EZEKIA 4 - Mara Bible RV (BSI)

Zerusale dôhna pamosana

¹ “Hy chyhsa sawchapawpa y, leiraopa la la, na hmiakô liata soh la, a chô liata Zerusale khihpi nothlahpa khie la,

² khihpi cha dôh hapa a châna palâsa la, khihpi dôhna diahsua nothlahpazy tao la, khihpi la thei nawpa ta khihpi thokhy leizaih pathlu thlupa nothlahpa zy tao mah y. Khihpi chadôpa ta pheisaihzy riehmo ama paryhpa palâsa la, thokhy chhuh pathlah nawpa nothlahpazy ta khihpi thokhy cha chadôsa mah y.

³ Chatawhcha thua phiapa la la, nâ nata khihpi likawh liata thua thokhy ta chhôh la, cha lâ cha na hmia chhy mah y. Cha hawhna chata khihpi cha dôh aw chi ta, na dôhpa cha na pa-i via lymâ aw. He he Izarei pathlazy châta ngiana a châ aw.

⁴ “Chatawhcha na chavei lâ a hniehpa ta a zia la, Izarei pathlazy moleina cha na chô liata soh la phaoh mah y. Nâ zia nawpa noh ziepa cha, âmo moleina na phao nawpa noh ziepa a châ aw.

⁵ Ama moleina kô zie ta nâ zia nawpa nohzy cha raopa na ta, noh 390 chhôh Izarei pathlazy moleina na phaoh aw. Cha tlu pasipa ta, Izarei pathlazy moleina cha na phao awpa a châ.

⁶ “Cha cha na patlô tita, na chachâh lâ a hniehpa ta a zia heih aw chi ta, Zudâh pathlazy moleina na phaoh heih aw. Kô kha châta noh kha lymâ ta, noh sypalih a zia awpa ta na châta ei cha rao.

⁷ Na viahkao bâh typa ta Zerusale dôhna lâ a heih aw chi ta, khihpi hnohta hrohsona bie na phuah aw.

⁸ Khihpi na dôhpa na patlô hlâlei cha, nâ palie patheih thei lei nawpa ta, chaori ta ei cha buh aw.

⁹ “Âtâ sâh, bâli sâh, abie, dailuah, satô nata sapo zy la la, beih miakha liata ryh la, cha tawhtapa cha viahchhâ a tao mah y. Cha cha na kâ lâta nâ ziana noh 390 chhôh ta na nie awpa a châ.

¹⁰ Na nie awpa cha khopathliah tyhpa châ aw ta, noh kha ta sekel miakih châ aw ta, cha cha noh chareih ta a daihti taihpa liata na nie tyh aw.

¹¹ Ti na do awpa chhao panuapa châ aw ta, noh kha ta chhiehraôh ôh kha lymâ ta, a daihti taihpa liata na doh tyh aw.

¹² Ama mohmô liata chyhsapa ie chawhpa hmâpa ta mei patih aw chi ta, cha liata bâli sâh viahchhâ tao aw chi ta, na nie aw,” tah ta.

¹³ Chatawhcha Abeipa ta, “Cha hawhna chata Izarei pathlazy chhao, âmo ei papuana râh phopizy hry liata viahchhâ pathaih leipa ama nie aw,” tah ta.

¹⁴ Chatawhcha kei ta, “Âh, Abeipa Zehôvâh y, pachâ tua, a papuapalei beih va na. Ei thyutlia daihti tawhta tahmâ taihta, ano thi ta a thipa sa tlyma, sahrâhpa ta a taipa sa tlyma, sa pathaih leipa tlyma, ei pakah liata a ngia beih vei,” tah na ta.

¹⁵ Abeipa ta ei hnohta, “Cha khiahta la, moh teh, chyhsapa ie vyuhpa ta, viahchao ie mei patihpa ta na viahchhâ cha tao awpa ta ei pasaih,” tah ta.

¹⁶ Chatawhcha Abeipa ta ei hnohta, “Chyhsa sawchapawpa y, pachâ teh, Zerusale niedo hnawh chhie pachhô aw na ta, ama pati nie awpa tichho beihchho sapa ta, pachârôhpa ta nie aw ei ta, ama do awpa ti chhao panuapa ta, thlazohpa ta ti ama doh aw.

¹⁷ Nie nata do a phahlapa ta, vâsâhpa ta amâ moh thlâh ha nawpa ta, he hmo he tao aw na ta, ama moleina vâta zaoh lymâ aw ei ta, ama thi aw.”