EZEKIA 37 - Mara Bible RV (BSI)

Ru chawhpa saikao

¹ Abeipa ku ei chô liata y ta, Abeipa Thlahpa ta nâ chhi ta, saikao liah liata na soh ta. Cha saikao cha ru ta bie thlâh ha ta.

² Ruzy cha na chahryhsa ta, saikao liata ru hluhpi y ta, ru chawhkaraipa sai a châ.

³ Abeipa ta, “Chyhsa sawchapawpa, he ruzy he ama hroh thei aw ma?” na tah ta. Kei ta, “Hy Abeipa Zehôvâh, nâ ta na pahno,” tah na ta.

⁴ Ano ta ei hnohta, “He ruzy chô liata hrohsona bie phuah la, ama hnohta, ‘Hy ru chawhkaraipazy saih u, Abeipa bie thei teh u.

⁵ He ruzy hnohna heta Abeipa Zehôvâh ta hetana heta a tah: Pachâ teh u, nâmo liata hu pangiasa aw na ta, nama hroh aw.

⁶ Nâmo liata tharizy soh aw na ta, sapa ta cha vaw pahly aw ei na ta, vo ta ei cha khu aw ei. Nama chhôh liata hu soh aw na ta, nama hroh aw. Chatanachata kei he Abeipa ei châ tahpa nama pahno aw,’ tah mah y” tah ta.

⁷ Biepiepa ei châpa hawhta, hrohsona bie cha phuah na ta. Hrohsona bie ei phuah hai nota, hmo â pakhypa pyu vaw y ta, ruzy cha a vaw pazao ei ta.

⁸ Moh na ta, ruzy chô liata tharizy a vaw ypa hmô na ta, ruzy cha sapa ta vaw pahlypa ta, vo ta khu ta. Châhrasala âmo liata hu y leipa ta.

⁹ Abeipa ta ei hnohta, “Hu hnohta hrohsona bie phuah la, Hy chyhsa sawchapawpa y, phuah tlai la, hu hnohta, Abeipa Zehôvâh ta hetana heta a tah: ‘Hy hu y, thlih pathlina kaokih miapalih tawhta a vy la, ama hro thei nawpa ta, he thiepazy chô liana heta hu so thlu teh,’ tah mah y,” tah ta.

¹⁰ Bie eina piepa hawhta hrohsona bie cha phuah na ta, âmo liata hu a vaw ngia ta, hroh ha ei ta. Ama phei ta a duah ei ta, pheisaih hri hluh ngaitapa vaw châ ha ei ta.

¹¹ Chatawhcha ei hnohta, “Chyhsa sawchapawpa y, he ruzy he Izarei pathlazy ama châ hih. Pachâ teh, Izarei pathlazy ta, ‘Eima ruzy chawhkaraipa ta, eima hnabeiseihna lei khai ha ta, chhawh pathlahpa ta eima y haw,’ ama tah.

¹² Chavâta ama hnohta hetana heta hrohsona bie phuah teh. Abeipa Zehôvâh ta hetana heta a tah: Pachâ teh u, nama thlâzy pahy aw na ta, Hy ei phopi y, nama thlâzy tawhta cha pathyu aw ei na ta, Izarei râh lâ ei châ chhi aw ei.

¹³ Hy ei phopi, nama thlâzy pahypa ta, nama thlâzy tawhta ei cha pathyu ti ei ta, kei he Abeipa ei châ tahpa nama pahno aw.

¹⁴ Nama chhôh liata ei Thlahpa soh aw na ta, hroh aw ei chi ta, nama râh lia tlai ta ei cha pahrâsa aw ei. Chatanachata kei Abeipa heta reih ha na ta, ei tao tlai aw tahpa nama pahno aw,” Abeipa ta a tah.

Phopi miakha, bei pakha

¹⁵ Abeipa bie ei hnohta vaw tlô ta:

¹⁶ “Chyhsa sawchapawpa y, masô miakha la la, a chô liata, ‘Zudâh nata a sahlao Izarei pathlazy châta,’ tahpa ta roh teh. Masô hropa la heih la, a chô liata, ‘Epharai masô Zawsi nata a sahlao Izarei pathla zydua châta,’ tahpa ta roh teh.

¹⁷ Masô mianopazy cha pazao la, na ku liata masô miakha a vaw châ aw.

¹⁸ Na phopi sawzy ta, ‘Kha hawhta na taopa kha khâpa ma na rei khoh tahpa miah chho aw va chi ma?’ ama cha tah khiahta cha,

¹⁹ ama hnohta, Abeipa Zehôvâh ta hetana heta a tah: Pachâ teh u, Epharai nata a sahlao Izarei pathlazy ku liata a ypa Zawsi masô cha la aw na ta, Zudâh masô nata pazao aw na ta, masô miakha ta ei tao aw. Chatanachata ei ku liata miakha ama vaw châ ha aw.

²⁰ Châ na rona masôzy kha ama mohmô ta na ku liata chaba la,

²¹ ama hnohta hetana heta reih teh. Abeipa Zehôvâh ta hetana heta a tah: Pachâ teh u, Izarei sawzy cha ama siena râhzy tawhta lapa ta, su to tawhta pakhy aw ei na ta, âmo râh lâ ei chhi aw ei.

²² Chatanachata ama râh, Izarei tlâhzy liata phopi miakha ta tao aw ei na ta, ama zydua chô liata ryu a reih awpa bei pakha a y aw. Phopi miano châ khao leipa aw ei ta, khinarâh miano ta pachhaihpa châ khao aw veih ei.

²³ Ama khazoh nothlahpazy nata ama hmo pasichhihpazy ta a papuapalei khao leipa aw ei ta, ama paraonazy ta a papuapalei khao aw veih ei. Ama moleina nata hnôh amâ syna zydua tawhta pachha aw ei na ta, ei pathaisa aw ei. Ei phopi châ aw ei ta, ama Khazohpa ei châ aw.

²⁴ “Nâ chakaotuhpa Dâvi cha ama chô liata bei châ aw ta, ama zydua ta vaituhpa pakha ama hnei aw. Ei ryhpazy a chhih aw ei ta, ei bieraopazy ama zyh aw.

²⁵ Nâ chakaotuhpa Zakaw hnohta râh ei piepa, châ pathlatuhpazy vaw pahrâ tyhna râh liata ama pahrâ aw. Cha liata âmo nata ama sawzy nata ama samohzy chhâzaw ta pahrâ aw ei ta, nâ chakaotuhpa Dâvi cha chhâzaw ta ama bei a châ aw.

²⁶ Ama hnohta adyhna biehrai tao aw na ta, cha cha âmo châta chhâzaw biehrai a châ aw. Ama râh liata pahrâsa aw ei na ta, ama maluh papôh aw na ta, ama hry liata chhâzaw ta ei supathaihpa ei padua aw.

²⁷ Ei pahrâna su ama hnohta y aw ta, ama Khazohpa châ aw na ta, ei phopi ama châ aw.

²⁸ Ei supathaihpa cha ama hry liata chhâzaw ta â dua tita, kei he Izarei a pathaisatuhpa Abeipa ei châ tahpa phopizy ta ama pahno aw.”