EZEKIA 7 - Mara Bible RV (BSI)

Abeipa hiehâhna noh

¹ Abeipa bie ei hnohta vaw tlô heih ta:

² “Hy chyhsa sawchapawpa y, Abeipa Zehôvâh ta Izarei râh hnohta hetana heta a tah: Chhâna! Râh ki palihzy liata chhâna a vaw tlô hai.

³ Chhâna ta tahmâ a cha vaw tlô thlu haw. Na chô liata ei hiehâhna vaw tuah aw na ta, na hroziezy hawhta cha pachia aw na ta, na pasichhihna zydua vâta ei cha hrie aw.

⁴ Ei mo ta cha pahlôh leipa aw ta, cha ngiachhie aw va na. Na hroziezy vâta nata râh chhôh liata hmo pasichhihpa na taopa zydua vâta, viari ei cha thô aw. Chatanachata Abeipa ei châ tahpa nama pahno aw.

⁵ “Abeipa Zehôvâh ta hetana heta a tah: Chhiena! Chhiena sai! Moh teh, chhiena a vaw tlô.

⁶ Chhâna a vaw tlô haw. Chhâna vaw tlô ta, a cha thyuhnao haw. Moh teh, chhâna a vaw tlô.

⁷ Hy râh liata a pahrâpa y, na raona ta a cha vaw tlô thlu haw. Daihti vaw tlô ta, noh â hnia. Tlâhzy chô liata a lypa ta awhna noh châ leipa ta, tyhreihna noh a châ.

⁸ Ei pathiiana na chô liata thlai cha lei thlu aw na ta, na chô liata ei hiehâhna cha ei padia aw. Na hroziezy hawhta cha pachia aw na ta, na pasichhihna zydua vâta ei cha hrie aw.

⁹ Ei mo ta cha pahlôh leipa aw ta, cha ngiachhie aw va na. Na hroziezy vâta nata râh chhôh liata hmo pasichhihpa na taopazy vâta, viari ei cha thô aw. Chatanachata kei cha a hrie theipa Abeipa ei châ tahpa nama pahno aw.

¹⁰ “Moh teh, noh a vaw tlô hai! Na raona noh a vaw tlô haw. Chôchahrei a paw pakai ha ta, apalaina a paw a pabyuh haw.

¹¹ Nôchhiena cha kaw pitloh ta, moleina chôchahrei lâta â lie haw. Ahy hmahta y khao leipa aw ei ta, ama zawpi nata ama hneirôna zy y khao hra leipa aw ta, ama hry liata hmo sôhpazy chhao y tlâ khao aw vei.

¹² Daihti vaw tlô ha ta, noh â hnia haw. Ama zawpi zydua chô liata Khazohpa hiehâhna a vaw tlô awpa vâta, a chaleituhpa ta aly leipa sala, a zuahtuhpa chhao mâchhiesa khah sy.

¹³ A zuahtuhpa nata a chaleituhpa ama pano ta ama hro chhôh zydua cha, a zuahtuhpa ta a râh a zua hapa cha hnei heih khao aw vei. Aluahna cha ama zawpi zydua châta châ ta, phiepa châ aw vei. A moleina vâta, chyhsa ahy hmahta a hrona pabohsa thei aw vei.

¹⁴ “Chiahmie tô ei ta, ato a mâ chiehpa ta a y. Châhrasala ei hiehâhna cha ama zawpi zydua chô liata a ypa vâta, ahy hmahta adyuhna lâ sie veih ei.

¹⁵ Khôtho lâ zaozi y ta, a chhôh liata potlana nata chakâhna a y. Lyurâhpa liata a ypa cha zaozi ta thi aw ta, khihpi liata a ypa cha chakâhna nata potlana ta a palâ aw.

¹⁶ Ahrohpa ama y khiahta cha, tlâhpizy lâ a râ aw ei ta, saikao vachhuhzy hawhta, ama zydua ta ama moleina amâ hrôkhei aw.

¹⁷ Ku zydua thazeipa ta y aw ei ta, pakhu zydua ti hawhta a nai aw.

¹⁸ Latho poh a bu aw ei ta, chichhihna ta a khu aw ei. Ama zydua hmiachhiepa ta y aw ei ta, ama luh zydua a pôlô khai aw.

¹⁹ Ama tâkâzy khiliah liata thy aw ei ta, ama ngôhzy chhao, hmo pathaih leipa hawhta a châ aw. Ama tâkâ nata ngôhzy ta Abeipa hiehâhna noh liata âmo pachha thei aw vei. Ama nodi papai thei leipa aw ta, ama py pabie aw vei. Tâkâ nata ngôh cha, moleina liata ama pao nawpa lâta âmo â chhi tyhpa deita a châ.

²⁰ Tâkâ nata ngôh atobina a ngiapazy cha, apalaina châta hmâh ei ta, tâkâ nata ngôh hmâpa ta, ama nothlahpa pasichhihpazy nata ama hmo pasichhihpazy ama tao. Chavâta chazy cha âmo châta hmo pathaih leipa ta ei tao haw.

²¹ Ama tâkâ nata ngôh cha, chihropazy ku liata hraona sôh ta piepa châ aw ta, lei chyhsa moleipazy hnohta parupa sôh ta pie aw ei na ta, âmo ta ama papuapalei aw.

²² Âmo cha hmô lei a pachâ aw na ta, ei su pasô ngaitapa ama papuapalei aw. Hraotuhpazy ta a ngia aw ei ta, ama papuapalei aw.

²³ “Bâlia daih teh! Râh he thisaih palona moleina ta bie ta, khihpi chhao atudaina ta a bie ha hih.

²⁴ Ama ozy chhu awpa ta, phopizy hry liata phopi chhie chaipa ei vaw chhi aw. Thatlôpazy apalaina pachhâsa aw na ta, ama su pathaihpazy papuapaleipa a châ aw.

²⁵ Nôpona a vaw tlô tita, thlalôhna tlua aw ei ta, châhrasala hmô aw veih ei.

²⁶ Chhiena nata chhiena a patho aw ta, bie pathâhpa nata bie pathâhpa â pazi aw. Hraoleipa ta hrohsopa tawhta aluahna tlua aw ei ta, theihthaipazy tawhta ryhpa lei aw ta, machâzy tawhta ryhraokheina a lei aw.

²⁷ Abei cha mâchhie sa aw ta, abei sawchapawpa chhao hnabeidyna chysia ta a tobi aw ta, râh zawpi kuzy â chalyu aw. Âmo hrozie hawhta ama chô liata patlôsa aw na ta, chyhsa ama pachiazie hawhta âmo chhao ei pachia aw ei. Chatanachata Abeipa ei châ tahpa ama pahno aw.”