HABAKU 1 - Mara Bible RV (BSI)

¹ He he hrohsopa Habaku hmôpa aluahna a châ.

Adoleina kyh liata Habaku paphôhna

² Hy Abeipa, na baona cha hiah na ta, Khachâ ma nathlie leipa ta na y aw tly? “Atudaina a y,” cha tah na ta, Châhrasala pachha hlei chi va?

³ Khazia moleina na pahmôsa chi ta, Paraona eina pamosa chi? Raona nata atudainazy ei mohmô ta y ta, Ahryuchhiana pôh ta, A-iekhyhnazy a pôh lymâ.

⁴ Chavâta ryhpa ta yzie hnei khao leipa ta, Pachiana dopa y khao hra vei. Moleipazy ta mosiapazy dôh ei ta, Pachiana doleipa a pua tyh.

Abeipa chyh-eina

⁵ “Phopizy hry liata sai u la, A phapa ta moh teh u, Nama noâh ngaita mawh sy. Nama hro chhôh ta hmo miakha ei tao hai, Ama cha chhopa chhao ta zo ngyu veih ei chi.

⁶ Moh teh u, Kaldia mo ei padua hai ei hih; Âmo cha phopi nôchhiepa châ ei ta, Phopi chahraochatôhpa ama châ; Alei doh nata hâ chahryh ei ta, Chyhsa râhzy a chhu laihpa phopi ama châ.

⁷ Chyhsa rarôh ypa nata chichhihpa châ ei ta, Âmo pha nawpa ta dâh nata ryhpa zy amâ tao.

⁸ Ama arâzy cha, Keihchhohzy hlâta chatlie via ei ta, Zârâh changiezy hlâta amâ hrâh via; Ama arâ pheisaihzy ama tôh lymâ. Ama arâ pheisaihzy cha, Lâhlapi tawhta a vy ei ta, Vâkhieh sa la awpa ta â pathlôpa hawhta amâ zaw.

⁹ Thachahra hmâ awpa ta ama zydua ta amâ vy; Nochhi thlih rupa hawhta pathli ei ta, Sadi hawhta hluhpa ta seizy ama pakhy.

¹⁰ Beizy pasipasawh ei ta, Ryureituhpazy ama pahneisao. Thokhy ta dôhpa khihpizy pahneisao ei ta, Alei pacho thlu ei ta ama la lymâ.

¹¹ Ama thatlôna cha ama khazoh ta tao ei ta, Ama siena liata thlih hawhta ama chanaoh laih; Moleina hmo tao ei ta, Thaileichâpa ta ama y.”

Habaku paphôhna ei nona

¹² Hy Abeipa ei Khazohpa, Ei Mo Pathaihpa, Nâ cha tlyzaw tawhtapa châ va chi ma? Thi aw ma pi. Hy Abeipa, âmo cha Pachiatuhpa châta rao chi ta; Hy Lôpanô, âmo cha, Chhoreituhpa châta na chahnao ei.

¹³ Na mo cha moleina mo nawpa ta pathaih tu ha ta, Paraonazy moh thei vei. Chyhsa ta piehpie kawpa ta hmo a tao nota, Khazia na y molo thlâh haw? Moleipa ta ano hlâta chyhsa sia viapa a palâ nota, Khazia nâ chalih thlah haw?

¹⁴ Khâpa vâta ma chyhsapa he Tilaipi liata ngazy hawhta tao chi ta, Ryureituhpa hnei leipa Âlyhpasazy hawhta na tao tly?

¹⁵ Moleipa ta ama zydua ta keipa ta thua ta, A sao ta âmo cha a patu ha ei; A sao sykhao chhôh liata khô ta, A thapha ta â ly ngaita.

¹⁶ A sao vâta nie pahâhpa nie thei ta, Niedo hluhpi a hneipa vâta, A sao lâ atheihna hlâ ta, A sao sykhao lâta ropahâhpa a hlâ tyh.

¹⁷ Cha hawhta a châ khiahta cha, A sao cha paruapa ta Chôh chanei lymâ aw ta ma, Ngiachhiena rai hnei leipa ta, Phopizy khâ a thie aw ei?