EZEKIA 47 - Mara Bible RV (BSI)

Achhyna o tawhta a lohpa tlâhna chavah

¹ Chatawhcha Achhyna o ochhi lâ na kuakhei ta, Achhyna o châkeih ry tawhta nochhi lâta ti a lohpa hmô na ta. Achhyna o cha nochhi lâ a heihpa a châ. Ti cha maisâh chho lâta a ypa Achhyna o chachâh lâta châkeih ry tawhta vaw loh ta.

² Chatawhcha maw chhikao lâ tawhta na puakheipa ta, khôtho lâ nâ chhi ta, nochhi lâ a heihpa chhikao taihta na siekhei ta. Chho lâ tawhta ti vaw loh ta.

³ Chyhsa chata thliena ri chabapa ta nochhi lâ sie ta. Dy sâh kha thlie ta, ti cha na chakasa ta, lobyuh taih a pha.

⁴ Dy sâh kha thlie heih ta, ti cha na chakasa heih ta, pakhu taih pha ta. Dy sâh kha thlie heih ta, ti cha na chakasa heih ta, chai taih pha ta.

⁵ Dy sâh kha thlie heih ta, ti cha a lai kaw bâpa vâta, ei chaka thei leipa chavah vaw châ ha ta. A zaw khi ta âthupa, chaka thei lei awpa chavah vaw châ ha ta.

⁶ Chatawhcha ei hnohta, “Chyhsa sawchapawpa y, kha hmo kha na hmô ma?” na tah ta. Chavah ngiahkâ lâ na kuakhei heih ta.

⁷ Ei kua nahta, chavah ngiahkâ tlykha ta, hesâ nata haosâ ta tho hluhpi vaw y ta.

⁸ Chyhsa chata ei hnohta, “He ti he nochhi râh lâta loh lymâpa ta, Arabâ râh liata loh laih ta, tilaipi liata â ngia. Tilaipi liata â ngia nahta, tilaipi ti iahpa cha ti pathaihpa a pachâsa haw.

⁹ Chavah lona maih liata, hmohrohneipa to hroh aw ei ta, nga hluhpi ama y aw. Tilaipi tizy a pathaih thei nawpa nata chavah lona maih liata ato a hroh thei nawpa ta, he chavah he a lohpa a châ.

¹⁰ Nga patutuhpazy tilaipi kiah liata a duah aw ei ta, Enkedi tawhta Enekalai taihta sao paraina su a châ aw. A ngazy cha, Tilaipi Laipa ngazy hawh tlai ta, nga chi nanopa hluhpi ama y aw.

¹¹ Chiatlao nata tichhoh zy deikua cha, pathaih leipa aw ei ta, alôh khaoh châta siesaipa ama châ aw.

¹² A chavah ngiahkâ hesâ haosâ ta, nie awpa theilâpa kô to ama pyuh aw. Ama hna uah beih leipa aw ta, ama thei lo beih aw vei. Supathaihpa tawhta a lohpa chavah ta pasapa ama châpa vâta, thla tato ta ama pathei aw. Ama thei cha niepa châta châ aw ta, ama hnazy cha tlâhna châta a châ aw.

Izarei râhrizy

¹³ “Abeipa Zehôvâh ta hetana heta a tah: He he Izarei chi hrawh hleinopazy châta ama ryuto râh ta na rai awpa râhri pachhaihnazie a châ. Zawsi ta vyuh no a to aw.

¹⁴ Châ pathlatuhpazy hnohta pie awpa ta ku chaluahpa ta bie ei taihpa râh cha, â khopa ta namâ rai awpa a châ. Cha râh cha nama ryuto râh a châ aw.

¹⁵ “He he a râh pôhpalôhpa râhri awpa a châ: Maw lâta Tilaipi Laipa tawhta Hethalô lâpi lâta sie lymâpa ta Lebôhâmathi chapiapa ta Zedâ tlô aw ta,

¹⁶ Berôthâ lâta sie lymâ aw ta, Dâmaskâ nata Hâmathi râhri liata a ypa Sibarai chapiapa ta, Haurâ râhri liata a ypa Hâzehatikô taih a châ aw.

¹⁷ Chatanachata râhri cha tilaipi tawhta maw lâta Dâmaskâ râhri liata a ypa Hâzarenô taihta châ aw ta, maw lâ cha Hâmathi râh nata â ri aw. Cha cha maw lâta râhri a châ aw.

¹⁸ “Nochhi lâta râhri cha, Haurâ nata Dâmaskâ likawh liata sie lymâ aw ta, Kilia nata Izarei râh likawh ta Zudâh chavah saopa ta, nochhi tilaipi lâta sie aw ta, Tâmâri a tlô aw. Cha cha nochhi lâta râhri a châ aw.

¹⁹ “Chho lâta râhri cha, Tâmâri tawhta sie lymâpa ta Meribâ Kâdesâ tizy tlô aw ta, Izi chavah saopa ta Tilaipi Laipa liata a chhâ aw. Cha cha chho lâta râhri a châ aw.

²⁰ “Notla lâta râhri cha, Lebôhâmathi dady liata Tilaipi Laipa taih a châ aw. Cha cha notla lâta râhri a châ aw.

²¹ “Cha râh cha Izarei chi yzie hawhta nama hry liata namâ rai aw.

²² Râh cha Izarei sawzy ta nama ryuto râh ta a rai aw ei chi ta, nama hry liata chihropa a pahrâpa, nama hry liata saw a hnei hapazy chhao nama rai hra aw. Âmo cha Izarei saw ta a pihpa hawhta châ aw ei ta, Izarei chizy hry liata, nâmo hawhta ryuto râh ama hnei hra awpa a châ.

²³ Kheihawhpa Izarei chi hry rai ta chihropa cha khihsa sala, cha liata a ryuto râh nama pie hra awpa a châ,” Abeipa Zehôvâh ta a tah.