EZEKIA 46 - Mara Bible RV (BSI)

Abei nata kyhchhizy

¹ “Abeipa Zehôvâh ta hetana heta a tah: Dôhpachhôh tlyhmia chhi­kao nochhi lâ a heihpa cha, raihriana noh noh charu chhôh khawpa châ aw ta, Pahânoh liata deikua pahypa a châ aw. Thla thiehpa noh liata chhao pahypa a châ aw.

² Abei cha aikah chhikao lâ tawhta a ngia tyh aw ta, chhikao tôh kiapâh liata â duah aw. Theihthaipazy ta abei ta a hlâ awpa raopa hlâna nata aryhna hlânazy a chhuanoh awh ei ta, abei cha chhikao châkeih liata Khazohpa â chhy aw. Chatawhcha pua aw ta, chhikao deikua cha zâlâ taihta khawpa châ aw vei.

³ Pahânohzy nata thla thiehpazy liata, râh zawpizy cha chhikao o angiana kiapâh liata a bôh aw ei ta, Abeipa amâ chhy tyh aw.

⁴ Pahânoh ta abei ta Abeipa lâ raopa hlâna a hlâ awpa cha, seina hnei leipa mietakutaw pô charu nata seina hnei leipa mietaku tôhpa pô kha lymâ a châ aw.

⁵ Mie tôhpa chhaota hlâ awpa niepa hlâna cha kachu hmo kha châ aw ta, mietakutawzy chhaota hlâ awpa niepa hlâna deikua cha, a hlâ theipa zie a châ aw. Niepa hlâna kachu miakha liata, sathaw chhiehraôh ôh palih lymâ a hlâ aw.

⁶ Thla thiehpa noh liata, viahchao hri tawhta viahchao tôhpa pô kha, mietakutaw pô charu nata mietaku tôhpa pô kha hlâ aw ta, chazy cha seina hnei leipa ama châ awpa a châ.

⁷ Niepa hlâna châta viahchao tôhpa pô kha liata kachu hmo kha, mietaku tôhpa pô kha liata kachu hmo kha a chhuanoh aw ta, mietakutawzy liata deikua cha, a hlâ theipa zie a hlâ aw. Niepa hlâna kachu miakha liata, sathaw chhiehraôh ôh palih a hlâ lymâ aw.

⁸ Abei cha Achhyna o dôhpachhôh tlyhmia lâ â ngia tita, aikah chhikao o lâ tawhta a ngia aw ta, cha lâ tawhta a pua heih tyh aw.

⁹ “Kyhchhi nohzy liata, râh zawpizy ta Abeipa a chhy awpa ta a hmiakô liata amâ vy tita, maw chhikao lâ tawhta a ngiapazy cha, chho chhikao lâ tawhta pua aw ei ta, chho chhikao lâ tawhta a ngiapazy cha, maw chhikao lâ tawhta ama pua aw. Ahy hmahta amâ ngiana chhikao lâ tawhta amâ lie awpa châ leipa ta, chyhsa to ama hmia lâta ama sie lymâ awpa a châ.

¹⁰ Zawpi ama ngia tita, abei chhao ama hnohta a ngia aw ta, zawpi ama pua tita, abei chhao a pua hra aw.

¹¹ “Kyhchhi nohzy nata chaypizy liata, viahchao tôh dawpa pô kha liata niepa hlâna kachu hmo kha lymâ hlâ awpa châ ta, mietaku tôhpa pô kha liata kachu hmo kha châ hra aw ta, mietakuzy châta deikua cha, a hlâ theipa zie a hlâ aw. Niepa hlâna kachu hmo kha liata, sathaw chhiehraôh ôh palih lymâ a hlâ aw.

¹² Abei ta Abeipa lâta lôhthai hmohlâpa châta raopa hlâna tlyma, aryhna hlâna tlyma a hlâ tita, nochhi lâ a heihpa chhikao cha ano châta pahypa châ aw ta, Pahânoh ta a taopa hawhta, raopa hlânazy nata aryhna hlânazy cha a hlâ aw. Cha khai tawhta pua aw ta, a pua khai tawhta chhikao cha khawpa a châ aw.

¹³ “Noh chareih ta Abeipa lâta raopa hlâna châta mietakutaw kô khapa seina hnei leipa hmâh aw chi ta, my chareih ta nâ chhuanoh aw.

¹⁴ Sahrohzy chhaota hlâ awpa ta, my chareih ta niepa hlâna a chhuanoh aw chi ta, viahdie kachu hmo charu hmo kha nata viahdie padâna châta sathaw chhiehraôh ôh kha cha, Abeipa lâta niepa hlâna châta nâ chhuanoh tyh aw. Cha cha chhâzaw châta bieraopa a châ.

¹⁵ Cha hawhna chata raopa hlâna hlâ lymâ nawpa châta, mietakutaw nata niepa hlâna nata sathaw zy my chareih ta a chhuanoh awpa a châ.

¹⁶ “Abeipa Zehôvâh ta hetana heta a tah: Abei ta a sawchapawpa ahy hnohta tlyma ryuto râh a pie khiahta cha, a sawchapawzy eih a châ aw. Ryuto râh ta ama topa a châ.

¹⁷ A chakaotuhpa ahy hnohta tlyma ryuto râh a pie khiahta deikua cha, khotalaina kô taihta hnei aw ta, cha khai tawhta râh cha abei lâ a kua heih awpa a châ. Abei râhzy cha a sawchapawzy eih a châ, âmo ta ama to aw.

¹⁸ Râhsawzy cha abei ta ama ryuto râhzy tawhta papuapa ta, ahy ryuto râh hmah a chhu awpa châ vei. A sawchapawzy cha, ano râh tawhta ama ryuto râhzy a pie awpa ei a châ. Chatanachata ei phopi chyhsa ahy hmahta a ryuto râh tawhta papuapa châ aw veih ei.”

Hmohlâpa chhona suzy

¹⁹ Chatawhcha chyhsa chata theihthaipazy chhôhpadâhpa pathaihpa maw lâta chhikao kâ liata a ypa angiana lâ nâ chhi ta. Notla chhâna lâta su miakha vaw y ta.

²⁰ Chyhsa chata ei hnohta, “He he theihthaipazy ta thaileichâna hlâna nata moleina hlâna ama chho nawpa su châ ta, niepa hlâna ama pakâh nawpa su a châ. Chatanachata hmohlâpazy cha dôhpachhôh khôtho tlyhmia lâ puakhei leipa aw ei ta, zawpizy chô liata pathaihna pakiasa aw veih ei,” tah ta.

²¹ Chatawhcha dôhpachhôh khôtho tlyhmia lâ nâ chhipa ta, tlyhmia ki palihpazy na chahryhsa ta. Tlyhmia ki to liata tlyhmia hropa vaw y ta.

²² Tlyhmia ki palihzy liata tlyhmia chyhpazy y ta, cha tlyhmia chyhpazy cha a doh lâ dy sypalih seihpa ta, a hâ lâ dy sythôh kawh ta, amâ kho khai.

²³ Tlyhmia chyhpazy chhô liata, tlyhmia chadôpa ta alô paraihpa tlâhzy y ta, alô tlâhzy ry liata lômathuzy a y.

²⁴ Chyhsa chata ei hnohta,, “Hezy he beihchhona suzy châ ta, Achhyna o liata chakaotuhpazy ta zawpi tawhta atheihna ama hlâpazy ama chho nawpa su a châ,” tah ta.