EZRÂ 7 - Mara Bible RV (BSI)

Ezrâ thyutôna nata pachuna

¹ Cha hnôhlâ ta, Persia bei Âtazezia â bei nota, Ezrâ cha Babylaw tawhta Zerusale lâ khy ta. Ezrâ cha Seriah sawchapawpa châ ta, Seriah cha Azariah sawchapawpa châ ta, Azariah cha Hikia sawchapawpa châ ta,

² Hikia cha Sâluh sawchapawpa châ ta, Sâluh cha Zadô sawchapawpa châ ta, Zadô cha Ahitu sawchapawpa châ ta,

³ Ahitu cha Amaria sawchapawpa châ ta, Amaria cha Azariah sawchapawpa châ ta, Azariah cha Meraiô sawchapawpa châ ta,

⁴ Meraiô cha Zerahiah sawchapawpa châ ta, Zerahiah cha Uzizi sawchapawpa châ ta, Uzizi cha Buki sawchapawpa châ ta,

⁵ Buki cha Abisua sawchapawpa châ ta, Abisua cha Phinehâ sawchapawpa châ ta, Phinehâ cha Eliaza sawchapawpa châ ta, Eliaza cha theihthai beichaipa Arawna sawchapawpa a châ.

⁶ Ezrâ cha chârohtuhpa châ ta, Abeipa Izarei Khazohpa piepa Mawsi Ryhpa a thai ngaitapa a châ. Abeipa a Khazohpa ku a chô liata a ypa vâta, a hiapa maih abei ta a pie lymâ.

⁷ Bei Âtazezia â beina kô sarina liata, Izarei saw thokhazy, theihthaipa nata Livai pathla thokhazy, hlasathaipazy, chhikao vaituhpazy nata Achhyna o chakaotuhpazy Zerusale lâ khy hra ei ta.

⁸ Ezrâ cha thla pangawhna, Âtazezia abeina kô sarina kô ta Zerusale lâ sie ta.

⁹ Thla khana, noh khana noh ta Babylaw tawhta sie ta, a Khazohpa ku phapa a chô liata y ta, thla pangawhna, noh khana noh ta Zerusale cha tlô ta.

¹⁰ Ezrâ cha Abeipa Ryhpa a chu ta, â chupazy cha hrokhei ta, Abeipa bieraopazy nata pachianazy cha, Izarei liata pachu awpa ta a palôh liahsa tao ta.

¹¹ He he Bei Âtazezia ta theihthaipa Ezrâ hnohta a piepa cha a châ. Theihthaipa Ezrâ cha chârohtuhpa châ ta, Abeipa biepiepazy nata Izarei sawzy châta a bieraopazy kyh liata athaipa a châ.

¹² “Beizy bei Âtazezia ta avâ Khazohpa Ryhpa rohtuhpa theihthaipa Ezrâ ei châ naoh. He hawhpa daihti liana heta thlalôhna na hnohta y mawh sy.

¹³ Ei khinarâh chhôh liata Izarei sawzy tlyma, ama theihthaipazy tlyma, Livai pathlazy tlyma, âmo kho ta Zerusale lâ a sie khohpa maih na hnohta sie awpa ta biepiepa ei papua.

¹⁴ Na ku liata a ypa Khazoh Ryhpa hawhta, Zudâh nata Zerusale thâtih pasia awpa ta, abei nata a ryhraokheituhpa pasarizy ta eima cha tuah.

¹⁵ Abei nata a ryhraokheituhpazy ta âmo lôhthai ta Zerusale liata a ypa Izarei Khazohpa ama piepa tâkâ nata ngôh phaoh aw chi ta,

¹⁶ Babylaw râh zydua liata tâkâ nata ngôh na hmôpazy nata zawpi nata theihthaipazy ta Zerusale liata ama Khazohpa o châta âmo lôhthai ta ama piepazy na phaoh khai aw.

¹⁷ Cha sôhzy cha hmâpa ta, viahchao tôhpazy, mietaku tôhpazy, mietakutawzy nata ama niepa hlânazy nata dopa hlânazy phahnai khoh ngaitapa ta chalei aw chi ta, Zerusale liata nama Khazohpa o liata maisâh liata na hlâ aw.

¹⁸ Tâkâ nata ngôh hmâ laibâhpazy cha, nâ nata na unawhzy ta pha nama tahnazie hawhta, nama Khazohpa khozie ta nama hmâh thei aw.

¹⁹ Na Khazohpa o liata chakaona rai hria nawpa ta hmobaoh ama cha piepazy cha, Zerusale Khazohpa hmiakô liata na hlâ aw ei.

²⁰ Na Khazohpa o châta byuh hropazy y sala, nâma patohpatia awpa chi a châ khiahta cha, abei sôh vaw hmâ lymâ mah y.

²¹ “Kei Bei Âtazezia tlai ta Chavah Haosâ râh liata sôh avaotuhpa zydua hnohta biepiepa ei papua: Avâ Khazohpa Ryhpa rohtuhpa theihthaipa Ezrâ ta a châ hnawpa maih ei cha, phahnai khoh ngaitapa ta nama taopa lymâ aw.

²² Tâkâ talent 100, sâh bai 100, kresawhti tibyh 100, sathaw tibyh 100 nata alôh zy a mâ leipa ta nama vaw pie lymâ aw.

²³ Avâ Khazohpa ta bie a piepa maih, avâ Khazohpa o châta a zydua ta tao lymâpa châ mawh sy. Chataleipatala abei nata a sawchapawzy râh liana heta pathiiana a tlô pathlei aw.

²⁴ Theihthaipazy, Livai pathlazy, hlasathaipazy, chhikao vaituhpazy, Achhyna o liata chakaotuhpazy nata Khazohpa o liata chakaotuhpa hropa zydua cha râhpaw tlyma, leimâ tlyma, hmohneipa chhie tlyma, pacheisa awpa ta ryhpa ta pasaih vei tahpa eima cha pahnosa.

²⁵ “Chatawhcha nâ, Ezrâ y, na ku liata a ypa Khazohpa sona hawhta, Chavah Haosâ lâta a ypa râh zydua pachia awpa ta, na Khazohpa ryhpa a pahnopazy cha, pachiatuhpazy nata ryureituhpazy ta na rao aw ei. Na Khazohpa ryhpa a pahno leipazy cha na pachu aw ei.

²⁶ Na Khazohpa ryhpa nata abei ryhpa a zyh leipa maih cha, hriena pasa ngaitapa ta hriepa châ aw ta, thiepa tlyma, râh tawhta papuapa tlyma, a hmohneipa lapa tlyma, patâhpa tlyma a châ aw,” tah ta.

²⁷ Zerusale liata Abeipa o â ngia ngaitapa ta tobi awpa ta, cha hawhpa hmo cha abei palôh liata sopa ta,

²⁸ abei nata a ryhraokheituhpazy hmiakô liata nata bei pheisaih hyutuhpazy hmiakô ta ei chô liata ngiachhiena a palâsatuhpa Abeipa, miah pathlatuhpazy Khazohpa cha reithaipa ta y mawh sy. Abeipa ei Khazohpa ku ei chô liata a ypa vâta, ei tha a patlô na ta, na sielâh awpa ta Izarei chhituhpazy ei pahmaoh ei.