EZEKIA 43 - Mara Bible RV (BSI)

Abeipa rônahna ta Achhyna o a bie

¹ Cha khai tawhta, chyhsa chata nochhi lâ a heihpa chhikao lâ nâ chhi ta.

² Moh teh u, Izarei Khazohpa rônah­na cha nochhi lâ tawhta vaw tlô ta. A vaw tlôpa pyu cha, tilaipi pyu hawhta châ ta, alei cha a rônahna ta khaih ta.

³ Aluahna ei hmôpa cha, khihpi parao awpa ta â vy nota ei hmôpa aluahna nah khata miakhapa châ ta, Khebâ chavah kiah liata aluahna ei hmôpa nah khata miakhapa a châ. Chatawhcha â khu lâta pao na ta.

⁴ Abeipa rônahna cha nochhi lâ a heihpa chhikao lâ tawhta Achhyna o lâ a vaw ngia ta.

⁵ Thlahpa ta na chalo ta, dôhpachhôh tlyhmia chhôh lâ nâ chhi ta. Abeipa rônahna ta Achhyna o cha pabie khai ha ta.

⁶ Chyhsapa kha ei kiapâh liata â dua thlâh ha nota, chyhsa pakha ta Achhyna o tawhta bie einâ vaw chhopa thei na ta.

⁷ Ei hnohta, “Chyhsa sawchapawpa y, he su he ei beidyuchhai y nawpa nata ei pheipazah tly nawpa su châ ta, Izarei sawzy hry liata chhâzaw ta ei pahrâ nawpa su a châ hih. Chatanachata ei moh pathaihpa cha, Izarei pathlazy ta papuapalei khao aw veih ei. Âmo nata ama beizy ta ama sihryhna ta papuapalei khao leipa aw ei ta, ama su sâhpazy liata ama beizy ri pabupa ta papuapalei khao aw veih ei.

⁸ Ama châkeih cha ei châkeih kiapâh ta taopa ta, ama chhikao tôh chhao ei chhikao tôh kiapâh ta bôpa châ aw ta, âmo nata keima likawh liata pâhchhô deita paysapa ta, ei moh pathaihpa cha papuapalei khao aw veih ei. Ama hmotaopa pasichhihpazy ta ei moh pathaihpa papuapalei ei ta, chavâta ei hiehâhna ta âmo cha ei pahleipadia ha ei.

⁹ Tahmâ tawhta deikua cha, ama sihryhna nata ama beizy ri cha, kei tawhta â hlapi ta soh ei sala, ama hry liata chhâzaw ta ei pahrâ aw.

Achhyna o nata maisâh ryhpazy

¹⁰ “Hy chyhsa sawchapawpa y, ama paraonazy vâta ama noza sala, Achhyna o sanazie awpa ama thlie thei nawpa ta, Izarei pathlazy cha Achhyna o nothlahpa pamosa mah y.

¹¹ Ama hmotaopa zydua vâta nozapa ta ama y khiahta cha, Achhyna o sanazie awpazy âmo pahnosa la, a opi yzie, puana nata angiana taozie nata a o pizie zydua pahnosa mah y. Achhyna o ryhpa nata bieraopa zydua zyhpa ta ama tao lymâ thei nawpa ta, Achhyna o bieraopazy nata a ryhpazy pahnosa la, ama mohmô lia tlai ta roh mah y.

¹² He he Achhyna o ryhpa cha a châ: Tlâhpi laki nata a chaby zydua cha su pathaih chaipa a châ aw. Nathlie teh, he he Achhyna o ryhpa cha a châ.

Maisâh

¹³ “Hezy he dy ta maisâh thlienazie châ ta, dy seihpa hmâpa ta, dy khapa cha dy kha nata pazah tie a châ: Patyuna cha dy kha a sâhpa nata dy kha phiapa châ aw ta, a tlâh cha kha kha padai ta pabyuh lymâ awpa a châ. He he maisâh asâhna zie awpa a châ:

¹⁴ Alei liata patyuna tawhta tlâhkhai ahnaipa taihta dy no châ aw ta, a kawhna lâ dy kha a châ aw. Tlâhkhai chyh viapa tawhta tlâhkhai lai viapa taihta dy palih châ aw ta, dy kha a kawh aw.

¹⁵ Maisâh chô a raihpa cha dy palih a sâhpa châ aw ta, maisâh chô a raihpa tawhta ki miapalih â duah awpa a châ.

¹⁶ Maisâh chô a raihpa cha a doh nata a hâ â khopa châ aw ta, a doh lâ dy hrawh hleipalih, a hâ lâ dy hrawh hleipalih a châ aw.

¹⁷ Tlâhkhai chhao a doh nata a hâ â khopa châ aw ta, a doh lâ dy hrawh hleipalih, a hâ lâ dy hrawh hleipalih châ aw ta, a tlâh dy khophie a châ aw. A patyuna cha dy kha ta padôpa châ aw ta, maisâh kahmi cha nochhi lâ â heih awpa a châ,” tah ta.

¹⁸ Chatawhcha chyhsa chata ei hnohta, “Chyhsa sawchapawpa y, Abeipa Zehôvâh ta hetana heta a tah: Hezy he maisâh hmânazie awpa ryhpazy cha a châ: Raopa hlânazy hlâ nawpa nata thisaih thia awpa ta maisâh paduapa a châ noh ta,

¹⁹ na chakao awpa ta nâ vaw hniapa Livai chi Zadô pathla theihthaipazy hnohta, moleina hlâna châta viahchao hri tawhta a tôh dawpa na pie awpa a châ, Abeipa Zehôvâh ta a tah.

²⁰ A thisaih la aw chi ta, maisâh ki miapalih nata a tlâhkhai ki palihzy nata a tlâh padôpazy liata na hnia aw. Cha hawhna chata maisâh cha pathaisa aw chi ta, chatlaina na taopa aw.

²¹ Moleina hlâna viahchao tôhpa la aw chi ta, su pathaihpa khôtho lâta Achhyna o râh su raopa liata rao awpa a châ.

²² A noh nona liata, moleina hlâna châta seina hnei leipa mie tôhpa hlâ aw chi ta, viahchao tôhpa ta maisâh pathaisapa hawhna khata pathaisa awpa a châ.

²³ Maisâh pathaisana na tao khai tawhta, viahchao hri hry tawhta seina hnei leipa viahchao tôhpa nata mietaku zaw hry tawhta seina hnei leipa mietaku tôhpa na hlâ aw.

²⁴ Chazy cha Abeipa hmiakô liata hlâ aw chi ta, theihthaipa ta alôh mia aw ta, Abeipa lâta raopa hlâna châta a hlâ aw.

²⁵ Noh sari chhôh cha, moleina hlâna châta noh chareih ta mie tôhpa hlâ aw chi ta, viahchao hri hry tawhta seina hnei leipa viahchao tôhpa nata mietaku zaw hry tawhta seina hnei leipa mietaku tôhpa zy na hlâ aw.

²⁶ Noh sari chhôh maisâh châta chatlaina tao aw ei ta, ama pathaisa aw. Cha hawhna chata maisâh cha pathaisapa a châ aw.

²⁷ Cha noh raopazy cha ama paki tawhta, a noh chariena noh tawhta, theihthaipazy ta nama raopa hlânazy nata aryhna hlânazy maisâh liata hlâ aw ei ta, chatanachata ei châ pyh aw ei, Abeipa Zehôvâh ta a tah,” tah ta.