EZRÂ 9 - Mara Bible RV (BSI)

Ahnei pahlaona kyh liata Ezrâ thlahchhâna

¹ Cha hmozy taopa a châ khai nahta, beimachâzy kei lâ a vy ei ta, ei hnohta, “Izarei sawzy nata theihthaipazy nata Livai pathlazy ta he râh liata a vaw pahrâpa phopizy tawhta a panano leipa ei ta, Kâna mo, Hiti mo, Perizi mo, Zebu mo, Amawna mo, Môabâ mo, Izi mo nata Amawri mo hmotaopa pasichhihpazy ama tao hra.

² Ama sawchanôzy cha âmo nata ama sawchapawzy ta lapinô ta hnei ei ta, chatanachata chi pathaihpa cha, cha râh liata phopi hropazy chi nata a pahlaopahlipa ta a y haw. He ngâchhih leina kyh liana heta beimachâzy nata chhituhpazy ama châ pachai,” tahpa ta na chho ei ta.

³ Cha thâtih cha ei theipa nahta, ei viahkao nata ei poh hrie nata, ei sâ nata ei kâhhmi phia na ta, a pachâna pahno leipa ta a tyuh na ta.

⁴ Cha hawhta a pachâna pahno leipa ta zâlâ atheihna hlâ daihti taihta ei tyuh thlâh nota, seichâna tawhta a vaw kuapazy paraona vâta Izarei Khazohpa bie ta a chalyupazy ei kiapâh liata a vaw hmaoh ei ta.

⁵ Zâlâ atheihna daihti liata kâhvileipa ta ei ypa tawhta thyu na ta, ei viahkao nata ei poh a hrie khai hapazy chhaota ei pakhu paneih na ta, Abeipa ei Khazohpa hmiakô lâ ei bâh pazawh na ta, a hnohta,

⁶ “Hy ei Khazohpa y, nâ lâ a vaw heih awpa he ei noza ta ei hmia a chhie kaw dia. Hy ei Khazohpa, eima paraonazy cha eima luh hlâta a sâh via ta, eima thaileichâna ta avâ a kaw daih haw.

⁷ Miah pathlatuhpazy daihti tawhta tanoh taihta thata thailei a châpa eima châ. Eima paraonazy vâta, keimo nata eima beizy nata eima theihthaipazy cha, râh hropa beizy ku liata nata zaozi ta thie awpa ta hlâpa châ pi ta, seichâna lâta a chhi awpa nata hrao awpa ta hlâpa eima châ. Tanoh taihta noza hmiachhiepa ta eima y.

⁸ Tahmâ deikua cha, Abeipa eima Khazohpa ta bohpi leipa chhôh khokheina miah patosa ta, laibâhpazy miah pahlôhpa ta, a su pathaihpa liata abohna miah pie ta. Eima mozy pavâ awpa nata seichâna tawhta a chyhta a hua awpa ta, eima Khazohpa ta miah pasaih ta.

⁹ Seizy châ pi ta, châhrasala eima Khazohpa cha eima seichâna liata miah a heihsai vei. Persia beizy hmiakô liata eima chô liata a zawngiahna a palâsa. Eima Khazohpa o padua ta, a raonazy taopathi awpa ta, eima seichâna tawhta miah pahua ta, Zudâh nata Zerusale liata abohna thokhyzy miah a taopa.

¹⁰ “Hy eima Khazohpa, khâpa eima reih khao aw? Na biepiepazy a heihsai pi ta,

¹¹ châ chakaotuhpa hrohsopazy hmâpa ta, ‘Hnei awpa ta namâ ngia awpa râh cha, a râh liata a pahrâpa phopizy pathaih leina ta a puapa râh châ ta, râh âthaona tawhta achhâna taihta ama pasichhihna nata puana ta a biepa a châ.

¹² Chavâta nama sawchanôzy ama sawchapawzy pahneisa leipa u la, ama sawchanôzy nama sawcha­pawzy pahneisa hra leipa u la, âmo nata adyryhna nata ama byhnâ awna zy tlua khuh vy. Chatanachata thatlôpa ta y aw ei chi ta, râh phana nie aw ei chi ta, râh cha nama sawzy châta chhâzaw ta ama to awpa ryu ta nama paryu thei aw,’ tahpa biepiepazy eimâ heihsai haw.

¹³ Eima chô liata hmo tlôpazy he moleina hmo eima taopazy nata eima thaileichâna lai ngaitapazy vâta a châ. Chatanachôta Hy eima Khazohpa y, eima moleina nata â phuhpa hlâta a nai viapa ta miah hrie chi ta, he hawhta laibâhpazy miah na pahlôh.

¹⁴ Na biepiepazy parao heihpa ta, hmo pasichhihpa a taopa, he phopizy nata eimâ hnei pahlao lymâ aw ma? Cha hawhta eima tao khiahta cha, eima chô liata thata na hiehâhpa ta, laibâhpa nata ahrohpazy y khao leina taihta miah na pahleipadia khai dâhdei ha aw cha zaw!

¹⁵ Hy Abeipa, Izarei Khazohpa y, nâ cha adopa châ chi ta, tanoh ta hmo a ypa hawhna heta, keimo cha laibâhpa a râpazy eima châ. Moh tua, eima thaileichâna chhaota na hmiakô liata eima y hih. Eima thaileichâna vâta, na hmiakô liata a duah thei awpa pakha hmah y ma pi,” tah na ta.