EZEKIA 8 - Mara Bible RV (BSI)

Achhyna o papuapaleina

¹ Kô charuna, thla charuna, noh pangawhna noh liata, ei o liata ei tyu thlâh ha nota, Abeipa Zehôvâh ku cha ei chô liata vaw y ta. Zudâh machâzy chhao ei hmiakô liata a tyuh ei ta.

² Moh na ta, chyhsapa pizie a lyupa hmô na ta. A chai a lyupa tawhta a ry lâ cha mei châ ta, a chai chô lâ cha thua patliepa hawhta a khaihpa a châ.

³ A ku a lyupa vaw pazawh ta, ei sâ tô ta na vaw patu ta. Thlahpa ta na chalo ta, alei nata avâ likawh liata na soh ta. Thlahpa chata Khazohpa aluahna ta Zerusale lâ nâ chhi ta. Dôhpachhôh tlyhmia lâ angiana maw thokhy chhikao liata na soh ta. Hia patliasatuhpa, hiatliana khazoh nothlahpa dyuchhai cha, cha su liata a y.

⁴ Cha liata Izarei Khazohpa rônahna hmô na ta, saikao by liata ei hmôpa aluahna hawhna tlai khata a châ.

⁵ Chatawhcha Abeipa ta, “Chyhsa sawchapawpa y, maw lâ na mo khaih teh,” na tah ta. Maw lâ cha ei mo khaih na ta, hiatliana khazoh nothlahpa kha, maisâh chhikao maw lâta angiana liata hmô na ta.

⁶ Abeipa ta ei hnohta, “Chyhsa sawchapawpa y, ama hmotaopa kha na hmô ma? Ei supathaihpa chhao lâhlapi lâ siesai pâ ngâ awpa taihta, he su liata Izarei pathlazy hmo pasichhih ngaitapa taopa kha na hmô ma? A heih tua, he hlâta pasichhih via syulyupazy na hmô via aw,” tah ta.

⁷ Chatawhcha dôhpachhôh tlyhmia ochhi lâ nâ chhi ta, moh na ta, thokhy liata a pyupa hmô na ta.

⁸ Abeipa ta, “Chyhsa sawchapawpa y, thokhy kha khie teh,” na tah ta. Thokhy cha khie na ta, ochhi hmô na ta.

⁹ Abeipa ta, “A ngia la, kha liata moleina pasichhih ngaitapa ama taopazy kha kei moh teh,” na tah ta.

¹⁰ Chatanachata a ngia na ta, hmô na ta. Alyhpasa to nothlahpazy, sahrâhpa pasichhihpa nothlahpazy nata Izarei pathlazy khazoh nothlahpa zydua cha, thokhy pâhchhô a chheipa ta khiepa châ ta.

¹¹ Ama hmiakô liata Izarei pathla machâzy hry tawhta sysari a duah ei ta. Ama hry liata Sâphâ sawchapawpa Zazeniah chhao a duah hra ta. Ama zydua ta ropahâhpa raona byh a chaba chyu ei ta, ropahâhpa khuh meihdo cha avâ lâ kiah ta.

¹² Chatawhcha ei hnohta, “Chyhsa sawchapawpa y, Izarei pathla machâzy ama khazoh nothlahpa chhôhpadâhpa chyu liata y ei ta, zohna liata hmo ama taopazy kha na hmô ma? ‘Abeipa ta miah hmô bao vei, Abeipa ta râh he a siesai ha bao na,’ ama tah khaw,” tah ta.

¹³ “Kha hlâta pasichhih viapa ama taopazy na hmô aw,” tahpa ta eina chho via heih.

¹⁴ Chatawhcha Abeipa o maw thokhy chhikao angiana lâ nâ chhi ta, cha liata chanôzy cha Tâmu chakheipa ta a tyuh ei ta.

¹⁵ Abeipa ta, “Hy chyhsa sawchapawpa y, kha kha na hmô ma? Kha hlâta pasichhih viapa na hmô aw,” na tah ta.

¹⁶ Chatawhcha Abeipa o chhôh tlyhmia lâ nâ chhi ta. Abeipa Achhyna o lâ angiana, aikah nata maisâh likawh liata, chyhsa pakih nata papangawh rachhôh â tyuhpa hmô ei na ta. Abeipa Achhyna o hnôhchhypa ta a tyuh ei ta, nochhi lâ hmiachhypa ta, nochhi lâ tawhta noh a kaw chhipa cha a chhy ei ta.

¹⁷ Abeipa ta ei hnohta, “Hy chyhsa sawchapawpa y, kha kha na hmô ma? Zudâh pathlazy ta he su liata hmo pasichhihpa ama taopazy he, hmo chyh nawhpa ma a châ? Râh he atudaina ta pabiepa ta, ei hie na pahâh via rili amâ chhuahpa ma a châ tly? Moh tua, chhobuh ta ama hnapasu amâ pakhâ huh.

¹⁸ Chavâta kei chhao ta pathi iapa ta hmo ei tao aw. Ei mo ta pahlôh leipa aw ei ta, ngiachhie aw veih ei na. Ao paro ngaitapa ta ei nah liata awh hra ei sala, nathlie aw veih ei na,” tah ta.