EZEKIA 39 - Mara Bible RV (BSI)

¹ “Chavâta, nâ, chyhsa sawchapawpa y, Kawkâ kyh liata hrohsona bie phuah la, a hnohta hetana heta reih teh. Abeipa Zehôvâh ta hetana heta a tah: Moh teh, Hy Kawkâ, Mese nata Tubâ bei lai chaipa y, ei châ dyuh.

² Cha pahiehpa ta, châ daophi aw na ta, Izarei tlâhpizy a dyuh awpa ta, maw chhâna tawhta ei châ vaw chhi aw.

³ Na ku chavei lâ liata na libaw chakhyh pathlah aw na ta, na ku chachâh lâta na châtaizy ei patlasa aw.

⁴ Izarei tlâhpizy chô liata pao aw chi ta, nâ nata na pheisaih zydua nata na hnohta a ypa phopizy nama pao khai aw. Nama rizy cha sa hei a niepa pavaw to nata râh sahrâhpa to nie awpa ta ei pie aw.

⁵ Lyurâhpa liata na pao aw, ei reih haw, Abeipa Zehôvâh ta a tah.

⁶ Mâkaw nata tilaipi kiah râhzy liata chhôhmohpa ta a pahrâpazy chô liata mei papua aw na ta, chatanachata kei he Abeipa ei châ tahpa ama pahno aw.

⁷ “Ei phopi Izarei hry liata ei moh pathaihpa palâsa aw na ta, ei moh pathaihpa papuapalei heih awpa pasaih khao aw va na. Chatanachata phopizy ta kei he Abeipa, Izarei Mo Pathaihpa ei châ tahpa ama pahno aw.

⁸ Moh teh u, cha noh cha vaw tlô hai ta, a vaw tlô tlai aw, Abeipa Zehôvâh ta a tah. Cha noh cha ei vaw rei hapa noh kha a châ.

⁹ “Izarei khihpizy liata a pahrâpazy pua aw ei ta, adyuhna chhaichhizy mei liata ti aw ei ta, a kâ khai aw. Vyhphao chyhpa nata vyhphao laipazy, libaw nata châtaizy, asei nata seichhizy cha, kô sari chhôh mei patina châta ama hmâh aw.

¹⁰ Adyuhna chhaichhizy cha, mei tho châta ama hmâh awpa vâta, lyurâhpa tho ama phao awpa byuh khao leipa aw ta, râhmâhpa tho thlu awpa byuh khao hra aw vei. Âmo a hraotuhpazy hraona sôh chhu aw ei ta, âmo hmo a parutuhpazy hmo ama parupa aw, Abeipa Zehôvâh ta a tah.

¹¹ “Kawkâ nata a zawpizy cha pabupa ama châ awpa vâta, cha noh liata, Izarei râh liata Kawkâ châta thlâ su taopa aw na ta, tilaipi nochhi lâ liata Khitlyhpazy Saikao ei taopa aw ei. Cha saikao cha Hâmôkawkâ Saikao tahpa a châ aw.

¹² “Izarei pathlazy ta ama râh pathai aw ei ta, Kawkâ zawpizy cha thla sari chhôh ama pabu aw.

¹³ Râh chyhsa zydua ta âmo cha pabu aw ei ta, ei rônahna ei palâsana noh cha ama moh pathâhna noh a châ aw, Abeipa Zehôvâh ta a tah.

¹⁴ “Râh zydua chahryh awpa ta chyhsazy rao aw ei ta, alei chô liata ri a y chypazy pabu aw ei ta, râh ama pathaisa aw. Thla sari a chhâ nahta, rureihzy ama tlua aw.

¹⁵ Râh zydua chahryh aw ei ta, chyhsa ruzy hmôpa a châ khiahta cha, ri pabutuhpazy ta Hâmôkawkâ Saikao liata ama pabu khai hlâlei cha, rureih kiapâh liata ngiana ama tao aw.

¹⁶ Khihpi moh cha Hamônâ tahpa a châ hra. Cha hawhna chata râh cha ama pathai aw.

¹⁷ “Hy chyhsa sawchapawpa y, Abeipa Zehôvâh ta hetana heta a tah: Pavaw chi to nata râhsa chi to hnohta bie reih la, ‘A pahmaoh u la, a vy teh u. Nâmo châta atheihna kyhchhi ei chhuanohpa lâ a vy awpa ta, su to tawhta a pahmaoh u la, Izarei tlâhpizy liata atheihna kyhchhi rônahpa ei taopa lâ a vypa ta, sa nie u la, thisaih doh teh u.

¹⁸ Chyhsa rônahpazy sa niepa ta, lei beimachâzy thisaih doh aw ei chi ta, mietaku tôhpazy, mietakutawzy, mie tôhpazy nata viahchao tôhpazy thisaih nama doh aw. Viahchao tôhpa zydua cha Bâsanâ viahchao tôhpa thawhpazy ama châ.

¹⁹ Nama châta atheihna kyhchhi ei chhuanohpa liana chata, nama rih biena taihta sa thawhpa nie aw ei chi ta, nama parina taihta thisaih nama doh aw.

²⁰ Arâzy nata arâ pheisaihzy, chyhsa thatlôpa nata pasaipha chi nanopazy cha, ei tlâhkhai liata lôhrâtlôpa ta nama nie aw,’ Abeipa Zehôvâh ta a tah.

²¹ “Phopizy hry lia­ta ei rônahna paluahsa aw na ta, phopi zydua ta ei pachiana nata ama chô liata ku ei pathlazie zy ama hmô aw.

²² Cha noh tawhta cha, Izarei pathlazy ta kei he Abeipa ama Khazohpa ei châ tahpa ama pahno ha aw.

²³ Phopizy ta Izarei pathlazy cha ama paraona vâta seichâna lâ a siepa ama châzie ama pahno aw. Ei chô liata ngâchhih leipa ta ama ypa vâta, âmo tawhta ei hmia nyupa ta, ama khakhaipazy ku liata hlâ ei na ta, zaozi ta ama pao khai hapa a châ.

²⁴ Ama pathaih leina nata ama paraona lymâ hawhta ama chô liata tao na ta, âmo tawhta ei hmia ei nyu hapa a châ.

Izarei paduapathina

²⁵ “Chavâta Abeipa Zehôvâh ta hetana heta a tah: Tahmâ cha Zakaw vânoh patosa heihpa ta, Izarei pathla zydua zawh a ngiah heih aw ei na ta, ei moh pathaihpa cha liahsa ei pabohsa ha bâ aw.

²⁶ Ahy hmahta âmo cha pachisa khao leipa ta, ama râh liata chhôhmohpa ta ama pahrâ tita, ama nozana nata ei chô liata ama paraona zydua ama my khai ha aw.

²⁷ Phopizy hry tawhta a chhi pakhua aw ei na ta, ama chariahpazy râh tawhta pakhypa ta, âmo hmâpa ta phopi hluhpi mohmô liata ei pathaihna ei palâsa tita, ama nozana nata ei chô liata ama paraona zydua ama my khai aw.

²⁸ Phopizy hry liata seichâna lâ pasiesa ei na ta, châhrasala ama râh lâ ei chhi pakhua heihpa vâ ei ta, kei he Abeipa ama Khazohpa ei châ tahpa ama pahno aw. Phopizy hry liata a ngua awpa ta pakha hmah siesai khao aw veih ei na.

²⁹ Âmo tawhta ei hmia nyu khao leipa aw na ta, Izarei pathlazy chô liata ei Thlahpa tlao ei hry aw, Abeipa Zehôvâh ta a tah.”