EZEKIA 38 - Mara Bible RV (BSI)

Kawkâ kyh hrohsona bie

¹ Abeipa bie ei hnohta vaw tlô ta:

² “Chyhsa sawchapawpa y, Mâkaw râh liata Mese nata Tubâ bei lai chaipa Kawkâ lâ a heih la, hrohsona bie phuah thlu la,

³ a hnohta hetana heta reih teh. Abeipa Zehôvâh ta hetana heta a tah: Pachâ teh, Hy Kawkâ, Mese nata Tubâ bei lai chaipa, ei châ dyuh.

⁴ Cha pahieh aw na ta, na kâh liata keipa ta cha paao aw na ta, ei châ chhi aw. Na pheisaih zydua a chhi khai aw ei na ta, chariah chhaichhi kipa ta tobipa arâzy nata arâ pheisaihzy, vyhphao laipa nata vyhphao chyhpa a chabapa ta, zaozi a pahiehpa pheisaih hluh ngaitapazy ei chhi khai aw ei.

⁵ Persia, Kusi nata Puti zy chhao âmo hnohta a chhi aw ei na ta, ama zydua ta vyhphao nata thua lakhu a hneipazy ama châ.

⁶ Kôme nata a pheisaih zydua a chhi aw ei na ta, maw chhâna lâta Tôkamâ pathla nata a pheisaih zydua ei chhi aw ei. Na hnohta phopi hluhpi ama y.

⁷ “Nâ nata na hnohta a pahmaohpa na pheisaih zydua a chhuanoh u la, a mâ chiehpa ta y u la, âmo vaituhpa châ mah y.

⁸ Noh hluhpi tawhta chariah a dyuh awpa ta awpa na châ aw. Kô a vaw tlô awpazy liata, zaozi tawhta pachhapa râh na siehnao aw. Cha râh cha, phopi hluhpi tawhta Izarei tlâhpizy liata pahmaoh pakhypa chyhsazy yna râh châ ta, roryhrapa ta khâ a ypa râh a châ. A chyhsazy cha phopizy hry tawhta a chhi papuapazy châ ei ta, tahmâ cha ama zydua ta thlalôhpa ta a y hapazy ama châ.

⁹ Hmia lâ tôh aw chi ta, chothyu hawhta na tlô thlu aw. Nâ nata na pheisaih zydua nata na hnohta phopi hluhpi cha, meihdo ta râh a pahlypa nama lyu aw.

¹⁰ “Abeipa Zehôvâh ta hetana heta a tah: Cha noh liata, na palôh liata pachâna a vaw ngia aw ta, hmo pha leipa pachâhpadypa ta,

¹¹ ‘Thokhy a hnei leipa khihzy yna râh siehnao aw na ta, chhôhmohpa ta a ypa chyhsazy ei tla thlu aw ei. Ama zydua ta thokhy hnei leipa ta a pahrâpazy châ ei ta, thokhy chhikao nata ahraina thuatlai a hnei leipazy ama châ,’ na tah aw.

¹² Hraona sôh nata hmobaohzy lapa ta, siekhei awpa ta âmo cha siehnao aw chi ta, roryhrapa ta a y tyhpa, tahmâ deikua chyhsazy pahrâna su a châ hapazy chô liata nata râhzy tawhta pakhypa phopi, sahroh zaw nata hmobaohzy hneipa ta, khizaw liah liata a pahrâpazy chô liata na ku hy awpa ta na siehnao aw ei.

¹³ Sebâ nata Dedâ nata Tâsi sôdaohpazy nata ama chhituhpa zydua ta na hnohta, ‘Hraona sôh la awpa ta ma nâ vy? Hraona sôh, tâkâ, ngôh nata sahroh zawzy nata hmobaohzy siekheipa ta, sôh hluhpi hrao awpa ta ma na pheisaihzy na pahmaoh?’ ama cha tah aw.

¹⁴ “Chavâta chyhsa sawchapawpa y, hrohsona bie phuah la, Kawkâ hnohta hetana heta reih teh. Abeipa Zehôvâh ta hetana heta a tah: Cha noh, ei phopi Izarei â bohpa ta ama pahrâ nawpa daihti cha pahno va chi ma?

¹⁵ Maw lâ râh chhâna, na yna su tawhta a vy aw chi ta, nâ nata na hnohta a ypa phopi hluhpi namâ vy aw. Ama zydua ta arâ a kiahpazy châ ei ta, pheisaih hluh ngaitapa nata thatlôpa ama châ.

¹⁶ Meihdo ta râh a khupa hawhta, ei phopi Izarei cha khyhnao aw chi ta a râh na khu khai aw. Noh hnôhlâzy liata, ei râh a dyuh awpa ta châ chhi aw na ta, Hy Kawkâ, nâma hmâpa ta ama mohmô liata ei pathaihna ei chaluah tita, phopizy ta eina pahno aw ei.

¹⁷ “Abeipa Zehôvâh ta hetana heta a tah: Nâ he nâ chakaotuhpa Izarei hrohsopazy thâtih hlâno ta ei reipa kha na châ ma? Cha daihti liata âmo a dyuh awpa ta, hrohsona bie kô hluhpi a phuahpa kha na châ ma?

¹⁸ Châhrasala cha noh liata, Kawkâ ta Izarei râh a vaw siehnao awpa noh lia tlai ta, ei hiehâhna ru ngaitapa a pua aw, Abeipa Zehôvâh ta a tah.

¹⁹ Ei hiatliana nata ei pathiiana ru ngaitapa ta, cha noh liata Izarei râh liata losihpa ru ngaitapa â sih awpazie ei phuah.

²⁰ Tilaipi ngazy, avâ pavawzy, râh sazy, alei liata âlyhpa sa zydua nata alei chô liata chyhsa zydua ei hmiakô liata amâ chalyu aw. Tlâhpizy pahnaipa châ aw ei ta, lôkâhpazy cho aw ta, thokhy to alei liata a pao aw.

²¹ Kawkâ a dyuh awpa ta, ei tlâhpi zydua chô liata zaozi pahmaoh aw na ta, chyhsa to zaozi ta a unawhpa â dyuh aw, Abeipa Zehôvâh ta a tah.

²² Potlana nata thisaih palopa ta ano cha pachia aw na ta, ano nata a pheisaihzy nata a hnohta a ypa phopi hluhpi chô liata vâkatlâ pasuasa aw na ta, pareih lai ngaitapazy patlasapa ta, mei nata kaihzy ei pasuasa aw.

²³ Cha hawhna chata ei rônahzie nata ei pathaihzie palâsa aw na ta, phopi hluhpi mohmô liata keimasasyh ta ei pahnosa aw. Chatanachata kei he Abeipa ei châ tahpa ama pahno aw.”