EZEKIA 48 - Mara Bible RV (BSI)

Râh araina

¹ “Hezy he Izarei chizy moh a châ: Maw lâ râhri chhâna tawhta a thaopa ta, Hethalô chapiapa ta Lebôhâmathi lâta sie lymâ ta, Hâmathi dady Dâmaskâ râhri liata a ypa Hâzarenâ taihta nochhi lâ nata notla lâ a ôpa ta, Dânâ ta râh kha a to aw.

² “Asera ta râh kha to aw ta, nochhi tawhta notla lâta Dânâ nata amâ ri aw.

³ “Nâthalai ta râh kha to aw ta, nochhi tawhta notla lâta Asera nata amâ ri aw.

⁴ “Manase ta râh kha to aw ta, nochhi tawhta notla lâta Nâthalai nata amâ ri aw.

⁵ “Epharai ta râh kha to aw ta, nochhi tawhta notla lâta Manase nata amâ ri aw.

⁶ “Rubena ta râh kha to aw ta, nochhi tawhta notla lâta Epharai nata amâ ri aw.

⁷ “Zudâh ta râh kha to aw ta, nochhi tawhta notla lâta Rubena nata amâ ri aw.

⁸ “Zudâh râhri nochhi lâ tawhta notla lâta siepa ta, Abeipa lâ hlâ awpa râh na pahlôh aw. A hâ dy 25,000 châ aw ta, a doh lâ cha, nochhi tawhta notla lâta thliepa ta, chi kha topa râh nata a kho aw ta, a liah liata supathaihpa a y aw.

⁹ Abeipa châta râh nama panano awpa cha, a doh lâ dy 25,000 châ aw ta, a hâ lâ dy 20,000 a châ aw.

¹⁰ Hezy he su pathaihpa châta pahlôh awpazy a châ: Theihthaipazy to awpa ta, maw lâta a doh dy 25,000, notla lâta a hâ dy 10,000, nochhi lâta a hâ dy 10,000, chho lâta a doh dy 25,000 châ aw ta, a liah liata Abeipa supathaihpa a y aw.

¹¹ Cha su pathaihpa cha Zadô pathla theihthaipa panano eihpazy châta a châ aw. Âmo cha Izarei sawzy ama tlei nota, Livai chizy chhao ta ama tlei hapa hawhta tlei hra leipa ei ta, ei bie a zyhtuhpazy tlao ama châ.

¹² Cha cha râh pahlôhpa tawhta âmo châta pahlôh pachhuahpa su pathaihpa a châ aw. Cha cha su pathaih chaipa châ aw ta, Livai chizy râh nata â ri aw.

¹³ “Theihthaipazy râh kiapâh ta sie lymâpa ta, Livai chizy ta râh hnei aw ei ta, a doh lâ dy 25,000, a hâ lâ dy 10,000 a châ aw. A doh zydua dy 25,000 châ aw ta, a hâ zydua dy 20,000 a châ aw.

¹⁴ Râh cha ama zua awpa châ leipa ta, amâ ri awpa châ hra vei. Cha râh pha chaipa cha, Abeipa châta râh pathaihpa a châpa vâta, mohropa hnohta ama pie awpa châ vei.

¹⁵ “A laibâhpa, a hâ dy 5,000 nata a doh dy 25,000 cha, khihpi châta châ aw ta, vâtlâh hmâ awpa a châ. Pahrâna ozy sa nawpa nata a chheipâh sibiepa suzy châta châ aw ta, khihpi cha a liah liata a y aw.

¹⁶ He he khihpi kawhna zie a châ aw: Maw lâta dy 4,500, chho lâta dy 4,500, nochhi lâta dy 4,500, notla lâta dy 4,500.

¹⁷ Khihpi cha sibiepa su hnei aw ta, maw lâta dy 250, chho lâta dy 250, nochhi lâta dy 250, notla lâta dy 250 a châ aw.

¹⁸ Su pathaihpa kiapâh liata râh pahlôhpa châ aw ta, nochhi lâta a doh lâ dy 10,000, notla lâta a doh lâ dy 10,000 a châ aw. Cha râh cha su pathaihpa kiapâh liata y aw ta, a kôvei cha khihpi liata raihriatuhpazy nie awpa a châ aw.

¹⁹ Izarei chizy tawhta khihpi liata raihriatuhpazy ta alei cha ama palie aw.

²⁰ Râh nama pahlôh awpazy cha, a doh nata hâ a khopa châ aw ta, a doh lâ dy 25,000, a hâ lâ dy 25,000 a châ aw. Cha cha su pathaihpa nata khihpi râh châta nama pahlôh awpa a châ.

²¹ “Su pathaihpa nata khihpi râh chavei chachâh ta râh laibâhpazy cha abei eih a châ aw. Su pathaihpa châta râh pahlôhpa dy 25,000 tawhta nochhi râhri taihta sie aw ta, notla lâ chhao râh pahlôhpa dy 25,000 tawhta notla râhri taihta siepa ta, Izarei chizy topa râhzy nata a riaaipa ta a sie lymâ aw. Cha cha abei râh châ aw ta, a liah liata râh pathaihpa nata Achhyna o supathaihpa a y aw.

²² Livai chizy râh nata khihpi râhzy cha abei râh liah liata y aw ta, abei râh cha Zudâh râh nata Benzami râh likawh liata a y aw.

²³ “Chihropazy to awpa râhzy cha hetana heta a châ aw: Benzami ta râh kha to aw ta, nochhi lâ tawhta notla lâta a râhri a sie aw.

²⁴ “Simeôna ta râh kha to aw ta, nochhi lâ tawhta notla lâta Benzami nata amâ ri aw.

²⁵ “Iskâra ta râh kha to aw ta, nochhi lâ tawhta notla lâta Simeôna nata amâ ri aw.

²⁶ “Zebulawna ta râh kha to aw ta, nochhi lâ tawhta notla lâta Iskâra nata amâ ri aw.

²⁷ “Kâdâ ta râh kha to aw ta, nochhi lâ tawhta notla lâta Zebulawna nata amâ ri aw.

²⁸ “Chho lâta Kâdâ râhri cha, Tâmâri tawhta chho lâta sie lymâpa ta, Meribâ Kâdesâ tizy taihta sie aw ta, Izi chavah saopa ta Tilaipi Laipa a tlô aw.

²⁹ “Chazy cha Izarei chizy hnohta ama ryuto châta nama rai awpa râhzy châ ta, chazy cha ama tovyuh chyu a châ aw,” Abeipa Zehôvâh ta a tah.

Khihpi chhikaozy

³⁰ “Hezy he khihpi tawhta puanazy a châ aw: Maw lâta dy 4,500 thlie aw ei chi ta,

³¹ cha chhôh liata chhikao miathôh y aw ta, Rubena chhikao, Zudâh chhikao nata Livai chhikaozy a y aw. Khihpi thokhy chhikaozy cha Izarei chizy moh pachyuhpa ta bi awpa a châ.

³² Nochhi lâta dy 4,500 chhôh liata chhikao miathôh y aw ta, Zawsi chhikao, Benzami chhikao nata Dânâ chhikaozy a châ aw.

³³ Chho lâta dy 4,500 chhôh liata chhikao miathôh y aw ta, Simeôna chhikao, Iskâra chhikao nata Zebulawna chhikaozy a châ aw.

³⁴ Notla lâta dy 4,500 chhôh liata chhikao miathôh y aw ta, Kâdâ chhikao, Asera chhikao nata Nâthalai chhikaozy a châ aw.

³⁵ “Khihpi padôpa ta a seihna zie cha dy 18,000 châ aw ta, cha noh tawhta cha, khihpi moh chhao, Zehôvâh Sâmâ tahpa a châ bâ aw.”