EZRÂ 3 - Mara Bible RV (BSI)

Maisâh paduapathina

¹ Thla sarina vaw tlô ta, Izarei sawzy ama khih chyu liata ama pahrâ khai nahta, zawpizy reihkha tlapa ta Zerusale liata a hmaohpakhy ei ta.

² Zôzadâ sawchapawpa Zesua nata theihthaipa chakaona rai a hrialâhpazy nata Siati sawchapawpa Zerubâbe nata a heinawhzy thyu ei ta, Khazohpa chyhsa Mawsi Ryhpa liata ropa hawhta, raopa hlânazy hlâ nawpa ta, Izarei Khazohpa maisâh tao ei ta.

³ Maisâh cha a y tyhna su liata padua ei ta, cha râhzy liata a pahrâpa phopizy ama chipa vâta, my nata zâlâ ta hlâpa, raopa hlânazy cha maisâh liata ama hlâ tyh.

⁴ Ryhpa liata ropa hawhta, Byureih Kyhchhi hmâh ei ta, noh chareih ta hlâ awpa zie raopa hawhta raopa hlânazy ama hlâ.

⁵ Cha khai tawhta, raopa hlâna hlâ tyhpazy, thla thieh atheihna hlâ tyhpazy, Abeipa kyhchhi raopa zydua liata atheihna hlâ tyhpazy nata Abeipa lâta lôhthai hmohlâpazy ama hlâ tyh.

⁶ Raopa hlânazy cha thla sarina, noh khana tawhta Abeipa lâta ama hlâ pathao. Abeipa Achhyna o lôbô deikua bô mâh veih ei.

⁷ Chavâta lô nata tho raihria liata zôthaipazy hnohta sôh pie ei ta. Persia bei Kôresâ pasaina hawhta, Lebanaw tawhta tilaipi kiah liata Zôpâ khihpi taihta sidy tho vaw phao awpa ta, Sidaw mo nata Tyre mozy cha nie awpazy, do awpazy nata sathawzy ama pie.

Achhyna o paduapathina

⁸ Zerusale liata Khazohpa o ama tlô tawhta kô nona, thla nona liata, Siati sawchapawpa Zerubâbe nata Zôzadâ sawchapawpa Zesua nata ama heinawh theihthaipazy, Livai pathlazy nata seichâna tawhta Zerusale lâ a vaw liepa zydua ta Achhyna o paduapathina rai hria pathao ei ta. Kô kih tawhta chô lâ Livai pathlazy cha Abeipa o sana raihria hyutuhpazy ta ama rao.

⁹ Zesua nata a sawchapawzy nata a unawhzy, Zudâh pathla Kâdamie nata a sawchapawzy, Henadâ sawchapawzy, Livai pathlazy nata ama sawchapawzy nata ama unawhzy ta Khazohpa o liata raihriatuhpazy cha ama mohôh.

¹⁰ Osatuhpazy ta Abeipa Achhyna o lôbô ama bô nahta, theihthaipazy ta ama theihthaipa chysiazy ta a tobipa ta, chiahmiezy chabapa ta hmia lâ vaw pua ei ta, Livai chi Asâpha pathlazy chhao paotlâzy chabapa ta, Izarei bei Dâvi biepiepa hawhta Abeipa reithai awpa ta vaw pua hra ei ta.

¹¹ Abeipa liata amâ lyna nata ano reithaina cha, “Abeipa cha pha ta, A zawngiahna cha, Izarei chô liata chhâzaw ta a y,” tahpa ta hla ta amâ chhy palie. Abeipa o lôbô ama bô hapa vâta, zawpi zydua ta ao paro ngaitapa ta awh ei ta, Abeipa ama reithai.

¹² O hmiatuapa a vaw hmô hapa theihthai pawpipa, Livai chi pawpipa nata pho pawhrâhpa hluhpizy deikua cha, o lôbô bôpa ama hmô nahta, chyhsa hluhpi a lypa ta ama awh hai nota, aoh tlili ta ama cha.

¹³ Zawpizy cha ao paro ngaitapa ta awh ei ta, lâhlapi tawhta ama pyu thei theipa a châ. Chavâta chyhsazy ta alyna vâta awhpa ao ma, zawpi chapa ao ma tahpa chhao pachhaih thei khao veih ei.