HABAKU 3 - Mara Bible RV (BSI)

Habaku thlahchhâna

¹ He he hrohsopa Habaku thlahchhâna châ ta, Sikiônô aony ta rei awpa a châ.

² Hy Abeipa, na thâpha ama reipa thei na ta, Hy Abeipa, na hmotaopazy noâh ei tah ngaita. Keimo daihti liata pathieh heih la, Keimo chhâ liata pahnosa heih mah y! Pathiiana liata zawngiahna a thei tyh mah y!

³ Khazohpa cha Temâ tawhta a vy ta, Pathaihpa cha Pârâ Tlâh tawhta â vy. Selah A rônahna ta avâ khu ta, A reithaina ta leilô a bie.

⁴ A pathliezie cha khaihna hawhta châ ta, A ku tawhta khaihna noh ri hawhta a vaw pua; Cha liata a hmotaotheina nyupa a châ.

⁵ Hripipa a hmia lâta sie ta, Potlana ta a pazi laih.

⁶ A duah ta, alei chathosa ta, Moh ta, phopizy a chalyusa. Tlâhpi hlôpazy pao ei ta, Tlâhthlôh hlô thlâhpazy ama cho. A lâpizy cha chhâzaw lâpizy a châ.

⁷ Kusi mo poh ozy liata pasataona hmô na ta, Midia mo poh raipa a chalyupa ei hmô.

⁸ Hy Abeipa, arâ kiah chi ta, Na pahniena talailih liata na kia no kha, Chavahzy chô liata ma na hie a hâh? Chavahzy chô liata ma na pathi a ia? Tilaipi chô liata ma na ru a chhô?

⁹ Na libaw a mâ chiehpa ta y ta, Châtaizy hluhpi nâ haw. Selah Chavahzy ta alei na patlaw.

¹⁰ Tlâhpizy ta cha hmô ei ta amâ taikalô; Tisaihzy a chakhao ei ta, Tilaipi a aoh ta, A kuzy avâ lâ a pazawh.

¹¹ Na châtai a zawpa nata asei patliepa khaihnazy liata, Noh nata thlâpâ zy ama yna su liata amâ duah.

¹² Pathi iapa ta khizaw chahryh chi ta, Hiehâhpa ta phopizy na tlysao ei.

¹³ Na phopi pachha awpa ta pua chi ta, Na sathawthupa pachha awpa ta na pua. Moleipazy pathlatuhpa luh cha, A zao khaina taihta charieh chi ta, A luh tawhta a padih taihta na parao khai haw. Selah

¹⁴ Nâ chadaipai awpa ta khisô hawhta a vypa a pasaiphazy, Rietheipazy arulâta palâpa amâ lyna a châpazy cha, Ano châtaizy tlai ta ama luhzy na ka pahlie haw.

¹⁵ Na arâzy ta tilaipi tlypâ chi ta, Tipi a chatlao ngâpazy na tlypâ.

¹⁶ Ei thei nahta ei châh-ao a chalyu ta, A pyu ta ei hmao a chathosa; Ei ruzy hmy ta, Ei pheizy â chalyu. Chatahrasala miah a siehnaopa phopi chô liata Nôpona noh a vaw tlô awpa cha ei hâ hualua. Hla chhituhpa châta: Pyungiapa ri chhaopa ta sa awpa

Abeipa liata Habaku alyna hla

Hla chhituhpa châta: Pyungiapa ri chhaopa ta sa awpa

¹⁷ Theiku kô pawh leipa ta, Kre zôhzy pathei vei hra sala; Ôli thei pathei leipa ta, Lyuzy ta niedo papua vei hra sala; Mietaku o tawhta mietakuzy leidia khaipa ta, Viahchao ozy liata viahchao y vei hra sala;

¹⁸ Abeipa liata a ly aw na ta, Ei pachhana Khazohpa liata khâ ei ly aw.

¹⁹ Zehôvâh Khazohpa cha ei thatlôna châ ta, Ei pheizy he sakhih phei hawhta tao ta, Ei su sâhpazy liata eina pasiesa.