EZEKIA 5 - Mara Bible RV (BSI)

Zerusale raona

¹ “Hy chyhsa sawchapawpa y, zaozi tiahpa la la, cha cha sângyutuhpa chaidâh hawhta hmâh la, na sâ nata na kâhhmi ngyu teh. Chatawhcha khopathliahnazy la la, sâ cha su thôh ta pachhaih mah y.

² Su kha cha khihpi dôhna nohzy a chhâ tita, khihpi liah liata mei ta na rao aw. Su kha hropa cha, la aw chi ta, khihpi chheipâh zydua liata zaozi ta na chhawh aw. Su kha hropa heih cha, ziza liata hiepatla aw chi ta, ei zaozi phia aw na ta, ei chadaisa aw ei.

³ Sâbu chyhta la aw chi ta, na viahkao pasipa pawhmao liata na pabyuh aw.

⁴ Sâbu chyhta la heih aw chi ta, mei liata phôh aw chi ta, mei ta na pakâ aw. Cha tawhna chata mei pua aw ta, Izarei pathla zydua lâta a kâ laih lymâ aw.

⁵ “Abeipa Zehôvâh ta hetana heta a tah: He he Zerusale a châ. Phopizy liah liata soh na ta, râhzy ta ei chadôsa.

⁶ Chatanachôta ei ryhpazy a dyuhpa ta, phopi hropazy hlâta thata molei via ta; ei bieraopazy a dyuhpa ta, a chheipâh râhzy hlâta a molei via haw. Ei ryhpazy dytha ei ta, ei bieraopazy a chhih veih ei.

⁷ “Chavâta Abeipa Zehôvâh ta hetana heta a tah: Nama chheipâh phopizy hlâta paru via ei chi ta, ei bieraopazy a chhih leipa ei chi ta, ei ryhpazy zyh hra leipa ei chi ta, nama chheipâh phopizy ryhpa hawh dâhdei chhao ta nama tao leipa vâta,

⁸ Abeipa Zehôvâh ta hetana heta a tah: Pachâ teh u, keima tlai ta châ dyuh aw na ta, phopizy mohmô liata ei cha hrie aw.

⁹ Na pasichhihna zydua vâta, ei tao beih leipa hmo, a tao chhao ei tao heih khao lei awpa cha, na chô liata ei tao aw.

¹⁰ “Chavâta pawzy ta ama sawzy khihpi chhôh liata nie aw ei ta, sawzy ta ama pawzy ama nie aw. Cha hrie aw na ta, na chyhsa laibâhpa zydua cha ziza liata ei hiepatla khai aw ei.

¹¹ Chavâta Abeipa Zehôvâh ta hetana heta a tah: Ei hrona reipa ta ei reih. Na puana nata na pasichhihnazy ta ei supathaihpa na papuapaleipa vâta, ei cha chhawh pathlah ha aw. Ei mo ta cha pahlôh leipa aw ta, cha ngiachhie aw va na.

¹² Na khihsawzy su thôh su kha cha, potlana nata khihpi chhôh liata chakâhna ta ama thi aw. Su thôh su kha hropa cha, na chheipâh zydua liata zaozi ta ama pao aw. Su thôh su kha hropa heih cha, ziza zydua lâta hiepatla aw ei na ta, ei zaozi phia aw na ta, ei chadai aw ei.

¹³ “Cha hawhna chata ei hiehâhna cha papaipa ta, ei pathiiana ama chô liata lei thlu aw na ta, ei palôh a dia ha aw. Chatanachata Abeipa ei châ tahpa pahno aw ei ta, ama chô liata ei ruchhôna a pai tita cha, ei hiatliapa vâ ei ta ei reipa a châzie ama pahno aw.

¹⁴ “Roryhrapa ta cha tao aw na ta, na chheipâh phopi zydua hry liata nata châ chapiapa zydua mohmô liata mohnaochhihpa ta ei cha tao aw.

¹⁵ Hiehâhpa nata ruchhôpa ta thata cha chhoreipa ta, ei cha hrie tita, na chheipâh liata phopizy ta ama mohnaopa nata pasipasawhpa châ aw chi ta, âmo châta zikyurâna nata pachhiparyna na châ aw. Kei, Abeipa ta ei reih haw.

¹⁶ Chakâhna nata raona châtai chichhih ngaitapazy ta ei cha ka ti ei ta, cha pahleipadia awpa ta cha ka aw ei na ta, nama chô liata chakâhna patlôsa via rili aw na ta, nama niedo hmôna hnawh ei chhie ha aw.

¹⁷ Nama chô liata chakâhna nata sahrâhpazy vaw tuah aw na ta, nama sawzy mâchhiesapa ta ama cha tao aw. Potlana nata thisaih ta cha siepahlie aw ei ta, nama chô liata zaozi ei vaw patlôsa aw. Kei, Abeipa ta ei reih haw,” tah ta.