EZEKIA 41 - Mara Bible RV (BSI)

Achhyna o chhôh

¹ Chatawhcha chyhsa chata Achhyna opi lâ nâ chhi ta, a pâhchhô chatipazy thlie ta, a kâ chavei chachâh ta dy charu chha ta, cha cha byureih hâ a châ.

² Achhyna o lâ angiana chhikao cha dy hrawh kawh ta, a kâ chavei chachâh ta pâhchhô chatipazy cha dy pangawh raihrie a chha. Achhyna opi chhôh thlie ta, a doh lâ dy sypalih châ ta, a hâ lâ dy kih a châ.

³ Chhôhpadâhpa chhôh viapa lâ a ngia ta, angiana pâhchhô chatipazy thlie ta, dy no chyu chha ta, ochhi cha dy charu kawh ta, angiana chavei chachâh ta pâhchhôzy cha dy sari raihrie a kawh.

⁴ Achhyna opi chhôh chaipa liata chhôhpadâhpa thlie ta, a doh lâ dy kih châ ta, a hâ lâ dy kih a châ. Chatanachata ei hnohta, “He he Su Pathaih Chaipa a châ,” tahpa ta eina chho.

⁵ Achhyna o pâhchhô thlie ta, dy charu chha ta, Achhyna o kâ zydua liata dy charu a kawhpa chhôhpadâhpazy a y.

⁶ A kâ lâta chhôhpadâhpazy cha chhâh thôh hnei ta, a chhâh chhâh ta a pacho ta, a chhâh maihta chhôhpadâhpa sythôh chyu a y. A kâ lâta chhôhpadâhpazy pa-i nawpa ta, Achhyna o pâhchhô pabaipa ta tlâhkhaizy taopa a châ. Chatanachata chhôhpadâhpazy cha Achhyna o pâhchhô liata a hnieh leipa ta a y aw.

⁷ Achhyna o cha, â sâhna zie ta dôhkhâh khaipa a châpa vâta, a kâ lâta chhôhpadâhpazy cha, a chhâh â sâh via nahta, a kawh via laih lymâ. Chatanachata chhôhpadâhpazy cha a sâh via, kawh via, tah lymâ ta, a liah chhôhpadâhpa siepahliepa ta, chhôhpadâhpa ry chaipa tawhta chhôhpadâhpa chô chaipa lâ kia tyhpa a châ.

⁸ Achhyna o cha, a o zydua padôpa ta, alei hlâta â sâh viapa ta â bôna lôdao taopa châ ta, cha cha laitlâ châta hmâ pâpa a châpa hmô na ta. A kâ lâta chhôhpadâhpazy abôna cha, dy charu a seihpa thliena chôchahrei tie tlai ta â sâh.

⁹ A kâ lâta chhôhpadâhpazy khôtho lâ pâhchhô chhana zie cha dy pangawh a châ. Achhyna o kâ lâta chhôhpadâhpazy nata

¹⁰ Achhyna o chhôhpadâhpa hropazy likawh su tlyhpa cha, dy kih a kawh.

¹¹ A kâ lâta chhôhpadâhpa ochhizy cha, su tlyhpa lâta pahypa châ ta, ochhi miakha cha maw lâ a heih ta, ochhi hropa cha chho lâ a heihpa a châ. Su tlyhpa kawhna zie cha dy pangawh a châ.

¹² Notla lâta dôhpachhôh tlyhmia lâ a heihpa o cha dy sysari kawh ta, o pâhchhô cha dy pangawh chhapa sai châ ta, o doh lâ cha dy sychaki a châ.

¹³ Chatawhcha Achhyna o cha thlie ta, dy za kha a seih. Achhyna o dôhpachhôh tlyhmia nata o nata a pâhchhô chhanazy rei pâpa ta dy za kha a châ hra.

¹⁴ Achhyna o hmia lâ nata nochhi lâta dôhpachhôh tlyhmia kawhna zie pahlyhpa ta dy za kha a châ.

¹⁵ Chatawhcha Achhyna o hnôh lâ thlie ta, dôhpachhôh nata pâhchhô liata atyuna suzy rei pâpa ta, dy za kha a châ. A o chhôhzy, dôhpachhôh tlyhmia aikahzy,

¹⁶ ochhi châkeihzy, opy buahpazy nata pâhchhô liata atyunazy cha, a chhâh thôh ta, siphiah tawhta a opyzy taihta a zydua ta thophia ta pathopa a châ. Opyzy chhao pathopa a châ.

¹⁷ Ochhi luh chô nata chhôh­padâhpa pathaih chaipa nata a khôtho lâ chhao, a pâhchhô zydua a chhôh lâ nata khôtho lâ thlie khaipa a châ.

¹⁸ Chazy cha cherubi nothlahpazy nata thiahrâ kô nothlahpazy ta pangiapa châ ta, cherubi nata cherubi likawh liata thiahrâ kôzy y a lymâ. Cherubizy cha hmia no hnei chyu ei ta,

¹⁹ hiakha lâta thiahrâ kô lâ a heihpa cha chyhsapa hmia phaoh ta, hiakha lâta thiahrâ kô lâ a heihpa cha chakeibarôhneipa lochopa hmia a phaohpa a châ. Cha nothlahpazy cha Achhyna o padôpa ta khiepa a châ.

²⁰ Siphiah tawhta ochhi luh chô taihta cherubi nata thiahrâ kô nothlahpazy khiepa châ ta, Achhyna opi pâhchhô chhao, cha hawhta taopa a châ.

²¹ O chhôh lâta ochhi tôhzy cha ki palih hneipa ta taopa châ ta, Su Pathaih Chaipa hmiakô liata tho maisâh a lyupa a y.

²² Maisâh cha dy thôh a sâh ta, dy no seih ta, dy no a kawh. Maisâh kizy, â tyunazy nata a kâzy cha tho ta taopa sai a châ. Chyhsa chata ei hnohta, “He he Abeipa hmiakô liata tlâhkhai a châ hih,” tah ta.

²³ A o chhôh nata Su Pathaih Chaipa zy cha ochhi miano raihrie ama hnei.

²⁴ Ochhizy liata ochhi phia no chyu y ta, phia khapa cha thlie theipa châ ta, ochhi miakha ta thlie theipa ochhi phia no a hnei.

²⁵ Pâhchhôzy liata khiepa hawhta, Achhyna o chhôh ochhizy liata chhao, cherubi nata thiahrâ kô nothlahpazy khiepa a châ. Khôtho aikah hmia liata thophia ta vâphuh nohdi chhôhpa a y.

²⁶ Aikah pâhchhôzy, Achhyna o kâ lâta chhôhpadâhpazy nata vâphuh nohdi zy liata opy buahpazy y ta, pâhchhô hmia nata hnôh ta thiahrâ kô nothlahpazy khiepa a châ.