâ tlyma, âhmie tlyma, kresawhti tlyma, sathaw nata niedo hropazy hria ha sala, hmo pathaihpa lâta amâ lie aw ma?’” tah ta. Theihthaipazy ta Hâkai cha a chhy ei ta, “A lie aw veih ei,” tah ei ta.

¹³ Hâkai ta, “Cha khiahta la, athihpa ri a hriapa vâta pathaih leipa chyhsa ta he hmo miakha he hria ha sala, cha hmo cha pathaih leipa lâta â lie aw ma?” tahpa ta theihthaipazy cha hiahri heih ta. Theihthaipazy ta, “Pathaih leipa lâta â lie aw,” tah ei ta.

¹⁴ Hâkai ta, “He phopi nata he râh chhao he, keima mohmô liata la, cha hawhpa tlai cha ama châ, ama hmotaopa nata ama hmohlâpa zydua pathaih tlâ vei, Abeipa ta a tah” tah ta.

Byhnâ pie awpa ta Abeipa bietai

¹⁵ “Tahmâ, tanoh tawhta daihti a vaw tlô awpazy châta pachâ tua u. Abeipa Achhyna o liata alô nama paryh hlâna khata,

¹⁶ khâpa ma nama lyu? Chyhsa ta sâh hmo kih ama pathluna su lâ â vy tita, hmo hrawh deita y tyh ta; Kresawhti ôh sypangawh thai awpa ta kresawhti saohna su lâ â vy tita, ôh kih deita a y tyh.

¹⁷ Nama ku raihria zydua cha alôpa, hmyna nata pareih zy hmâpa ta cha paraopa ei na ta, chatanachôta kei lâ vaw kua hlei veih ei chi,” Abeipa ta a tah.

¹⁸ “Tanoh tawhna heta pakhâta ta pachâ teh u. He thla chakina, noh kih nata noh palihna noh, Abeipa Achhyna o sa nawpa châta lôbô bô noh tawhna heta pakhâta ta pachâ teh u.

¹⁹ Sawvâ liata chi a y chy ma? Hmeiseihta cha, Kre zôh, theiku kô, pawmikarânâ nata ôli kô zy pathei tlâ khao veih ei. Tanoh tawhta deikua cha, byhnâ ei cha pie aw ei,” tah ta.

Zerubâbe hnohta Abeipa bietai

²⁰ Cha thla, noh kih nata noh palihna noh liata Abeipa bie cha Hâkai hnohta a ei nona ta vaw tlô heih ta:

²¹ “Zudâh râh ryureituhpa Zerubâbe hnohta hetana heta chho teh: ‘Alei nata avâ ei chalyu daihmâ haw.

²² Khinarâh beidyuchhaizy thy pathlah aw na ta, phopi to khinarâh thatlônazy ei parao khai aw. Arâ talailih nata a chô liata a kiahpazy papao aw ei na ta, arâ nata a kiahtuhpazy cha ama unawhpa zaozi ta ama pao aw.

²³ Hy Siati sawchapawpa, nâ chakaotuhpa Zerubâbe y, cha noh liata cha la aw na ta, ei tlypa na châpa vâta, chahnaona kusadi hawhta ei cha tao aw,’ Pheisaihzy Abeipa ta a tah,” tah ta.