EZEKIA 44 - Mara Bible RV (BSI)

Abei chhikao

¹ Chatawhcha nochhi lâ a heihpa supathaihpa khôtho chhikao lâ nâ chhi ta. Chhikao cha a vaw khaw ha ta.

² Abeipa ta ei hnohta, “He chhikao he khâ khawpa châ aw ta, pahypa châ aw vei. Abeipa, Izarei Khazohpa angiana chhikao a châpa vâta, ahy hmahta cha chhikao lâ tawhta a ngia aw veih ei. Â khaw ngâ thlâh ha awpa a châ.

³ Abeipa hmia­kô liata viahchhâ nie awpa ta, abei deita ta cha liata â tyuh tyh aw. Aikah chhikao lâ tawhta a ngia aw ta, cha lâ tawh chata a pua heih tyh aw,” tah ta.

⁴ Chatawhcha maw lâ a heihpa chhikao lâ tawhta Achhyna o tlyhmia lâ nâ chhi ta. Moh na ta, Abeipa Achhyna o cha Abeipa rônahna ta a bie khai hapa ta hmô na ta. Â khu lâta pao na ta.

⁵ Abeipa ta ei hnohta, “Chyhsa sawchapawpa y, Abeipa Achhyna o bieraopazy nata a ryhpazy kyh ei cha chho awpa zydua he, a phapa ta ngia la, na mo ta hmô sala, na nah ta thei mawh sy. Achhyna o lâ angiana zydua nata supathaihpa tawhta puana zydua a phapa ta ngia khai mah y.

⁶ Izarei pathla chhorupazy hnohta hetana heta reih mah y: Abeipa Zehôvâh ta hetana heta a tah: Hy Izarei pathlazy saih u, hmo pasichhihpa nama taopa zydua â daih haw.

⁷ Chihropa, pathipalôh nata sapa chopawtaileipazy ei supathaihpa liata pangiasapa ta, ei nie awpa thaw nata thisaih eina hlâpa lia ei chi ta, ei Achhyna o nama papuapalei. Pasichhihpa hmo zydua nama taopa thota, ei biehrai nama parao pâ heih.

⁸ Nâmo ta hmo pathaihpazy mohôh leipa ei chi ta, mohropazy cha nâmo vyuhpa ta ei supathaihpa nama pamohôhsa.

⁹ “Abeipa Zehôvâh ta hetana heta a tah: Pathipalôh nata sapa chopawtaileipa chihropa, Izarei phopi hry liata a ypa chihropa ahy hmahta ei supathaihpa liata amâ ngia awpa châ vei.

¹⁰ Izarei a sie chhei nota, na tleisai ei ta, ama khazoh nothlahpazy pazipa ta, kei tawhta lâ hlapi lâta a sie hapa Livai chizy chhao ama paraona maoh ama phaoh aw.

¹¹ Ei supathaihpa liata chakaotuhpa châ aw ei ta, Achhyna o chhikaozy vaih aw ei ta, Achhyna o chhôh liata chakaona rai ama hria aw. Zawpi ta raona hlâna nata atheihna ama hlâpa sazy thiepa aw ei ta, zawpi chakao awpa ta ama hmiakô liata amâ duah tyh aw.

¹² Ama khazoh nothlahpazy hmiakô liata chakao ei ta, Izarei pathlazy châta moleina liata ahluana lô ama châ tyhpa vâta, ku chaluahpa ta bie ei taih haw. Ama moleina maoh ama phaoh tlai aw, Abeipa Zehôvâh ta a tah.

¹³ Theihthaipa chakaona rai hria awpa ta nâ vaw hnia leipa aw ei ta, ei hmo pathaihpa kheihawhpa hmahta a hnia hra leipa aw ei ta, hmo pathaih chaipazy a hnia aw veih ei. Hmo pasichhihpa ama taopazy vâta, ama nohzaona maoh ama phaoh tlai aw.

¹⁴ Chatahrasala Achhyna o chakaona rai zydua hria awpa nata a chhôh liata tao awpa a ypa maih tao awpa ta, âmo cha Achhyna o mohôtuhpazy ta ei tao aw ei.

Livai chi theihthaipazy châta ryhpazy

¹⁵ “Izarei sawzy ta eina tleisai ha no ei ta ei supathaihpa a mohôhpa, Zadô pathla Livai chi theihthaipazy deikua cha, na chakao awpa ta nâ vaw hnia aw ei ta, thaw nata thisaih na hlâ awpa ta ei hmiakô liata amâ duah aw, Abeipa Zehôvâh ta a tah.

¹⁶ Ei supa­thaihpa liata a ngia aw ei ta, na chakao awpa ta ei tlâhkhai a hnia aw ei ta, nâ mohôtuhpa ama châ aw.

¹⁷ “Dôhpachhôh tlyhmia chhikao liata amâ ngia tita, pala rih dipa chysia amâ ky tyh awpa a châ. Dôhpachhôh tlyhmia chhikaozy liata ama chakao nota, sahmi chysia amâ ky awpa châ vei.

¹⁸ Pala rih dipa khuthozy ama luh liata a khu aw ei ta, pala rih dipa rythozy ama chai liata amâ sai aw. Mathlai a paleisa theipa chysia kheihawhpa hmah ama tobi awpa châ vei.

¹⁹ Ama chysiazy tawhta zawpizy lâta pathaihna a kia pathlei lei nawpa ta, dôhpachhôh khôtho lâta vâtlâh tlyhmia lâ ama pua tita, ama chakaona chysiazy pahluh aw ei ta, chhôhpadâhpa pathaihpazy liata soh aw ei ta, chysia hropazy amâ patly tyh awpa a châ.

²⁰ “Ama luh amâ papôlô awpa châ leipa ta, ama sâ amâ paseih awpa châ hra vei. Â daih thaipa ta ama sâ amâ ngyu awpa a châ.

²¹ Dôhpachhôh tlyhmia lâ amâ ngia tita, theihthaipa ahy hmahta kresawhti ama do awpa châ vei.

²² Nôhmei tlyma, mapa chanô tlyma, lapinô ta ama hnei awpa châ leipa ta, Izarei pathla laihsa kôpa tlyma, theihthaipa ta a thisaipa nôhmei tlyma deita ama hnei awpa a châ.

²³ Ei phopi cha hmo ziehpa nata zieh leipa ananona pachu aw ei ta, hmo pathaihpa nata pathaih leipa ananona ama pachu awpa a châ.

²⁴ “Lyuh atuana a y tita, pachiatuhpa rai hria aw ei ta, ei pachiazie hawhta ama pachia awpa a châ. Kyhchhi ei raopazy liata, ei ryhpazy nata ei bieraopazy ama zyh awpa châ ta, ei pahânohzy ama pathaisa awpa a châ.

²⁵ “Theihthaipazy cha athihpa ri a hniapa ta amâ papuapalei awpa châ vei. Paw tlyma, nô tlyma, sawchapaw tlyma, sawchanô tlyma, unawhpa tlyma, sietanô a vahpa a hnei leipa tlyma a châ khiahta deikua cha, amâ papuapalei thei aw.

²⁶ A pathaih tawhta noh sari a hâ via awpa a châ.

²⁷ Su Pathaihpa liata chakao awpa ta, dôhpachhôh tlyhmia liata nata Su Pathaihpa liata â ngia noh ta, a moleina hlâna a hlâ awpa a châ, Abeipa Zehôvâh ta a tah.

²⁸ “He he ama ryuto a châ aw: Kei he ama ryuto châ na ta, chavâta Izarei liata tovyuh nama pie awpa châ vei. Kei he ama tovyuh awpa cha ei châ.

²⁹ Niepa hlâna, moleina hlâna nata thaileichâna hlâna zy nie aw ei ta, Izarei liata hmo pathaihpa maih cha âmo eih a châ aw.

³⁰ Thei hmiatuapazy hry liata a pha chaipa maih nata nama hmohlâpa to tawhta a pha chaipa maih cha theihthaipazy tovyuh a châ aw. Nama o liata byhnâ a y lymâ thei nawpa ta, viahdie pahlypa pha chaipa cha theihthaipazy hnohta nama pie awpa a châ.

³¹ Theihthaipazy cha, pavaw tlyma, râhsa tlyma, ano kho ta a thipa nata sahrâhpa taipa a châpa chhao ta, kheihawhpa sawhsawpa hmah ama nie awpa châ vei.”