EZRÂ 10 - Mara Bible RV (BSI)

Izarei sawzy ta ama moleina ama palâhâh

¹ Ezrâ cha Khazohpa o hmiakô liata â khu lâta pao ta, chana chôta thlahchhâ ta, moleinazy palâhâh ta reihpha a chei hai nota, Izarei saw hluhpi, chapawzy, chanôzy nata hawtizy ano lâ a vaw hmaoh ei ta, aoh tlili ta cha ei ta.

² Elâmi pathla Zehie sawchapawpa Sekaniah ta Ezrâ hnohta, “Eima Kha­zohpa châta ngâ a chhih khao leipa pi ta, he râh liata chihropa chanôzy lapinô ta vaw hnei pi ta, cha hawhta a châpa chhao ta, Izarei châta hnabeiseihna a y chy.

³ Chavâta ei zibeipa nata eima Khazohpa biepiepa ta a chalyupazy ryhraokheipa hawhta, Izarei sawzy ta chihropa zuah lapinô ta ama hneipa zydua nata ama sawzy papua khai awpa ta, eima Khazohpa liata bie hraih ei suh u. Cha hawhta eima tao tita deikua cha, Ryhpa hawhta taopa châ mawh sy.

⁴ Thyu la, tao mah y, na maophaohna mah a châ tâh, na hnohta eima y. Thatlôpa ta y la, tao mah y,” tah ta.

⁵ Ezrâ cha thyu ta, theihthaipa pawhrâh viapazy, Livai pathlazy nata Izarei saw zydua cha, cha bie hawhta tao awpa ta bie pataihsa ta. Chatanachata bie a taih ei ta.

⁶ Ezrâ cha Khazohpa o hmiakô tawhta a pasie ta, Eliasi sawcha­pawpa Zôhanâ chhôhpadâhpa liata a ngia ta. Seichâna tawhta a vaw kuapazy ngâchhih leina kyh liata mâchhie a sapa vâta, viahchhâ nie leipa nata ti chhao do leipa ta, cha liata azozâkhihdei y ta.

⁷ Seichâna tawhta a vaw kuapa Zudâh râh nata Zerusale liata a ypa zydua hnohta Zerusale liata a hmaohpakhy awpa ta bie papuapa châ ta.

⁸ Ahy rai chhituhpazy nata machâzy biepiepa hawhta, noh thôh chhôh ta a vaw tlô leipa cha, a hmohneipa zydua patu khaipa châ aw ta, ano chhao seichâna tawhta a vaw kuapazy py tawhta papuapa a châ aw tahpa bie papuapa a châ.

⁹ Zudâh nata Benzami mo zydua noh thôh chhôh ta Zerusale liata a hmaohpakhy ei ta. Thla chakina, noh kihna noh ta amâ hmaohpakhy. Zawpi zydua cha Khazohpa o tlyhmia kawhpa liata a tyuh ei ta, cha biezy vâta nata vâsua ru ngaitapa vâta thata a chalyu ei ta.

¹⁰ Theihthaipa Ezrâ a kaw duah ta, ama hnohta, “Ngâchhihna pahlei ei chi ta, chihropa chanô nama hneipa vâta, Izarei thaileichâna papôhsapa a châ.

¹¹ Chavâta tahmâ Abeipa, châ pathlatuhpazy Khazohpa liata nama moleinazy palâhâhpa ta reihpha cheih u la, a khopa tao u la, he râh liata a pahrâpa phopizy nata chihropa lapinô ta nama hneipazy tawhta a panano teh u,” tah ta.

¹² Zawpi zydua ta ao paro ngaitapa ta a chhy ei ta, “Chata châ mawh sy; na reipa hawhta eima tao aw.

¹³ Anodeikua zawpi he hluh tlôh pi ta, avâ hra ru ngaita ta, khôtho liata a duah thei khao ma pi. Cha kyh liata thata hmo vaw parao ha pi ta, chavâta cha hmo cha noh kha noh no ta tao thei awpa chi châ vei.

¹⁴ Eima beimachâzy ta Zawpi zydua vyuhpa ta a duah ei sala, eima khihpizy liata chihropa lapinô a hneipa zydua cha, khihpi to liata machâzy nata ryureituhpazy chhaota, amâ vy nawpa daihti raopa liata a vy lymâ ei sala, chihropa lapinô ta hneipa vâta eima chô liata Khazohpa pathiiana ru ngaitapa cha pakuasapa a châ hlâlei, cha hawhta tao lymâ mawh ei sy,” tah ei ta.

¹⁵ Cha bie cha Asahe sawchapawpa Zawnathâ nata Tikavâ sawchapawpa Zazei deita ta khoh leipa ei ta, Livai chi Mesulâ nata Sabethai ta âmo cha a châh ei ta.

¹⁶ Seichâna tawhta a vaw kuapazy deikua cha, cha hawhta tao ei ta. Theihthaipa Ezrâ ta ama pho yzie lymâ hawhta ama moh ropa ta pho pawhrâhpazy a tlyh ta. Thla hrawhna, noh khana noh ta, cha bie cha pachâ awpa ta a tyuhpakhy ei ta.

¹⁷ Thla khana, noh khana noh ta, chihropa chanô a hneipa chapawzy cha pahno khai ei ta.

Chihropa hneipa vâta thailei a châpazy

¹⁸ Hezy he theihthaipa sawzy hry tawhta chihropa chanô lapinô ta a hneipazy ama châ: Zôzadâ sawchapawpa Zesua pathlazy nata a unawhzy tawhta Mâsei, Elieze, Zari nata Kedaliah zy châ ei ta,

¹⁹ âmo chata ama lapinôzy a chhaih awpa ta bie a taih ei ta, ama thaileichâna atheihna hlâna châta mietaku zaw tawhta mietaku tôhpa pô kha ama hlâ.

²⁰ Ahropazy cha Ime pathlazy tawhta Hânani nata Zebadiah;

²¹ Hâri pathlazy tawhta Mâsei, Elaizâh, Semiah, Zehie nata Uziah;

²² Pâsu pathlazy tawhta Eliônai, Mâsei, Ismela, Nethane, Zôzabâ nata Eliasâ zy ama châ.

²³ Livai pathlazy tawhta Zôzabâ, Simei, Kelitâ ama tahpa Keliah, Pethâhiah, Zudâh nata Elieze zy châ ei ta,

²⁴ hlasathaipazy tawhta Eliasi nata chhikao vaituhpazy tawhta Sâluh, Tele nata Uri zy ama châ.

²⁵ Hezy he Izarei sawzy hry liata chihropa lapinô ta a hneipazy ama châ: Pârô pathlazy tawhta Ramiah, Iziah, Mâkia, Mizami, Eliaza, Hâsabiah nata Beniah;

²⁶ Elâmi pathlazy tawhta Mâtaniah, Zekariah, Zehie, Abadi, Zeremô nata Elaizâh;

²⁷ Zatu pathlazy tawhta Eliônai, Eliasi, Mâtaniah, Zeremô, Zabâdi nata Aziza;

²⁸ Bebai pathlazy tawhta Zehôhanâ, Hânaniah, Zabai nata Athlai;

²⁹ Bâni pathlazy tawhta Mesulâ, Mâluh, Adiah, Zasu, Sialâ nata Zeremô;

³⁰ Pâhamôabâ pathlazy tawhta Adanâ, Khelâ, Benai, Mâsei, Mâtaniah, Bezale, Binu nata Manase;

³¹ Hâri pathlazy tawhta Elieze, Isizah, Mâkia, Semiah, Simeôna,

³² Benzami, Mâluh nata Semariah;

³³ Hâsu pathlazy tawhta Mâtenai, Mâtatâh, Zabâ, Eliphele, Zeremai, Manase nata Simei;

³⁴ Bâni pathlazy tawhta Mâdai, Amrâ, Ule,

³⁵ Benai, Bedei, Keluhi,

³⁶ Vâniah, Meremô, Eliasi,

³⁷ Mâtaniah, Mâtenai nata Zaâsu;

³⁸ Binu pathlazy tawhta Simei,

³⁹ Selemiah, Nâthâ, Adiah,

⁴⁰ Mâkhanâdebai, Sasai, Sarai,

⁴¹ Azare, Selemiah, Semariah,

⁴² Sâluh, Amaria nata Zawsi;

⁴³ Nebô pathlazy tawhta Zeili, Mâtithiah, Zabâ, Zebinâ, Zadai, Zôela nata Benai zy ama châ.

⁴⁴ Cha zydua cha chihropa chanô lapinô ta a hneipazy châ ei ta, ama lapinôzy cha ama sawzy chhaota ama pasiesa haw.