EZEKIA 36 - Mara Bible RV (BSI)

Izarei tlâhzy kyh hrohsona bie

¹ “Nâ, chyhsa sawchapawpa y, Izarei tlâhzy hnohta hrohsona bie phuah la, ama hnohta hetana heta reih teh: Hy Izarei tlâhzy saih u, Abeipa bie thei teh u.

² Abeipa Zehôvâh ta hetana heta a tah: Chariahpa ta nâmo kyh liata, ‘Azi! Tlâh hlôpazy keimo eih a châ haw,’ ama tahpa vâta,

³ hrohsona bie phuah la, hetana heta reih teh. Abeipa Zehôvâh ta hetana heta a tah: Roryhrapa ta cha tao ei ta, su to tawhta cha chanaohpa ta, phopi hropazy eih vaw châ ha ei chi ta, chyhsazy ta ama rei awpa nata reipachhie awpa ta ama cha tao hapa vâta,

⁴ Hy Izarei tlâhpizy saih u, Abeipa Zehôvâh bie he thei teh u: Abeipa Zehôvâh ta tlâhpizy nata tlâhthlôhzy, chavahzy nata saikaozy, su rypazy nata khihpi roryhrapazy hnohta hetana heta a tah: Ama chheipâh phopizy ta ama hrao awpa nata pahneisao awpa ama vaw châ haw.

⁵ Chavâta Abeipa Zehôvâh ta hetana heta a tah: Ei hiatlia pasana ta phopi hropazy nata Edômâ mo zydua chô liata hiehâh ngaitapa ta bie vaw reih ha na ta. Âmo cha palôh a ly ngaitapa nata papeisana rai hnei leipa ta ei râh nâ chhupazy châ ei ta, râh sibie phana suzy cha ama hraona sôh ta a taopazy ama châ.

⁶ Chavâta Izarei râh kyh liata hrohsona bie phuah la, tlâhpizy nata tlâhthlôhzy, chavahzy nata saikaozy hnohta hetana heta reih mah y. Abeipa Zehôvâh ta hetana heta a tah: Pachâ teh u, phopizy reipachhiena nama taopa vâta, ei hiatlia pasana ta hiehâhpa ta bie vaw reih ha na ta.

⁷ Chavâta Abeipa Zehôvâh ta hetana heta a tah: Ku chaluahpa ta bie ei taih, nâmo châ reipachhiepa nama chheipâh phopizy cha reipachhiepa ta ama y hra aw.

⁸ “Nâmo deikua cha, Hy Izarei tlâhpizy saih u, ei phopi Izarei sawzy amâ vaw di patoh bâ awpa vâta, nama chhyhzy thaopa ta, nama chiahzy pachiah aw ei chi ta, ei phopi Izarei châta thei nama pathei aw.

⁹ Pachâ teh u, nama chhâh a châ aw na ta, nâmo lâ ei vaw heih aw. Nama leizy paliepa châ aw ta, chizy nama tu heih aw.

¹⁰ Nama chô liata chyhsa papôhsa aw na ta, Izarei pathlazy ei papôhsa aw ei. Khihpizy cha chyhsa pahrâna châ aw ei ta, su rypazy chhao paduapathipa a châ aw.

¹¹ Nama chô liata chyhsapa nata sa zy papôhsa aw ei na ta, pôh aw ei ta, thei ama pathei aw. Hlâno hawhna khata nama chô liata chyhsa pahrâsa heih aw ei na ta, khahlâ ta nama duahmo hlâta pha via syulyupa ta ei cha tao aw ei. Chatanachata kei he Abeipa ei châ tahpa nama pahno aw.

¹² Nama chô liata chyhsazy chareisa aw ei na ta, ei phopi Izarei sawzy ei chareisa aw ei. Âmo ta na tlâh liata pahrâ aw ei ta, ama ryuto râh châ aw chi ta, ama sawzy pathisa khao aw va chi.

¹³ “Abeipa Zehôvâh ta hetana heta a tah: ‘Chyhsazy a palâtuhpa châ chi ta, na phopi hawtizy a thietuhpa na châ,’ ama cha tah.

¹⁴ Chavâta chyhsazy palâ khao leipa aw chi ta, na phopi hawtizy thie khao aw va chi, Abeipa Zehôvâh ta a tah.

¹⁵ Râhzy ta ama cha reipachhiena thei khao leipa aw chi ta, phopizy mohnaopa châ khao hra leipa aw chi ta, na râh papaosa khao aw va na,” Abeipa Zehôvâh ta a tah.

¹⁶ Abeipa bie ei hnohta vaw tlô ta:

¹⁷ “Chyhsa sawchapawpa y, Izarei pathlazy ta ama râh liata ama pahrâ no khata, ama hrozie nata ama hmotaopazy ta râh cha papuapalei ei ta, ei hmiakô liata ama hroziezy cha chanô a thaitlyh lei nota a pathaih leipa hawhta a châ.

¹⁸ Râh chô liata thisaih palo ei ta, ama khazoh nothlahpazy ta râh cha ama papuapaleipa vâta, ama chô liata ei pathiiana ei lei thlu hapa ei a châ.

¹⁹ Phopizy hry liata papai ei na ta, râh to liata hiepatlapa ama châ. Ama hroziezy nata ama hmo­taopazy hawhta ei pachia ei.

²⁰ Ama siena râhzy ama tlô nahta, ama tlôna maih liata ei moh pathaihpa papuapalei ei ta, cha hawhta ama ypa vâta chyhsazy ta, ‘Hezy he Abeipa phopi châ ei ta, châhrasala râh tawhta a pua hapazy ama châ hih,’ ama tah tyh.

²¹ Châhrasala Izarei pathlazy ta ama siena râhzy liata ei moh pathaihpa ama papuapaleipa cha thapasana hnei tlôh na ta.

²² “Chavâta Izarei pathlazy cha hetana heta chho teh. Abeipa Zehôvâh ta hetana heta a tah: Hy Izarei pathlazy saih u, nâmo thapasa vâ châ leipa ta, nama siena râhzy liata nama papuapaleipa ei moh pathaihpa thapasana vâta, he hmo he tao ei chhuahpa a châ.

²³ Phopizy hry liata papuapaleipa ta a ypa, nâmo tlai ta ama hry liata nama papuapaleipa ei moh rônah ngaitapa cha ei pathaisa aw. Nâmo hmâpa ta phopizy hmiakô liata ei moh pathaihpa ei pathaisa tita, phopizy chata kei he Abeipa ei châ tahpa ama pahno aw, Abeipa Zehôvâh ta a tah.

²⁴ Phopizy hry tawhta cha lapa ta, râh to tawhta cha pakhy aw ei na ta, nama râh lâ tlai ei châ chhi aw ei.

²⁵ Ti pathaihpa cha thia aw ei na ta, nama pathaih leina zydua tawhta vaw pathaih aw ei chi ta, nama khazoh nothlahpa zydua tawhta chhao ei cha pathai aw ei.

²⁶ Palôh thiehpa cha pie aw ei na ta, nama chhôh liata thlahpa thiehpa ei soh aw. Nama pôhpa tawhta palôh châkarupa la aw na ta, palôh naipa ei cha pie aw ei.

²⁷ Nama chhôh liata ei Thlahpa soh aw na ta, ei bieraopazy a chhih awpa nata ei biepiepazy zyh awpa ta ei cha tao aw ei.

²⁸ Châ pathlatuhpazy hnohta râh ei piepa liata pahrâ aw ei chi ta, ei phopi châ aw ei chi ta, nama Khazohpa ei châ aw.

²⁹ Nama pathaih leina zydua tawhta ei cha pachha aw ei. Sâh cha pahneisapa ta kôvei papha aw na ta, nama chô liata chakâhna patlôsa aw va na.

³⁰ Tho theilâpa nata lyu kôvei paphasa aw na ta, chakâhna vâta phopizy hry liata maophyuh beih khao aw veih ei chi.

³¹ Nama hrozie moleipazy nata nama hmotao pha leipazy a kaw thei aw ei chi ta, nama paraona nata pasichhihnazy vâta nâmosasyh ta namâ pasi kaw aw.

³² Cha hmo cha nâmo vâta ei tao awpa cha vei tahpa pahno muh vy, Abeipa Zehôvâh ta a tah. Hy Izarei pathlazy saih u, nama hroziezy vâta nama noza sala, nama nohzao mawh sy.

³³ “Abeipa Zehôvâh ta hetana heta a tah: Nama paraona zydua tawhta ei cha pathaisana noh liata, khihpizy cha chyhsa pahrâna ta tao aw na ta, su rypazy paduapathipa a châ aw.

³⁴ Roryhrapa ta a y hapa râh liata lei palie aw ei ta, a chapia chahreihpazy mohmô ta roryhrapa ta a y tyhpa râh kha, roryhrapa ta y khao aw vei.

³⁵ Chatanachata, ‘He râh, roryhrapa ta a y hapa râh he, Idâh sadô hawhta vaw châ ha ta, khihpi rypa nata roryhrapa nata a rao hapazy cha chyhsa pahrâna thokhy khihpizy ama vaw châ ha heih,’ ama tah awh.

³⁶ Nama chheipâh ta phopi a ypazy ta Abeipa ei châ tahpa pahno aw ei ta, su raopazy a paduapathituhpa nata roryhrapa ta a y hapa râh liata thozy a loh heihpa ei châ tahpa ama pahno aw. Kei Abeipa ta reih ha na ta, ei tao aw.

³⁷ “Abeipa Zehôvâh ta hetana heta a tah: Izarei pathlazy ta ama phopi maluh sahroh zaw hawhta papôhsa awpa ta ama hia awpa ei pasaih aw.

³⁸ Atheihna awpa sahroh zaw hawhta, kyhchhi nohzy liata Zerusale liata sahroh zaw hawh tlai ta, khihpi rypazy cha chyhsa zawzy ta ama bie aw. Chatanachata Abeipa ei châ tahpa ama pahno aw.”