EZRÂ 8 - Mara Bible RV (BSI)

Ezrâ hnohta a vaw kuapazy thyutôna

¹ Hezy he Izarei pho pawhrâhpazy châ ei ta, Bei Âtazezia â bei nota, Babylaw tawhta ei hnohta Zerusale lâ a siepa Izarei sawzy thyutôna a châ:

² Phinehâ pathlazy tawhta Kesao, Ithamâ pathlazy tawhta Dâniah, Dâvi pathlazy tawhta Hâtu,

³ Sekaniah pathlazy tawhta Pârô pathlazy hry liata Zekaria nata a hnohta moh ropa pawtlohpa 150;

⁴ Pâhamôabâ pathlazy tawhta Zerahiah sawchapawpa Eliehônai nata pawtlohpa 200,

⁵ Zatu pathlazy tawhta Sekaniah sawchapawpa Zahâzie nata pawtlohpa 300,

⁶ Adinâ pathlazy tawhta Zawnathâ sawchapawpa Ebe nata pawtlohpa 50,

⁷ Elâmi pathlazy tawhta Athaliah sawchapawpa Zesai nata pawtlohpa 70,

⁸ Sephatiah pathlazy tawhta Mikaila sawchapawpa Zebadiah nata pawtlohpa 80,

⁹ Zôabâ pathlazy tawhta Zehie sawchapawpa Ôbadia nata pawtlohpa 218,

¹⁰ Bâni pathlazy tawhta Zosiphiah sawchapawpa Selômi nata pawtlohpa 160,

¹¹ Bebai pathlazy tawhta Bebai sawchapawpa Zekaria nata pawtlohpa 28,

¹² Azkâ pathlazy tawhta Hâkatâ sawchapawpa Zôhanâ nata pawtlohpa 110,

¹³ hnôh chai ta a vaw tlôpa Adônikâ pathlazy tawhta moh ropa Eliphele, Zuli, Semiah nata pawtlohpa 60 nata

¹⁴ Bikavai pathlazy tawhta Uthai nata Zaku nata pawtlohpa 70 zy ama châ.

Ezrâ ta Livai pathlazy a hrua

¹⁵ Ahavâ lâta a lohpa chavah liata pahmaohpakhy ei na ta, cha liata noh thôh y pi ta. Zawpizy nata theihthaipazy cha moh ei na ta, cha liata Livai pathla pakha chhao hmô leipa na ta.

¹⁶ Chavâta chhituh viapa Elieze, Arie, Semiah, Enâthâ, Zari, Enâthâ, Nâthâ, Zekaria nata Mesulâ zy paawsa na ta, hmo a pahnopa Zôiari nata Enâthâ zy chhao paawsa na ta.

¹⁷ Âmo cha Kâsiphia su liata chhituhpa Idô lâ tuah ei na ta, eima Khazohpa o liata a chakao awpazy a vaw chhi awpa ta, Kâsiphia su liata achhyna o chakaotuhpa Idô nata a unawhzy hnohta kei reih awpa ta ei chho ei.

¹⁸ Khazohpa ku phapa eima chô liata y ta, hmo a pahno thaipa chyhsa Serebiah nata a sawchapawzy nata a heinawhzy pahrawh hleicharie a vaw chhi ei ta. Serebiah cha Mâhli pathlazy hry liatapa châ ta, Mâhli paw cha Livai châ ta, Livai paw cha Izarei a châ.

¹⁹ Hâsabiah nata Merâri pathlazy tawhta Zesai nata a heinawhzy nata ama sawchapawzy pakih vaw sie hra ei ta.

²⁰ Chazy hleikhô ta, Dâvi nata a beimachâzy ta Livai pathlazy bao awpa ta ama raopa Achhyna o chakaotuhpa 220 amâ hlao. Ama zydua ta ama moh roh khaipa a châ.

Abohna châta kâhvileipa ta thlahchhâna

²¹ Chatawhcha keimo nata eima sawzy nata eima hmohneipazy lâpi liata â bohpa ta eima sie thei nawpa ta hiah awpa ta, eima Khazohpa hmiakô liata a panawhpa ta, kâhvileipa ta thlahchhâ awpa ta, Ahavâ chavah liata phuah na ta.

²² “Eima Khazohpa ku cha ano a tluatuhpa zydua chô liata phana châta y tyh ta, a pathiiana hmotaotheina deikua cha, ano a heisaituhpa zydua chô liata a y tyh,” tahpa ta abei eima chho hapa vâta, lâpi liata eima chariahzy tawhta miah vaih awpa pheisaih nata arâ pheisaihzy abei lâta hia awpa ei noza kawpa vâta, kâhvileipa ta thlahchhâna cha ei phuahpa a châ.

²³ Chatanachata kâhvileipa ta ypa ta, abohna châta eima Khazohpa cha hiah pi ta. Eima Khazohpa ta eima hiana cha miah nathlie ta.

²⁴ Theihthaipa pawhrâh viapazy hry liata pahrawh hleino, Serebiah nata Hâsabiah nata ama unawh pahrawhzy panano ei na ta.

²⁵ Bei nata a ryhraokheituhpazy, a beimachâzy nata cha liata a ypa Izarei zydua ta eima Khazohpa o châta ama hlâpa tâkâ, ngôh nata hmobaohzy cha khopathliahna ta pathliahpa ei na ta.

²⁶ Tâkâ talent 650, tâkâ hmobaoh talent 200, ngôh talent 100,

²⁷ dari 1,000 chyu a hripa ngôh biebuh 20, ngôh tlu ta a sôhpa dawh pathliepa a ngia ngaitapa hmobaoh miano ama ku liata hlâ na ta.

²⁸ Ama hnohta, “Abeipa châta pathaihpa châ ei chi ta, hmobaohzy chhao pathaih ei ta, tâkâ nata ngôh zy he Abeipa, châ pathlatuhpazy Khazohpa châta lôhthai thyuna sôh sai a châ.

²⁹ Theihthaipa pawhrâh viapazy nata Livai pathlazy nata Izarei pho pawhrâhpazy hmiakô liata Zerusale liata Abeipa o chhôhpadâhpa liata kho nama pathliah hlâlei cha vaih u la, a vao teh u,” tah na ta.

³⁰ Theihthaipazy nata Livai pathlazy ta Zerusale liata eima Khazohpa o lâ cheih awpa ta, tâkâ nata ngôh nata hmobaoh khopathliahpazy cha la ei ta.

³¹ Chatawhcha Zerusale lâ sie awpa­ ta, thla khana, noh hrawh hleinona noh ta, Ahavâ chavah tawhta pua pi ta. Eima Khazohpa ku cha eima chô liata y ta, lâpi liata miah a byhpa eima chariahzy ku tawhta miah pachha lymâ ta.

³² Zerusale tlô pi ta, cha liata noh thôh y pi ta.

³³ A noh palihna noh ta, tâkâzy, ngôhzy nata hmobaohzy cha eima Khazohpa o liata khopathliah pi ta, Uria sawchapawpa theihthaipa Meremô ku liata eima hlâ. A hnohta Phinehâ sawchapawpa Eliaza chhao y ta. Livai chi Zesua saw­chapawpa Zôzabâ nata Binu sawchapaw­pa Nôdiah zy ama hnohta y hra ei ta.

³⁴ Ngôh nata tâkâ nata hmobaoh zydua cha rei khaipa nata khopathliah khaipa châ ta, â hrina zie chhao ro khaipa a châ.

³⁵ Cha daihti liata, paipatlapa, seichâna tawhta a vaw kuapazy ta Izarei Khazohpa lâta raopa hlânazy hlâ ei ta. Viahchao tôhpa pô hrawh hleino, mietaku tôhpa sychaki nata pô charu, mietakutaw sysari nata pô sari Izarei zydua châta hlâ ei ta. Cha zydua cha Abeipa lâta raopa hlâna sai a châ.

³⁶ Abei biepapuapa cha, Chavah Haosâ lâta beimachâzy nata râhvaotuhpazy pie ei ta, âmo ta zawpi nata Khazohpa o raihriazy cha ama bao lymâ.