EZEKIA 45 - Mara Bible RV (BSI)

Râh araina

¹ “Ryuto châta râh namâ rai tita, râh su kha cha Abeipa châta râh pathaihpa châta nama panano awpa a châ. A doh lâ dy 25,000, a hâ lâ dy 20,000 châ aw ta, a zydua ta râh pathaih­pa a châ aw.

² Cha tawhtapa cha supathaihpa châta a doh nata hâ a khopa su miakha, a dôh lâ dy 500, a hâ lâ dy 500 ta taopa châ aw ta, su tlyhpa dy sypangawh a kawhpa ta a chadô aw.

³ Râh pathaihpa châta thliepa tawhna chata, a doh dy 25,000 nata a hâ dy 10,000 thlie aw chi ta, cha liata supathaihpa y aw ta, cha cha Su Pathaih Chaipa a châ aw.

⁴ Cha cha râh chhôh liata râh pathaihpa châ aw ta, supathaihpa liata a chakaotuhpa nata Abeipa chakao awpa ta a hniapa theihthaipazy y nawpa a châ aw. Theihthaipazy o sa nawpa nata supathaihpa sa nawpa râh pathaihpa a châ aw.

⁵ A su hropa khophie cha, Achhyna o liata a chakaopa Livai chizy châta châ aw ta, a doh lâ dy 25,000, a hâ lâ dy 10,000 a châ aw. Cha cha Livai chizy ta ama tovyuh châta ama hnei awpa khihpizy a châ aw.

⁶ “Râh pathaihpa châta pananopa su kiapâh liata, khihpi râh rao aw ei chi ta, a hâ lâ dy 5,000, a doh lâ dy 25,000 a châ aw. Cha cha Izarei pathla zydua châta a châ aw.

Abei râh

⁷ “Râh pathaihpa nata khihpi râh chavei chachâh ta a ypa râh cha, abei râh a châ aw. Râh pathaihpa nata khihpi râh râhrizy liata sie lymâ aw ta, notla daih lâ tawhta notla lâta kawh laih aw ta, nochhi daih lâ tawhta nochhi lâta a kawh laih aw. Notla lâ tawhta nochhi lâta doh seihpa ta sie aw ta, Izarei chi miakha nata ama râh a ripa ta a sie lymâ aw.

⁸ Cha cha Izarei liata abei tovyuh râh a châ aw. Keima abeizy ta ei phopi tlybai khao leipa aw ei ta, Izarei pathlazy cha âmo chi chyu ta râh tlao ama pahneisa ha aw.

⁹ “Abeipa Zehôvâh ta hetana heta a tah: Hy Izarei beizy saih u, a daih bâ se! Atudaina nata tlybaina bâhsai u la, ryureina dopa ta ryureih teh u. Siana ta hmo tao u la, ei phopi ama râh tawhta nama papua tyhpa bâhsai teh u, Abeipa Zehôvâh ta a tah.

¹⁰ “Khopathliahna dopa nama hmâ awpa a châ. Kachu dopa hmâh u la, tibyh dopa hmâh teh u.

¹¹ Kachu nata tibyh cha amâ kho awpa a châ. Kachu tiepa tibyh cha, bai tiepa tibyh su hrawh su kha châ aw ta, kachu chhao bai su hrawh su kha a châ aw. Bai cha panuana thliena châta hmâ awpa a châ.

¹² Sekel miakha cha kerâ miakih a châ aw. Sekel miakih, sekel miakih nata miapangawh nata sekel miahrawh hleipangawh pahlyhpa cha minâ miakha a châ aw.

Hmohlâpazy nata kyhchhizy

¹³ “He he hmohlâpa nama hlâ awpa a châ: Âtâ sâh bai kha liata kachu su charu su kha lymâ hlâ aw ei chi ta, bâli sâh bai kha liata kachu su charu su kha nama hlâ lymâ aw.

¹⁴ Sathaw hlânazie awpa cha, râchâ laipa hmo kha liata, tibyh su hrawh su kha hlâ awpa a châ. Râchâ laipa hmo kha cha tibyh hmo hrawh a châ.

¹⁵ Izarei sawzy châta chatlaina tao awpa ta, ti yna Izarei sibiepa suzy liata a tlaihpa mietaku zaw tawhta, mietaku za no liata pô kha lymâ la aw ei chi ta, chazy cha niepa hlâna, raopa hlâna nata aryhna hlânazy châta nama hlâ aw, Abeipa Zehôvâh ta a tah.

¹⁶ He hmohlâpa he, râh chyhsa zydua ta Izarei bei hnohta ama pie tyh aw.

¹⁷ Chatanachata kyhchhi liatazy, thla thiehpa liatazy, Pahânohzy liata nata Izarei pathlazy châta kyhchhi raopazy liata, Izarei pathlazy vyuhpa ta chatlaina tao awpa ta, raopa hlânazy, niepa hlânazy nata dopa hlânazy châta a ngiahpazy cha abei ta a pachâ tyh aw. Izarei pathlazy vyuhpa ta chatlaina tao awpa ta, moleina hlânazy, niepa hlânazy, raopa hlânazy nata aryhna hlânazy châta a ngiahpazy cha, abei ta a pachâ tyh aw.

¹⁸ “Abeipa Zehôvâh ta hetana heta a tah: Thla khana, noh khana noh liata, viahchao hri tawhta seina hnei leipa viahchao tôhpa la aw chi ta, supathaihpa na pathaisa aw.

¹⁹ Theihthaipa ta moleina hlâna thisaih la aw ta, Achhyna o chhikao tôhzy liata nata maisâh tlâhkhai ki palihzy liata nata dôhpachhôh tlyhmia chhikao tôhzy liata a hnia aw.

²⁰ Cha thla noh sarina noh liata, tao pathleipa vâta tlyma, pahno leina vâta tlyma, a moleipazy châta chhao, cha hawhta na tao aw. Cha hawhna chata Achhyna o châta chatlaina na tao awpa a châ.

²¹ “Thla khana, noh hrawh hleipalihna noh liata, Zawpakhô kyhchhi tao aw ei chi ta, noh sari chhôh viahchhâ thinô pahlao leipa nama nie aw.

²² Cha noh liata, abei ta ano nata râh chyhsa zydua châta moleina hlâna châta viahchao tôh dawpa â chhuanoh aw.

²³ Kyhchhi noh sari chhôh zydua ta, Abeipa lâta raopa hlâna châta, seina hnei leipa viahchao tôh dawpa pô sari nata mietaku tôhpa pô sari noh chareih ta â chhuanoh lymâ aw. Moleina hlâna châta chhao, noh chareih ta mie tôhpa pô kha â chhuanoh lymâ aw.

²⁴ Niepa hlâna châta viahchao tôhpa pô kha liata viahdie kachu hmo kha nata mietaku tôhpa pô kha liata viahdie kachu hmo kha lymâ a chhuanoh aw ta, viahdie kachu hmo kha liata sathaw chhiehraôh ôh palih lymâ â chhuanoh aw.

²⁵ “Thla sarina, noh hrawh hleipangawhna noh ta pathaopa kyhchhina noh sari chhôh zydua ta, cha hawhna chata tao aw ta, moleina hlânazy, raopa hlânazy, niepa hlânazy nata sathaw hlâ awpazy châta â chhuanoh lymâ aw.