EZRÂ 4 - Mara Bible RV (BSI)

Paduapathina a dyuhtuhpazy

¹ Seichâna tawhta a vaw kuapa Zudâh mo nata Benzami mozy ta Abeipa, Izarei Khazohpa Achhyna o ama sapa kyh cha ama khakhaipazy ta ama thei nahta,

² Zerubâbe nata pho pawhrâhpazy lâ vawh ei ta, ama hnohta, “Eima cha sakhei aw, keimo chhao nâmo hawhta nama Khazohpa a chhy hra pi ta, he liata miah a vaw chhituhpa Asuria bei Esâhadô â bei no tawhna khata nâmo Khazohpa lâta atheihna eima hlâ lymâ,” tah ei ta.

³ Châhrasala Zerubâbe nata Zesua nata Izarei pho pawhrâhpa hropazy ta ama hnohta, “Eima Kha­zohpa o sana liata namâ hlao hra nawpa kyh y vei. Persia bei Kôresâ ta bie miah a piepa hawhta, keimo tlai ta Abeipa, Izarei Khazohpa o cha eima sa aw,” tah ei ta.

⁴ Izarei râh liata a vaw y chiehpa chyhsazy ta Zudâh mo cha ama hnabei pady ei ta, o cha sa ngâh lei awpa ta pachhipary ei ta.

⁵ Persia bei Kôresâ a bei chhôh zydua ryhraokheituhpazy hnohta panaopapanazy piepa ta, Achhyna o sa amâ chhuahpa cha patypamâ lymâ ei ta. Persia bei Dâria â beina taihta cha hawhta ama tao lymâ.

⁶ Ahasuarâ â bei nota, â bei pathaona daihti liata, dyuhtuhpazy ta Zudâh nata Zerusale mo leihna châ ano lâ paphao ei ta.

⁷ Âtazezia â bei nota, Bislâ, Mitharedâ, Tabe nata ama hrialâhpazy ta Persia bei Âtazezia lâ châ paphao ei ta. Ama châ ropa cha Aramia reih ta ropa nata paliepa a châ.

⁸ Pheisaih hyutuhpa Rehu nata chârohtuhpa Sisai ta Zerusale mo leihna châ cha, Persia bei Âtazezia hnohta paphao ei ta.

⁹ Pheisaih hyutuhpa Rehu nata chârohtuhpa Sisai nata ama hrialâhpa ryureihtuhpazy, râhvaotuhpazy, hyutuhpazy, Persia mozy, Ere liata a ypazy, Babylaw mozy, Elâmi pathla Susâ liata a ypazy,

¹⁰ chyhsa rônahpa nata phapa Ôsnâpâ ta a chhi ta Samâri khihpizy liata nata Chavah Haosâ râh hropazy liata a sopa phopizy tawhta Bei Âtazezia lâ châ paphao ei ta.

¹¹ He he ama châpaphaopa cha a châ: “Hy Bei Âtazezia, Chavah Haosâ râh liata a ypa châ chakaotuhpazy ta eima châ naoh.

¹² Nâ tawhta keimo lâ a khypa Zuzy kha Zerusale lâ ama sie haw tahpa abei ta vaw pahno mawh sy. Chhorupa nata moleipa khihpi kha paduapathi ei ta, a thokhy paloh ha ei ta, tahmâ â bônazy ama pasiepakao hai.

¹³ He khihpi he paduapathipa ta, a thokhyzy ama paloh tita cha, râhpawzy, leimâzy nata chhiezy pie khoh khao leipa aw ei ta, abei sôh a tlapahnai aw tahpa abei ta pahno mawh sy.

¹⁴ Abei o alôh a paliepa eima châpa vâta, abei nohzaona a hmôtuhpa châ awpa cha, keimo châta khochhih lei kawpa a châ. Chavâta he châ he cha vaw paphao pi ta, eima cha pahnosa.

¹⁵ Châ pathlatuhpazy thâtih rona châbu liata vaw tlua tua awpa ta eima châ haw. He khihpi he chhorupa nata beizy nata râhzy châta tymâna a tlôkhei tyhpa khihpi châ ta, hlâno tawhta abei a dyuh awpa ta a thyu tyhpa khihpi a châzie thâtihzy rona châbu liata na hmô aw. Cha vâna chata he khihpi he roryhrapa ta a y hapa a châ.

¹⁶ He khihpi he paduapathipa châ sala, a thokhyzy palohpa a châ khiahta cha, Chavah Haosâ lâ he râh hnei khao aw va chi tahpa abei eima pahnosa,” tahpa ta.

¹⁷ Abei ta hetana heta achhyna châ a paphao: “Pheisaih hyutuhpa Rehu nata chârohtuhpa Sisai nata ama hrialâhpa Samâri râh nata Chavah Haosâ lâta a ypazy saih u, he hawhpa daihti lia heta nama chô liata thlalôhna y mawh sy.

¹⁸ Châ miah nama vaw paphaopa kha ei hmiakô liata a phapa ta reih ei ta.

¹⁹ Biepiepa tao na ta, tlua ei ta, kha khihpi kha hlâno tawhta abei a thyuhnao tyhpa, abei a paphasai ta a dyuh tyhpa khihpi a châ tlai tahpa hmôpapuapa a châ.

²⁰ Bei thatlôpazy ta Zerusale chô liata ryu vaw reih ei ta. Âmo chata Chavah Haosâ râh zydua chô liata ryureih ei ta, cha beizy lâta râhpawzy, leimâzy, chhiezy ama vaw pie tyh.

²¹ Chavâta chyhsazy cha a chalih awpa ta biepie u la, biepiepa ei papua heih hlâlei khihpi ama paduapathi awpa châ vei.

²² Cha biepiepa tao awpa ta pahawhpasâh khuh vy. Khazia cha hmo cha lai via lymâpa ta, abei châta raona a vaw tlô aw?” tahpa ta.

²³ Bei Âtazezia tawhta châ cha Rehu nata chârohtuhpa Sisai nata ama hrialâhpazy hmiakô liata ama rei khaipa nahta, a chatliepa ta Zerusale liata Zuzy lâ cha sie ei ta, thachahra nata biehneina hmâpa ta ama chalihsa haw.

²⁴ Chatanachata Zerusale liata Khazohpa o raihria cha a chalih ha ta, Persia bei Dâria â beina kô nona taihta â chalih haw.