EZEKIA 35 - Mara Bible RV (BSI)

Seirâ tlâh kyh hrohsona bie

¹ Abeipa bie ei hnohta vaw tlô ta:

² “Chyhsa sawchapawpa y, Seirâ Tlâh lâ a heih la, a hnohta hrohsona bie phuah la,

³ hetana heta chho teh, Abeipa Zehôvâh ta hetana heta a tah: Hy Seirâ Tlâh, moh teh, ei châ dyuh hih. Na chô liata ei ku hy aw na ta, roryhrapa nata a rypa ta ei cha tao aw.

⁴ Na khihpizy a rypa ta tao aw na ta, roryhrapa ta vaw y aw chi ta, Abeipa ei châ tahpa na pahno aw.

⁵ “Izarei khâ a khakhai chi ta, Izarei sawzy cha ama chhiena nata âmo hriena chhâna daihti liata, zaozi hmotaotheina liata na hlâ ha ei.

⁶ Chavâta ei hrona reipa ta ei reih. Thisaih châta châ chhuahdy aw na ta, thisaih ta a cha chadai aw. Thisaih palopa nâ hao leipa vâta, thisaih ta a cha chadai aw, Abeipa Zehôvâh ta a tah.

⁷ Seirâ Tlâh cha tlâh rypa nata roryhrapa ta tao aw na ta, cha lâ a ngia tyhpa nata a pua tyhpa zydua ei chhawh pathlah khai aw ei.

⁸ A tlâhpizy cha a chyhsa ama thiepazy ta ei pabie aw. Na tlâhthlôhzy nata na saikaozy nata na chavah kao zydua liata zaozi ta thiepazy ama pao hôlô aw.

⁹ Roryhrapa ta y kôzaw awpa ta cha tao aw na ta, na khihpizy liata chyhsa pahrâ khao aw veih ei. Chatanachata kei he Abeipa ei châ tahpa nama pahno aw.

¹⁰ “‘Phopi mianopa nata râh mianopazy cha kei eih châ aw ei ta, keimo ta eima hnei aw,’ tah chi ta, cha râh liata Abeipa a y thlâh hapa chhao ta, cha hawhta na tahpa vâta,

¹¹ ei hrona reipa ta ei reih,” Abeipa Zehôvâh ta a tah. “Izarei sawzy chô liata na hiehâhna nata âmo nâ haopa vâta na ruchhôna na palâsanazie lymâ hawhta na chô liata ei tao aw. Ei cha pachia tita, ama hry liata keimasasyh ta ei pahnosa aw.

¹² Chatanachata Abeipa ei châ tahpa na pahno aw. “‘Roryhrapa ta y ha ei ta, palâ khai awpa ta eima hnohta hlâpa ama châ,’ tahpa ta Izarei tlâhzy na reipachhiena zydua kha ei thei khai.

¹³ Na pakah ta ei chô liata nâ palai thlupa ta, keima chakhiana bie hluhpi reih chi ta, ei thei khai haw.

¹⁴ Abeipa Zehôvâh ta hetana heta a tah: Khizaw zydua thaphapa ta a y nota, roryhrapa ta ei cha paysa aw.

¹⁵ Izarei pathlazy ryuto roryhrapa ta a ypa nâ lypa hawhna khata, na chô liata ei tao aw. Hy Seirâ Tlâh, roryhrapa ta na y aw. Edômâ cha tlokhuh roryhrapa ta a y aw. Chatanachata Abeipa ei châ tahpa ama pahno aw.”