EZEKIA 42 - Mara Bible RV (BSI)

Achhyna o chhôhpadâhpazy

¹ Chatawhcha chyhsa chata maw lâta dôhpachhôh tlyhmia lâ nâ chhi ta, su tlyhpa dady liata a ypa maw lâta chhôhpadâhpa lâ einâ chhi.

² A ochhi maw lâ a heihpa o cha, a doh lâ dy za kha seih ta, a hâ lâ dy sypangawh a kawh.

³ Dôhpachhôh tlyhmia lâ nata khôtho tlyhmia lâpi lâ a heihpa ta, chhôhpadâhpa chhâh thôh liata pâhchhôzy liata atyunazy y ta.

⁴ Chhôhpadâhpazy likawh liata, a hâ lâ dy hrawh a kawhpa nata a doh lâ dy za kha a seihpa siepahliena y ta, maw lâ a heihpa ta a ochhizy taopa a châ.

⁵ A chô chai liata a ypa chhôhpadâhpazy cha a buah via. A chhâpa cha, pâhchhô liata atyunazy ta a liah chhâh chhôhpadâhpazy nata a ry chai chhâh chhôhpadâhpa suzy a la hapa vâta a châ.

⁶ Chhâh thôh ta sapa châ ta, dôhpachhôh tlyhmiazy hawhta, atôhzy deikua hnei veih ei. Cha hawhna chata chhôhpadâhpa chô chaipazy cha, a liah chhôhpadâhpa nata chhôhpadâhpa ry chaipazy hlâta pabuah viapa a châ.

⁷ Chhôhpadâhpazy nata a ria-aipa ta, khôtho lâta pâhchhô y ta. Pâhchhô cha chhôhpadâhpazy dady liata y ta, khôtho lâta dôhpachhôh tlyhmia lâ a heih ta, dy sypangawh a seih.

⁸ Khôtho lâta dôhpachhôh liata chhôhpadâhpazy cha dy sypangawh seih ta, Achhyna opi dady liata chhôhpadâhpazy deikua cha dy za kha a seih.

⁹ Cha chhôhpadâhpazy ry liata, nochhi daih lâta angiana y ta, khôtho lâta dôhpachhôh tlyhmia tawhta a ngiapa a châ.

¹⁰ Dôhpachhôh pâhchhô athaona khôtho lâ liata, chho lâ chhâh ta, tlyhmia nata Achhyna opi dady liata chhôhpadâhpazy y ta.

¹¹ Maw lâta chhôhpadâhpazy liatapa hawhta, chho lâta chhôhpadâhpazy hmia liata chhao siepahliena y ta, a doh nata a hâ, a puana nata a ochhizy cha maw lâta chhôhpadâhpa liatapazy nata a lyupa sai a châ.

¹² Chho lâta chhôhpadâhpazy angiana chhao maw lâtapa nata â lyu. Siepahliena athaona liata angiana miakha y ta, cha siepahliena cha nochhi lâta pâhchhô liatapa nata a lyupa a châ.

¹³ Chatawhcha chyhsa chata ei hnohta, “Tlyhmia dady liata a ypa maw lâta chhôhpadâhpazy nata chho lâta chhôhpadâhpazy he, chhôhpadâhpa pathaihpazy châ ei ta, Abeipa a hniapa theihthaipazy ta hmohlâpa pathaih chaipazy ama nie nawpa suzy a châ. Su pathaihpa a châpa vâta, hmohlâpa pathaih chaipazy, niepa hlâna, moleina hlâna nata thaileichâna hlâna zy cha, cha liata ama soh tyh awpa a châ.

¹⁴ Theihthaipazy ta Su Pathaihpa chhôh lâ amâ ngia tita, ama chakaona chysiazy khôtho lâ ama puakhei awpa châ vei. Chysia pathaihpazy a châpa vâta, Su Pathaihpa liata soh aw ei ta, chysia hropazy amâ thla khai tawhta vâtlâh suzy lâ ama pua awpa a châ,” tah ta.

¹⁵ Achhyna o pipa chhôh lâ a thlie khai tawhta, nochhi lâ a heihpa chhikao lâ nâ chhi ta, Achhyna o chheipâh zydua thlie ta.

¹⁶ Thliena chôchahrei ta nochhi lâchhâh thlie ta, dy za pangawh a châ.

¹⁷ Maw lâchhâh thlie ta, thliena chôchahrei ta thliepa ta dy za pangawh a châ.

¹⁸ Chho lâchhâh thlie ta, thliena chôchahrei ta thliepa ta dy za pangawh a châ.

¹⁹ Chatawhcha notla lâ a liepa ta thlie heih ta, thliena chôchahrei ta thliepa ta dy za pangawh a châ hra.

²⁰ A kâ miapalih thlie heih ta. Achhyna o cha thokhy ta chadô ta, a doh lâ dy za pangawh, a hâ lâ dy za pangawh a châ. Cha thokhy cha su pathaihpa nata vâtlâh yna pananona châta taopa a châ.