EZRÂ 6 - Mara Bible RV (BSI)

Dâria biepiepa

¹ Chatawhcha Bei Dâria ta biepie ta, Babylaw liata hmo parohpa sopakhyna o liata châbu parohpazy tlua ei ta.

² Media râh liata Ekabâtanâ khihpi liata abei o liata châchatypa, a chhôh liata he hawhta ropa hmô ei ta:

³ “Biepapuapa: Bei Kôresâ â beina kô khana liata, Bei Kôresâ ta hetana heta bie a papua: Zerusale liata Khazohpa o kyh liata, atheihna hlâna o cha paduapathipa châ sala, â bônazy pa-ipa châ mawh sy. O cha dy sycharu a sâh aw ta, dy sycharu a kawh aw.

⁴ A pâhchhôzy cha alô laipa tlâh thôh ta pachopa châ aw ta, a chô liata tho ta tlâh kha chhôhpa a châ aw. A hryuhna cha abei sôh tawhta piepa a châ aw.

⁵ Khazohpa o liata ngôh nata tâkâ hmobaohzy Nebukaneza ta Zerusale Achhyna o tawhta la ta, Babylaw lâ a phao hapazy chhao, kuakheipa châ sala, Zerusale liata Achhyna o liata âmo su chyu liata so heihpa châ mawh sy. Chazy cha Khazohpa o liata nama soh awpa a châ.

⁶ “Chavâta Chavah Haosâ râh liata râhvaotuhpa Tâtenai, Sethâbôzenai nata ama hrialâhpa Chavah Haosâ râh liata râhvaotuhpazy saih u, Achhyna o a paduapathituhpazy cha tlei teh u.

⁷ Khazohpa o ama sapa cha kheihta hmah tah khuh vy. Zu chyhsa râhvaotuhpazy nata Zu machâzy ta Khazohpa o cha a su parohpa liata paduapathi mawh ei sy.

⁸ Cha dei châ vei, Khazohpa Achhyna o paduapathina kyh liata, Zu machâzy châta nama tao awpa biepiepa ei tao. Hryuhna zydua pahawhpasâh leipa ta, Zu machâzy hnohta pie lymâ awpa châ ta, Chavah Haosâ râh tawhta râhpawzy tawhta piepa a châ aw.

⁹ Avâ Khazohpa lâta raopa hlânazy châta viahchao tôhpazy, mietaku tôhpazy nata mietakuzy â ngiahpa zie ta pie aw ei chi ta, âtâ sâh, alôh, kresawhti nata sathaw chhao, Zerusale liata theihthaipazy ta byuh ama tahpa hawhta nama pie lymâ aw. Chazy cha pathliethlaw leipa ta, noh chareih ta pie lymâ awpa a châ.

¹⁰ Chatanachata avâ Khazohpa a palysapa atheihnazy hlâ aw ei ta, abei nata a sawchapawzy hrona châta thlah ama chhâ tyh aw.

¹¹ Ahy rai ta biepiepa ei taopa he a panano khiahta cha, a o pâkô thliepa châ aw ta, cha chata ano cha chhôpahlie aw ta, a o cha hnaihny thyna ta taopa a châ aw.

¹² Biepiepa he panano awpa ta tlyma, Zerusale liata Khazohpa o parao awpa ta tlyma, a ku a hypa abei tlyma, phopi tlyma cha, cha liata a moh a paysatuhpa Khazohpa ta ano cha parao mawh sy. Kei Dâria ta biepiepa he ei papua. Phahnai ngiah ngaitapa ta zyh awpa a châ,” tah ta.

Achhyna o hlâna

¹³ Chavah Haosâ râh avaotuhpa Tâtenai, Sethâbôzenai nata ama hrialâhpazy ta Bei Dâria châpaphaopa liata biepiepa zydua cha phahnaingiah ngaitapa ta tao ei ta.

¹⁴ Hrohsopa Hâkai nata Idô sawchapawpa Zekaria zy hrohsona bie phuahpa hawhta, Zu machâzy ta o cha sa ei ta, ama hmasie lymâ ta. Izarei Khazohpa biepiepa hawhta nata Persia beizy, Kôresâ, Dâria nata Âtazezia zy biepiepa hawhta, Achhyna o cha sa ei ta, ama paloh haw.

¹⁵ Achhyna o cha Bei Dâria abeina kô charuna, Adar thla, noh thôhna noh ta palohpa a châ.

¹⁶ Izarei sawzy, theihthaipazy, Livai pathlazy nata seichâna tawhta a vaw kuapazy ta a ly ngaitapa ta Khazohpa o cha ama hlâ.

¹⁷ Khazohpa o hlâna liata viahchao tôhpa 100, mietaku tôhpa 200, mietakutaw 400 hlâ ei ta. Izarei zydua châta moleina hlâna atheihna châta, Izarei chi zie hawhta, mie tôhpa pô 12 ama hlâ hra.

¹⁸ Mawsi Châbu liata ropa hawhta, Zerusale liata Khazohpa chakao awpa ta theihthaipazy nata Livai pathlazy cha âmo py chyu liata y awpa ta raopa ama châ.

Zawpakhô kyhchhi

¹⁹ Thla khana, noh hrawh hleipalihna noh liata, seichâna tawhta a vaw kuapazy ta Zawpakhô kyhchhi chay ei ta.

²⁰ Theihthaipazy nata Livai pathlazy cha hmaohkha ta a pathai ei ta, ama zydua ta ama pathaih hapa vâta, Zawpakhô mietakutaw cha, seichâna tawhta a zâ liepazy, theihthaipa chakaona rai ama hrialâhpazy nata âmo châta thie ei ta.

²¹ Atheihna sa cha seichâna tawhta a vaw kuapa Izarei sawzy ta nie ei ta, Izarei râh liata a vaw pahrâpa phopizy pathaih leina tawhta a pananopa ta Abeipa Izarei Khazohpa a chhy awpa ta âmo a pazaopa maihta nie hra ei ta.

²² Thinô pahlao leipa Viahchhâ Kyhchhi cha noh sari chhôh a ly ngaitapa ta hmâh ei ta. Abeipa ta Asuria bei palôh âmo lâ paheisa ta, Izarei Khazohpa o sana liata ama ku tha a patlôpa vâta, Abeipa liata amâ ly ngaita.