HABAKU 2 - Mara Bible RV (BSI)

Abeipa chyh-eina

¹ Ei riahvaina su liata a duah aw na ta, O sâhpa chô liata yna ei paryh aw; Abeipa ta ei hnohta a rei awpa mokhâh aw na ta, Ei paphôhna â chhyna ei mokhâh aw.

² Abeipa ta hetana heta einâ chhy: “Aluahna roh la, A reihpa maihta thlai ama reih thei nawpa ta, Lôphia chô liata a siapa ta roh mah y.

³ Aluahna cha a daihti raopa hâ chy ta, Chhâna kyh reih ta, Rei chhei aw vei. Vaw tlô mâh vei hra sala, Hâ hualua mah y; A vaw tlô thlyu aw, Hawh aw vei.

⁴ “Moh tua u, moleipa palôh cha a palai kaw ta, Ano liata adona y vei; Mosiapa deikua cha, Â ngiapâna ta a hroh aw.

⁵ Kresawhti cha dôveituhpa châ ta, Akhotlâh kaw ta, A pahâ beih leipa a châ. Athihkhih tlu ta a karâ hneina kawh ta, Thina hawhta â daih a tah beih leipa a châ. Ano lâta râh zydua awpakhy ta, Ano lâta phopi zydua a pahmaoh ei.”

Kaldia mo hupona

⁶ Cha zydua chata Kaldia cha, Pasipasawhpa ta pahneisao ei ta, Hetana heta reichakiana biezy ama rei thlu: “Parupa ta a hneirôhpa cha a hupo ta, Sôhkâzy â pathlu pâpa chhao a hu a po na, Khachâ ma cha hawhta ama tao aw tly?”

⁷ Leih châ bâhpazy eikhapi ta thyu aw ei ta, Cha thyuhnao aw ei ta, Ama cha chalyusa aw; Âmo châta hraona sôh deita na châ aw.

⁸ Râh hluhpi hrao chi ta, Chyhsa thisaih palopa ta chhaohlei taochhie chi ta, Khihpizy nata a chhôh liata pahrâpa zydua na paraopa vâta, Phopi laibâhpazy ta ama cha hrao hra aw.

⁹ “Chhiena ku thatlôna tawhta a boh awpa ta, Su sâhpa liata a bu a tu thei nawpa ta, A chhôhkha châta athôhna doleipa a tluapa cha, A hu a po na!

¹⁰ Phopi hluhpi chhawh pathlah chi ta, Na chhôhkha nozapa ta na soh; Nâma hrona tlai chhao na pahlei.

¹¹ Alô ta pâhchhô tawhta awh aw ta, Pâkô ta tho hmâna suzy tawhta â chhy aw.

¹² “Thisaih ta khihpi padua ta, Moleina ta khih a paduapa cha, A hu a po na!

¹³ Moh tua u, phopizy ta mei ta a kâ thlâh ha awpa châta hriapasa ei ta, Râhzy ta hraoleipa liata âmosasyh ama rie amâ pathei; Cha cha Pheisaihzy Abeipa taopa châ vei ma?

¹⁴ Tilaipi cha tizy ta a biepa hawhta, Leilô he Abeipa rônahna pahnona ta a bie aw.

¹⁵ “A vaihzy sahma a padosapa cha, A hu a po na! Ama thluahruana mo awpa ta, Ama parina taihta a ôh tawhta na patlaipa tyh ei.

¹⁶ Rônahna châ leipa ta, Nozana ta tlao na bie aw; Nâ chhao doh teh, Na thluahruana â lâna hâh ta! Abeipa ku chachâh lâta nyu cha, Nâ lâ a vy aw ta, Na rônahna cha nozana ta a khu aw.

¹⁷ Lebanaw chô liata Thachahra na hmâpa khata Cha chhei palie aw ta, Sazy na pahleipadiapa khata Na thlah a cha pazo aw. Chyhsa thisaih palopa ta Chhaohlei taochhie chi ta, Khihpizy nata a chhôh liata pahrâpa zydua Na paraopa kha ta a cha chhei palie aw.

¹⁸ “Chyhsapa tao chhyhpa nothlahpa cha, Khâpa phahnaina ma a hnei? Nothlahpa deita châ ta, Haipa bie pachutuhpa a châ. A taotuhpa ta ano kuzô ta tao ta, Bie a reih thai leipa nothlahpazy cha, A ngâ kaw cha!

¹⁹ Thotô hnohta, ‘Thyu teh’ tah ta, Hrona hnei leipa lôtô hnohta, ‘A hra teh,’ A tahtuhpa cha a hu a po na! Cha chata a chhihtha thei aw ma? Moh tua, ngôh nata tâkâ ta pahupa châ ta, Ano liata husona rai hnei vei.

²⁰ Abeipa cha Achhyna o pathaihpa liata pahrâ ta, Leilô zydua a hmiakô liata a chalih mawh sy!”